Tgan Jehová tuʼn t-xi tbʼinchaʼn tkyaqil toj ttxolil (1 Corintios 14:​33). Tuʼntzunju, il tiʼj tuʼn tten nukʼbʼil kyxol tmajen. ¿Alkye tten nukʼun ttnam Jehová? ¿Tzeʼn jaku qo onin tuʼn tbʼant tkyaqil toj ttxolil?

1. ¿Alkye nejenel toj ttnam Jehová?

«Porke ate [...] Crist nejenel kye kykyaqil okslal» (Efesios 5:​23). Tzmax toj kyaʼj in nok tqʼoʼn Jesús twitz tiʼj tkyaqil aqʼuntl in bʼant kyuʼn tmajen Jehová twitz tkyaqil Txʼotxʼ. Ok tqʼoʼn Jesús toklen «majen in bʼant taqʼun [...] ex at tnabʼl». Aju majen in bʼant taqʼun, atz in yolin jlu tiʼj jun kʼloj ansyan at nim kyojtzqibʼil ex in nok qʼoʼn tbʼi te Kʼloj Xjal Qʼil Twitz Aqʼuntl (uʼjinktza Mateo 24:​45-​47). Toj ambʼil jaʼlo, in kubʼ nej Kʼloj Xjal Qʼil Twitz Aqʼuntl kywitz tmajen Jehová ateʼ twitz tkyaqil Txʼotxʼ, ik tzeʼn bʼant kyuʼn apóstol ex qe ansyan te Jerusalén toj tnejel syent abʼqʼi (Hechos 15:2). Noqtzun tuʼnj, nya aqe xjal lu nejenel toj ttnam Jehová. Sino in jaw kyuʼjin Tyol Dios tuʼn tel kynikʼ tiʼj alkye t-ximbʼetz Jehová ex in che nimen te Jesús.

2. ¿Alkye aqʼuntl in bʼant kyuʼn ansyan?

Aqeju ansyan, o che chʼiy toj kyokslabʼil ex in xi kyqʼoʼn xnaqʼtzbʼil tiʼj Tyol Dios kye okslal. Ax ikx, in che xqʼuqin kyiʼj erman ex in xi kyqʼuqbʼaʼn kykʼuʼj. Mintiʼ in xi chjoʼn twiʼ kykʼuʼj xjal lu, sino in che ajbʼen te Dios tuʼn tkyaqil kykʼuʼj ex in che onin kyiʼj txqantl (1 Pedro 5:​1, 2). Ax ikx ateʼ qe onil kye ansyan, ex aj tbʼet ambʼil jaku che ok te ansyan qa ma japun requisito kyuʼn.

In jaw tskʼoʼn Kʼloj Xjal Qʼil Twitz Aqʼuntl junjun erman tuʼn kyajbʼen te ansyan in che bʼet kyojele Ja te Chmabʼil. In che visitarin ansyan lu kyiʼj nim kʼloj okslal tuʼn kyonin kyiʼj erman ex tuʼn t-xi kyqʼuqbʼaʼn kykʼuʼj. Ax ikx, in nok kyqʼoʼn kyoklen ermano te ansyan ex te onil kye ansyan qa in japun requisito kyuʼn (1 Timoteo 3:​1-​10, 12; Tito 1:​5-9).

3. ¿Tiʼ in bʼant tuʼn teyele junjun testigo de Jehová?

Kykyaqil erman in jaw kynimsaʼn tbʼi Jehová kyoj chmabʼil ex aj tok tilil kyuʼn tuʼn kypakbʼan (uʼjinktza Salmo 148:​12, 13).

 QO JYON MAS TQANIL

4. Jun tbʼanel nejenel te Jesús ex in tzaj tqʼuqbʼaʼn qkʼuʼj

In tzaj tqʼoʼn Jesús jun tbʼanel txokbʼil qiʼj. Kyuʼjinktze Mateo 11:​28 a 30 ex che yoline kyiʼj xjel lu:

• ¿Junpe tbʼanel nejenel te Jesús? ¿Tiʼ in kubʼ tnaʼna tuʼn jlu?

5. In kubʼ kyqʼoʼn ansyan tbʼanel techel

1. In nok tilil kyuʼn ansyan tuʼn tchʼiy kyamiwbʼil tukʼil Jehová. Ex in che onin kyiʼj toj kyja tuʼn tbʼant ax jlu kyuʼn.

2. In che kwentin ansyan kyiʼj kykyaqil erman ateʼ toj kʼloj okslal.

3.   In nok tilil kyuʼn ansyan tuʼn kypakbʼan.

4. In xi kyqʼoʼn ansyan xnaqʼtzbʼil. Ax ikx, in che onin tuʼn tjaw tzʼis toj Ja te Chmabʼil ex in bʼant junjuntl aqʼuntl kyuʼn.

6. In qo onin kyukʼil ansyan

In tzaj tqʼamaʼn Tyol Dios tiquʼn nim toklen tuʼn qonin kyiʼj ansyan. Kyuʼjinktze Hebreos 13:​17 ex che yoline kyiʼj xjel lu:

• ¿Tiquʼn in tzaj tqʼamaʼn Tyol Dios tuʼn qnimen ex tuʼn qbʼin kye qeju nejni qwitz? ¿In kubʼpe t-ximana qa toj ttxolil jlu? ¿Tiquʼn?

Kyuʼjinktze Lucas 16:​10 ex che yoline tiʼj xjel lu:

• ¿Tiquʼn nim toklen tuʼn qonin kyiʼj ansyan, axpe ikx qa in kubʼ qximen qa nya nim toklen aju in tzaj kyqʼamaʼn qe?

 TOJ CHʼIN YOL

A Jesús nejenel toj kʼloj okslal ex ateʼ ansyan tjaqʼ tkawbʼil. Ex in qo tzalaj tuʼn qonin kyiʼj ansyan tuʼnju in che xqʼuqin qiʼj ex in kubʼ kyqʼoʼn jun tbʼanel yekʼbʼil qwitz.

Aju ma qo yolin tiʼj

• ¿Alkye nejenel toj kʼloj okslal?

• ¿Alkye tten in che onin ansyan toj kʼloj okslal?

• ¿Tiʼ in bʼant tuʼn teyele junjun ajbʼel te Jehová?