XNAQʼTZBʼIL 26
¿Tiquʼn at nim nya bʼaʼn ex yajbʼil?
Aj ttzaj jun nya bʼaʼn kyiʼj xjal, ateʼ junjun in kubʼ kyxjelin jlu: «¿Tiquʼn ma tzaj jlu wiʼje?». In tzaj tqʼoʼn Tyol Dios tzaqʼwebʼil tiʼj xjel lu ex in tzaj tqʼuqbʼaʼn qkʼuʼj aj tel qnikʼ tiʼj.
1. ¿Tiʼ bʼant tuʼn Satanás tuʼn ttzaj nya bʼaʼn kyiʼj xjal?
Ok meltzʼaj Satanás tiʼj Dios. Ex tuʼnju tajtoq tuʼn tkawin kyibʼaj txqantl, ok tilil tuʼn tuʼn tel tpan tibʼ Adán ex Eva tiʼj Dios. Bʼant jlu tuʼn tej t-xi tqʼamaʼn jun nya ax tok yol te Eva (Génesis 3:1-5). Tajtoq Satanás tuʼn tkubʼ t-ximen Eva qa otoq tzʼel tiʼn Jehová ambʼil kye tuʼn kytzalaj tiʼj jun tbʼanel tiʼ. Toj juntl yol, tqʼama Satanás qa mas che tzalajel xjal qa mintiʼtoq ma che nimen te Dios. Tqʼama Satanás tnejel nya ax tok yol tej t-xi tqʼamaʼn te Eva qa mlaytoq kyim. Tuʼntzunju, in tzaj tqʼamaʼn Tyol Dios qa «nikʼal yolte [Satanás] ex atzun in tzaj nikʼaj yol tukʼil» (Juan 8:44).
2. ¿Tiʼ bʼant tuʼn Adán ex Eva?
Kubʼ tyekʼin Jehová tbʼanel tmod tukʼil Adán ex Eva, xi tqʼamaʼn kye qa jakutoq txi kyloʼn tkyaqil twitz tzeʼ at toj jardín te Edén, oʼkx xi tqʼamaʼn kye tuʼn miʼn txi kyloʼn twitz jun tzeʼ (Génesis 2:15-17). Maske xi tqʼamaʼn Jehová jlu kye, kubʼ kyximen tuʼn t-xi kyloʼn. El tiʼn Eva twitz tzeʼ «ex xi tloʼn». Yajxitl, xi tqʼoʼn te Adán ex «xi tloʼn» (Génesis 3:6). Tej tbʼant jlu kyuʼn, mintiʼ e nimen te Dios. Tuʼnju tzʼaqliqe, jakutoq kubʼ kybʼinchaʼn aju bʼaʼn. Pero kubʼ kybʼinchaʼn il tej mintiʼ xi kybʼiʼn tyol Jehová ex el kyikʼun toklen tuʼn tkawin. Tuʼn jlu, tzaj nim nya bʼaʼn kyiʼj (Génesis 3:16-19).
3. ¿Alkye nya bʼaʼn o tzaj qiʼj tuʼnju bʼant tuʼn Adán ex Eva?
Tuʼnju mintiʼ nimen Adán ex Eva te Jehová, e ok te aj il. Ax ikx qe kykʼwal e ok te aj il. In tzaj tqʼamaʼn Tyol Dios jlu tiʼj Adán: «Kyjaʼtzun, ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12).
¿Tiquʼn in tzaj nya bʼaʼn qiʼj? At maj tuʼnx qbʼinchbʼen moqa tuʼnju in bʼant kyuʼn txqantl. Ex junjuntl maj, in tzaj nya bʼaʼn qiʼj tuʼnju atoʼ toj jun lugar nya bʼaʼn moqa toj jun nya bʼaʼn ambʼil (uʼjinktza Eclesiastés 9:12).
QO JYON MAS TQANIL
Qo xnaqʼtzan tiʼj tiquʼn mintiʼ tuʼn tkubʼ qximen qa at tpaj Dios tiʼj nya bʼaʼn in tzaj qiʼj ex tiʼj yajbʼil in qo ikʼ toj. Ax ikx, kʼelel qnikʼ tiʼj tiʼ in kubʼ tnaʼn Dios aj qikʼ toj nya bʼaʼn.
4. ¿Alkye in tzaj qʼonte nya bʼaʼn qiʼj?
Ateʼ nim xjal in kubʼ kyximen qa a Dios in kawin tibʼaj Txʼotxʼ. ¿Axpe tok jlu? Kyqʼonke kywitze tiʼj VIDEO.
Kyuʼjinktze Santiago 1:13 ex 1 Juan 5:19, ex che yoline tiʼj xjel lu:
-
¿Tuʼnpe Dios in tzaj nya bʼaʼn kyiʼj xjal?
5. Aju nya bʼaʼn o tzaj tuʼnju in kawin Satanás
Kyuʼjinktze Génesis 3:1 a 6 ex che yoline kyiʼj xjel lu:
-
¿Tiʼ nya ax tok yol tqʼama Satanás? (Kyqʼonke kywitze tiʼj versículo 4 ex 5).
-
¿Alkye tten tqʼama Satanás qa in nel tiʼn Jehová ambʼil kye xjal tuʼn kytzalaj?
-
Ik tzeʼn tqʼama Satanás, ¿atpe toklen Jehová tuʼn tkawin kyibʼaj xjal tuʼn kytzalaj?
Kyuʼjinktze Eclesiastés 8:9 ex che yoline tiʼj xjel lu:
-
¿Tiʼ o tzaj kyiʼj xjal tuʼnju nya a Jehová in kawin kyibʼaj?
-
Tzʼaqlitoq Adán ex Eva, ex in che anqʼintoq toj Tbʼanel Najbʼil, pero xi kybʼiʼn tyol Satanás ex e ok meltzʼaj tiʼj Jehová.
-
Tuʼnju mintiʼ nimen Adán ex Eva te Jehová, oktz il kyxol kykyaqil xjal, tzaj yajbʼil ex kyimen.
-
Kʼelel tiʼn Jehová yajbʼil, il ex kamik. Che okel xjal juntl maj te tzʼaqli ex che anqʼil toj Tbʼanel Najbʼil.
6. In kux choʼn toj tanmi Jehová aj ttzaj nya bʼaʼn qiʼj
¿Mintiʼpe in ximen Dios qiʼj aj ttzaj jun nya bʼaʼn qiʼj? Qʼonka twitza tiʼjju kubʼ ttzʼibʼin aj kawil David ex apóstol Pedro. Kyuʼjinktze Salmo 31:7 ex 1 Pedro 5:7, ex che yoline tiʼj xjel lu:
-
Aj tel qnikʼ tiʼj qa in ximen Jehová qiʼj aj qikʼ toj nya bʼaʼn ex in kux choʼn toj tanmi, ¿tiʼ in kubʼ tnaʼna tuʼn jlu?
7. Kbʼel tnajsaʼn Jehová tkyaqilju in tzaj tiʼn nya bʼaʼn qiʼj
Kyuʼjinktze Isaías 65:17 ex Apocalipsis 21:3 ex 4. Yajxitl che yoline kyiʼj xjel lu:
-
In tzaj ttziyen Jehová qa kʼelel tiʼn tkyaqilju in tzaj tiʼn nya bʼaʼn kyiʼj xjal. ¿In xipe qʼuqbʼaʼn tkʼuʼja tuʼn jlu? ¿Tiquʼn?
¿Ojtzqiʼn jlu tuʼna?
Tej tqʼama Satanás tnejel nya ax tok yol tiʼj Jehová, tqʼama qa nya tbʼanel aj Kawil te ex qa nya tzʼaqli kyukʼil xjal. Toj ambʼil aju yolin nya bʼaʼn tiʼj tbʼi Jehová. Toj chʼintl ambʼil, kʼelel tiʼn Jehová tkyaqil nya bʼaʼn in tzaj kyiʼj xjal ex kʼokel tqʼoʼn tbʼi te saq. Toj juntl yol, kbʼel tyekʼin qa a Tkawbʼil mas tbʼanel. Ex aju tuʼn tok tbʼi te saq, atzunju mas nim toklen tibʼaj tkyaqil (Mateo 6:9, 10).
AJU IN TZAJ KYQʼAMAʼN JUNJUN XJAL: «In tzaj nya bʼaʼn qiʼj tuʼnju in qo ok tqʼoʼn Dios toj prueba».
-
¿Tiʼ teya t-ximbʼetz tiʼj jlu?
TOJ CHʼIN YOL
In tzaj nya bʼaʼn kyiʼj xjal tuʼnju mintiʼ nimen Satanás, Adán ex Eva te Jehová. In tzaj nim tbʼis Jehová aj tok tkeʼyin qa in tzaj nim nya bʼaʼn qiʼj ex chʼix tpon ambʼil tuʼn tel tiʼn tkyaqil jlu.
Aju ma qo yolin tiʼj
-
¿Alkye nya ax tok yol xi tqʼamaʼn Tajaw il te Eva?
-
¿Tiʼ o tzaj qiʼj tuʼnju mintiʼ nimen Adán ex Eva te Jehová?
-
¿Tiquʼn in xi qqʼamaʼn qa in tzaj tbʼis Jehová aj ttzaj nya bʼaʼn qiʼj?
OJTZQINKA CHʼINTL
Bʼaʼn tuʼn tel tnikʼa tiʼj tiʼ t-xilen il toj Tyol Dios.
Uʼjinktza chʼintl tqanil tiʼjju tqʼama Satanás toj jardín te Edén.
«¿Tiquʼn in tzaj tqʼoʼn Dios ambʼil tuʼn qikʼ toj yajbʼil?» (Aju Xqʼuqil, 1 te enero te 2014)
Bʼaʼn tuʼn tel tnikʼa tiʼj jun xjel aju in tzaj tqʼuqbʼaʼn qkʼuʼj.
Ojtzqinka tiʼ el tnikʼ jun xjal tiʼj aju ok weʼ twitz nim yajbʼil.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
