¿Ope kyim jun xjal kʼujlaʼn tuʼna? Toj ambʼil aju bʼalo kubʼ t-xjelina jlu: «¿Kxeʼlpe anqʼil toj juntl lugar? ¿Kʼokelpe nqʼoʼne nwitze tiʼj juntl maj?». Toj xnaqʼtzbʼil lu ex toj juntl, kʼelel qnikʼ tiʼj tbʼanel tzaqʼwebʼil in tzaj tqʼoʼn Tyol Dios kyiʼj xjel lu.

1. ¿Kukxpe in che anqʼin xjal aj kykyim?

Ok tmojbʼaʼn Jesús kyimen moqa kamik ik tzeʼn aj ttzaj nim qwatl. ¿Tojpe tumel tuʼnju ok tmojbʼaʼn Jesús kyimen tukʼilju aj ttzaj qwatl? Toj tumel. Aj tikʼ jtan jun xjal, mintiʼ in nok tqʼoʼn twitz tiʼjju in bʼaj ttxlaj. Ax jlu in bʼaj aj tkyim jun xjal, ya mintiʼ in tnaʼn kʼixkʼoj. In tzaj tqʼamaʼn Tyol Dios jlu: «Atzun qe xjal kyimni qe, mintiʼ bʼaʼn kyuʼn» (uʼjinktza Eclesiastés 9:5).

2. ¿Tzeʼn in nonin qiʼj aj tel qnikʼ tiʼj axix tok kyiʼj kyimni?

Ateʼ nim xjal in che tzaj xobʼ tuʼn kykyim ex in che tzaj xobʼ kye kyimni. Pero aj tel qnikʼ tiʼjju in tzaj t-xnaqʼtzaʼn Tyol Dios kyiʼj kyimni, in qeʼ qkʼuʼj tuʼn. Tqʼama Jesús jlu: «Che tzoqpetele tuʼnju yol axix tok» (Juan 8:​32). In tzaj kyxnaqʼtzaʼn junjun okslabʼil qa mintiʼ in naj t-espíritu jun xjal aj tkyim ex qa in xiʼ anqʼil toj juntl lugar, noqtzun tuʼnj, mintiʼ in tzaj t-xnaqʼtzaʼn Tyol Dios jlu. Aj tkyim jun xjal, ya mintiʼ in nikʼx kʼixkʼoj tuʼn ex ya mlay tzʼok tbʼinchaʼn nya bʼaʼn qiʼj. Tuʼntzunju, mintiʼ tuʼn qkʼulin kywitz kyimni ex mintiʼ tuʼn tbʼant junjun tiʼ quʼn kyiʼj.

Ateʼ junjun in tzaj kyqʼamaʼn qa jaku che yolin kyukʼil kyimni, pero nya ax tok jlu, tuʼnju ma tzʼel qnikʼ tiʼj qa «mintiʼ bʼaʼn kyuʼn» kyimni. Aqeju xjal in kubʼ kyximen qa in che yolin kyukʼil toj kyja o che kyim, bʼalo atz in che yolin kyukʼil nya bʼaʼn anjel moqa demonio in nok kyqʼoʼn kyibʼ te xjal. Tuʼntzunju, aj tel qnikʼ tiʼjju in bʼaj kyiʼj xjal otoqxi che kyim, mlay qo kubʼ sbʼuʼn kyuʼn nya bʼaʼn anjel. In tzaj tqʼamaʼn Jehová qe tuʼn miʼn qyolin kyukʼil kyimni, tuʼnju jaku tzʼok bʼinchaʼn nya bʼaʼn qiʼj kyuʼn nya bʼaʼn anjel (uʼjinktza Deuteronomio 18:​10-​12).

3. Aju in bʼaj qiʼj aj qkyim

Twitz tkyaqil Txʼotxʼ at junxichaq xnaqʼtzbʼil nimen kyuʼn xjal tiʼjju in bʼaj qiʼj aj qkyim. Noqtzun tuʼnj, nya ax tok qe xnaqʼtzbʼil lu.

• ¿Alkyeqe xnaqʼtzbʼil nimen kyuʼn xjal kyiʼj kyimni atz jatumel najliya?

 4. In qo tzaqpaj tuʼn axix tok xnaqʼtzbʼil kyiʼj kyimni

Aj tel qnikʼ tiʼj axix tok xnaqʼtzbʼil tiʼj kyimen, ya mlay qo tzaj xobʼ kywitz kyimni. Kyuʼjinktze Eclesiastés 9:​10 ex che yoline tiʼj xjel lu:

• ¿Jakupe tzʼok kybʼinchaʼn kyimni nya bʼaʼn qiʼj?

Aj tel qnikʼ tiʼjju in tzaj t-xnaqʼtzaʼn Tyol Dios, in nonin qiʼj tuʼn miʼn qkʼulin kywitz kyimni ex tuʼn miʼn qnaʼn Dios kyiʼj. Kyuʼjinktze Isaías 8:​19 ex Apocalipsis 4:​11, ex che yoline tiʼj xjel lu:

• ¿Tiʼ in kubʼ tnaʼn Jehová aj tkʼulin jun xjal kywitz kyimni moqa aj tjyon onbʼil kyukʼil?

5. In tzaj qʼuqbʼaʼn qkʼuʼj aj tel qnikʼ tiʼjju in bʼaj kyiʼj kyimni

In xi xnaqʼtzaʼn kye nimku xjal qa kbʼel qʼoʼn kykastiw aj kykyim tuʼnju in kubʼ kybʼinchaʼn nim nya bʼaʼn. Pero in chewix qkʼuʼj aj tel qnikʼ tiʼj qa mintiʼ in nikʼx kʼixkʼoj kyuʼn xjal o che kyim, nix qeju o kubʼ kybʼinchaʼn nim nya bʼaʼn. Kyuʼjinktze Romanos 6:7 ex che yoline tiʼj xjel lu:

• In tzaj t-xnaqʼtzaʼn Tyol Dios qa aj tkyim jun xjal in chjet til. Tuʼntzunju, ¿jakupe tqʼamaya qa in nikʼx kʼixkʼoj kyuʼn xjal o che kyim tuʼntzun tchjet kyil?

Qa mas ma tzʼok qojtzqiʼn Jehová, mas kʼelel qnikʼ tiʼj qa mlay txi tqʼoʼn ambʼil tuʼn tikʼx kʼixkʼoj kyuʼn xjal o che kyim. Kyuʼjinktze Deuteronomio 32:4 ex 1 Juan 4:8, ex che yoline kyiʼj xjel lu:

• Qa ik tmod Dios ik tzeʼn in tzaj qʼamaʼn kyoj versículo lu, ¿jakupe tzaj tqʼoʼn ambʼil tuʼn kykux qʼoʼn kyimni toj qʼaqʼ?

• Tiʼ teya t-ximbʼetz, ¿in tzajpe qʼuqbʼaʼn qkʼuʼj aj tel qnikʼ tiʼjju in bʼaj kyiʼj xjal otoqxi che kyim? ¿Tiquʼn?

 TOJ CHʼIN YOL

Aj tkyim jun xjal, atz in bʼaj tchwinqlal moqa tanqʼibʼil. Mintiʼ in nikʼx kʼixkʼoj kyuʼn kyimni ex mlay tzʼok kybʼinchaʼn nya bʼaʼn kyiʼj xjal.

Aju ma qo yolin tiʼj

• ¿Kukxpe in nanqʼin jun xjal aj tkyim?

• ¿Tzeʼn in qo tzaqpaj aj tel qnikʼ tiʼj axix tok xnaqʼtzbʼil kyiʼj kyimni?

• ¿Tzeʼn in tzaj qʼuqbʼaʼn qkʼuʼj aj tel qnikʼ tiʼjju in bʼaj kyiʼj kyimni?