In tzaj nim qbʼis aj tkyim jun toj qja. Tuʼntzunju, in tzaj tqʼamaʼn Tyol Dios qa jun aj qʼoj kyimen moqa kamik qiʼj (1 Corintios 15:​26). El qnikʼ tiʼj toj xnaqʼtzbʼil 27 qa kʼelel tiʼn Jehová kyimen. Noqtzun tuʼnj, ¿tiʼtzun kbʼajel kyiʼj xjal ya o che kyim? Toj xnaqʼtzbʼil lu kʼelel tnikʼa tiʼjju in tzaj ttziyen Jehová tuʼn tbʼant tuʼn: ok che jawil anqʼin nim millón xjal tuʼn tuʼntzun kyanqʼin te jumajx. ¿Axpe tok kbʼajel jlu? ¿Jatumel che jawil anqʼin? ¿Tojpe kyaʼj moqa tzalu twitz Txʼotxʼ?

1. ¿Tiʼ in tzaj ttziyen Jehová kyiʼj qe toj qja o che kyim?

Taj Jehová tuʼn t-xi tqʼoʼn juntl maj kychwinqlal xjal o che kyim. Attoq nim qʼuqbʼil tkʼuʼj Job, tuʼn jlu ok qeʼ tkʼuʼj tiʼj qa mlaytoq tzʼel naj tiʼj tkʼuʼj Jehová aj tkyim ex aj tten toj muqbʼil. Xi tqʼamaʼn jlu te Dios: «Jakulo chin txkete tuʼna ex jakulo txi ntzaqʼweʼne» (uʼjinktza Job 14:​13-​15).

2. ¿Tiquʼn ojtzqiʼn quʼn qa ok che jawil anqʼin kyimni?

Tej tten Jesús twitz Txʼotxʼ, xi tqʼoʼn Jehová tipumal tuʼn kyjaw anqʼin kyimni tuʼn. Jun techel, jaw anqʼin jun txin tuʼn te 12 abʼqʼi ex aju tal jun xuʼj viud (Marcos 5:​41, 42; Lucas 7:​12-​15). Yajxitl kyim Lázaro, aju tamiw Jesús. Maske ya qʼiʼntoq kyaje qʼij tuʼn toj muqbʼil, jaw anqʼin tuʼn Jesús. Tej otoqxi bʼaj naʼn Jesús Dios, xi tkeʼyin jatumel maquʼn Lázaro ex jaw schʼin: «Tetza, Lázaro». «Etztzun aju otoq kyim» ex ¡itzʼtoq taʼ! (Juan 11:​43, 44). ¡Noqpe ximana tiʼjju tzalajbʼil kubʼ kynaʼn toj tja Lázaro ex qe tamiw!

3. ¿Okpe che jawil anqʼin qe toj tjaya o che kyim?

In tzaj ttziyen Tyol Dios jlu: «Ok che jawil anqʼin qe kyimni» (Hechos 24:​15). Kykyaqil qe xjal e jaw anqʼin tuʼn Jesús, mintiʼ e xiʼ toj kyaʼj (Juan 3:​13). Sino kykyaqilx e tzalaj tej kyjaw anqʼin tzalu twitz Txʼotxʼ. Toj chʼintl ambʼil, ateʼ nim millón che tzalajel aj kyjaw anqʼin juntl maj tuʼn kyanqʼin te jumajx tzalu twitz Txʼotxʼ aj tok te jun paraíso. Tqʼama Jesús jlu: «Kykyaqil xjal maquʼn tuj camposant ok kybʼiʼ tqʼajqʼajel nwiʼye», toj juntl yol, ok che jawil anqʼin qeju xjal ateʼ toj t-ximbʼetz Dios, axpe ikx qeju mintiʼ in che tzaj naʼn kyuʼn xjal (Juan 5:​28, 29).

 QO JYON MAS TQANIL

4. Kubʼ tyekʼin Jesús qa jaku che jaw anqʼin kyimni tuʼn

Ojtzqinka tiʼ mas bʼant tuʼn Jesús tej tonin tiʼj Lázaro. Kyuʼjinktze Juan 11:​14 ex 38 a 44, ex che yoline kyiʼj xjel lu:

• ¿Tzeʼn ojtzqiʼn quʼn qa axix tok otoq kyim Lázaro? (Kyqʼonke kywitze tiʼj versículo 39).

• Noqwit xiʼ Lázaro toj kyaʼj tej tkyim, ¿tojpe tumel tuʼnju kutz tiʼn Jesús juntl maj tzalu twitz Txʼotxʼ?

Kyqʼonke kywitze tiʼj VIDEO.

5. ¡Ok che jawil anqʼin nimku xjal!

Kyuʼjinktze Salmo 37:​29 ex che yoline tiʼj xjel lu:

• ¿Jatumel che anqʼil nim millón xjal aj kyjaw anqʼin?

Nya oʼkx che jawil anqʼin tmajen Jehová tuʼn Jesús, sino ax ikx qeju mintiʼ e ajbʼen te. Kyuʼjinktze Hechos 24:​15 ex che yoline tiʼj xjel lu:

• Aj kyjaw anqʼin xjal o che kyim, ¿alkye xjal taja tuʼn tok tqʼoʼna twitza tiʼj?

• Tuʼnju ok che jawil anqʼin xjal o che kyim, ¿tzeʼn o txi tqʼuqbʼaʼn jlu kykʼuʼj ttat Phelicity?

 TOJ CHʼIN YOL

In tzaj ttziyen Tyol Dios qa ok che jawil anqʼin nim millón xjal. Taj Jehová tuʼn kyjaw anqʼin xjal tuʼn ex o txi tqʼoʼn tipumal Jesús tuʼn tbʼant jlu tuʼn.

Aju ma qo yolin tiʼj

• ¿Tzeʼn ojtzqiʼn quʼn qa taj Jehová ex Jesús tuʼn kyjaw anqʼin xjal?

• ¿Jatumel che anqʼil qeju nim millón xjal ok che jawil anqʼin? ¿Tojpe kyaʼj moqa tzalu twitz Txʼotxʼ? ¿Tiquʼn in kubʼ t-ximana jlu?

• ¿Tiquʼn in nok qeʼ tkʼuʼja tiʼj qa ok che jawil anqʼin qe toj tjaya o che kyim?