XNAQʼTZBʼIL 32
¡Ya in kawin Tkawbʼil Dios!
Tzaj tzyet tuʼn tkawin Tkawbʼil Dios toj abʼqʼi 1914. Tojx abʼqʼi aju tzaj tzyet mankbʼil moqa bʼajsbʼil tqʼijlalil tuʼn kykawin xjal tzalu twitz Txʼotxʼ. ¿Tzeʼn ojtzqiʼn quʼn? Tnejel, kʼelel qnikʼ tiʼjju kyaj qʼamaʼn toj Tyol Dios ex tkabʼin, kʼelel qnikʼ tiʼjju in bʼaj twitz Txʼotxʼ toj ambʼil jaʼlo ex tzeʼn kymod xjal in kubʼ kyyekʼin atxix tej ttzaj tzyet abʼqʼi 1914.
1. ¿Tiʼ kyaj qʼamaʼn toj Tyol Dios?
Kyaj qʼamaʼn toj uʼj te Daniel qa kxeltoq tzyet tuʼn tkawin Tkawbʼil Dios aj tkubʼaj jun ambʼil te «wuq abʼqʼi» (Daniel 4:16, 17). Tej tbʼet ambʼil, yolin Jesús tiʼj ambʼil lu ik tzeʼn «tqʼijlalil tuʼn kykawin qe nasyon mya judiy qe» ex tqʼama qa naʼmxtoq tkubʼaj ambʼil lu (Lucas 21:24). Ik tzeʼn kʼelel qnikʼ tiʼj, e kubʼaj qeju wuq abʼqʼi toj 1914.
2. Atxix toj 1914, ¿tiʼ o bʼaj twitz tkyaqil Txʼotxʼ ex tzeʼn kymod xjal o ten?
Xi kyqanin t-xnaqʼtzbʼen Jesús jlu: «¿Alkye señ tzul chʼixtoq tula ex chʼixtoq tjapun bʼaj tqʼijlalil?» (Mateo 24:3). Xi tqʼamaʼn Jesús junjun tiʼchaq kye aju kbʼajeltoq aj t-xi tzyet tuʼn tkawin toj Tkawbʼil Dios. Xi tqʼamaʼn kye qa kʼokeltoq kyqʼoʼn kywitz kyiʼj qʼoj, terremoto ex weʼyaj (uʼjinktza Mateo 24:7). Ax ikx, kyaj tqʼamaʼn Tyol Dios qa «tzul nim yajbʼil» tuʼn kymod xjal kbʼel kyyekʼin «tuj mankbʼil tqʼijlalil» (2 Timoteo 3:1-5). Ex atxix toj 1914, mas in nel toj qʼanchaʼl tzeʼn kymod xjal at ex alkyeqe tiʼchaq in che bʼaj.
3. ¿Tiquʼn o tzaj nim nya bʼaʼn twitz tkyaqil Txʼotxʼ atxix tej ttzaj tzyet tuʼn tkawin Tkawbʼil Dios?
Tej tikʼ chʼin ambʼil t-xilen qʼoʼn toklen Jesús te aj Kawil toj Tkawbʼil Dios, ok jun qʼoj toj kyaʼj, qʼojin Jesús tiʼj Satanás ex kyiʼj nya bʼaʼn anjel. Mintiʼ kambʼan Satanás ex in tzaj tqʼamaʼn Tyol Dios qa «kuʼtz xoʼn twitz txʼotxʼ, ex kyukʼix qe t-anjel e kuʼtz xoʼn tukʼil» (Apocalipsis 12:9, 10, 12). Ojtzqiʼn tuʼn Satanás qa chʼix tkubʼ najsaʼn te jumajx, tuʼntzunju, at nim tqʼoj ex in nok tbʼinchaʼn nim nya bʼaʼn kyiʼj xjal tzalu twitz Txʼotxʼ. Noqtzun tuʼnj, kʼelel tiʼn Tkawbʼil Dios tkyaqil nya bʼaʼn.
QO JYON MAS TQANIL
Qo xnaqʼtzan tiʼj tiquʼn in xi qqʼamaʼn qa tzaj tzyet tuʼn tkawin Tkawbʼil Dios toj abʼqʼi 1914 ex kʼelel qnikʼ tiʼj tzeʼn jaku tzʼonin jlu qiʼj.
4. E japun qe tajlal ambʼil in tzaj tqʼamaʼn Tyol Dios toj abʼqʼi 1914
Ok jun twitzikʼ aj kawil te Babilonia tuʼn Dios, aju Nabucodonosor tbʼi. Tej ttzaj tchikʼbʼaʼn Daniel tiʼ t-xilen twitzikʼ, tzaj tqʼamaʼn qa in yolin profecía lu tiʼj tkawbʼil Nabucodonosor ex tiʼj Tkawbʼil Dios (kyuʼjinktze Daniel 4:17). a
Kyuʼjinktze Daniel 4:20 a 26 ex jaku tzʼajbʼen diagrama kyuʼne tuʼn kyyoline kyiʼj xjel lu:
-
A) ¿Tiʼ ok tkeʼyin Nabucodonosor toj twitzikʼ? (Kyqʼonke kywitze tiʼj versículo 20 ex 21).
-
B) ¿Tiʼtoq tuʼn tbʼaj tiʼj tzeʼ? (Kyqʼonke kywitze tiʼj versículo 23).
-
C) ¿Tiʼtoq kbʼajel aj kykubʼaj qeju wuq abʼqʼi? (Kyqʼonke kywitze tiʼj versículo 26).
Aju witzikʼ tiʼjju tzeʼ ex aju Tkawbʼil Dios
PROFECÍA (Daniel 4:20-36)
Tej tkawin
A) Jun tzeʼ nim tweʼ
Tej ya mintiʼ kawin
B) «Kytxʼemin jawe tzeʼ» ex e tikʼ «wuq abʼqʼi»
Tej tkawin juntl maj
C) Kxel qʼoʼn toklena juntl maj
Tej tjapun twiʼ tnejel maj
-
D) ¿Alkye kubʼ techlaʼn tzeʼ? (Kyqʼonke kywitze tiʼj versículo 22).
-
E) ¿Toj alkye ambʼil ya mintiʼ kawin? (Kyuʼjinktze Daniel 4:29 a 33).
-
F) ¿Tiʼ bʼaj tej otoq tzikʼ «wuq abʼqʼi»? (Kyuʼjinktze Daniel 4:34 a 36).
TEJ TJAPUN TWIʼ TNEJEL MAJ
Tej tkawin
D) Nabucodonosor, aju aj kawil te Babilonia.
Tej ya mintiʼ kawin
E) Tej tkubʼaj abʼqʼi 606 t.a.j. b el tzpet tnabʼil Nabucodonosor ex ya mintiʼ kawin kyoj wuq abʼqʼi.
Tej tkawin juntl maj
F) Ten tnabʼil Nabucodonosor juntl maj ex xi tzyet tuʼn tkawin.
Tej tjapun twiʼ tkabʼin maj
-
G) ¿Alkyeqe kubʼ techlaʼn tzeʼ? (Kyuʼjinktze 1 Crónicas 29:23).
-
H) ¿Toj alkye ambʼil ya mintiʼ e kawin? ¿Tzeʼn ojtzqiʼn quʼn qa mintiʼtoq in che kawin tej tten Jesús tzalu twitz Txʼotxʼ? (Kyuʼjinktze Lucas 21:24).
-
I) ¿Jatumel ex toj alkye ambʼil tzaj tzyet tuʼn tkawin juntl maj kawbʼil lu?
TEJ TJAPUN TWIʼ TKABʼIN MAJ
Tej tkawin
G) Kubʼ kyechlaʼn aj kawil te Israel Tkawbʼil Dios.
Tej ya mintiʼ kawin
H) Kubʼ xiten tnam Jerusalén toj abʼqʼi 607 t.a.j. ex ya mintiʼ jun aj kawil te Israel kawin toj 2,520 abʼqʼi.
Tej tkawin juntl maj
I) Xi tzyet tuʼn tkawin Jesús toj Tkawbʼil Dios toj abʼqʼi 1914.
¿Jteʼtzun ambʼil aju wuq abʼqʼi?
In che onin junjuntl uʼj toj Tyol Dios tuʼn tel qnikʼ tiʼj junjuntl uʼj tkuʼx toj. Jun techel, in tzaj qʼamaʼn toj uʼj te Apocalipsis qa aqeju oxe abʼqʼi tukʼil nikʼjan moqa mij, atz in yolin tiʼj 1,260 qʼij (Apocalipsis 12:6, 14). Atzun qeju wuq abʼqʼi, atz in yolin tiʼj 2,520 qiʼj. At maj, in tzaj tqʼamaʼn Tyol Dios qa in nok jun qʼij te jun abʼqʼi (Ezequiel 4:6). Tuʼntzunju, aqeju wuq abʼqʼi in yolin uʼj te Daniel tiʼj atz in yolin tiʼj 2,520 abʼqʼi.
5. Chʼexpaj tkyaqil toj abʼqʼi 1914
Kyaj tqʼamaʼn Jesús tiʼtoq tuʼn tbʼaj twitz Txʼotxʼ aj t-xi tzyet tuʼn tkawin. Kyuʼjinktze Lucas 21:9 a 11 ex che yoline tiʼj xjel lu:
-
Ik tzeʼn ma tzaj qʼamaʼn toj texto lu, ¿alkye junjun tiʼ o tzʼok tbʼiʼna moqa o tzʼok tqʼoʼna twitza tiʼj?
Tqʼama apóstol Pablo tiʼ kymod xjal tuʼn tten kyoj bʼajsbʼil tqʼijlalil akux in che kawin xjal. Kyuʼjinktze 2 Timoteo 3:1 a 5 ex che yoline tiʼj xjel lu:
-
Ik tzeʼn saj qʼamaʼn toj texto, ¿alkyeqe kymod xjal o tzʼok tqʼoʼna twitza tiʼj?
6. Tzʼok tilil quʼn tuʼnju ya in kawin Tkawbʼil Dios
Kyuʼjinktze Mateo 24:3 ex 14, yajxitl che yoline kyiʼj xjel lu:
-
¿Alkye aqʼuntl nim toklen in tzaj tyekʼin qa ya in kawin Tkawbʼil Dios?
-
¿Tzeʼn jaku tzʼonin teya tiʼj aqʼuntl lu?
Ya o txi tzyet tuʼn tkawin Tkawbʼil Dios ex toj chʼintl ambʼil ok kkawil tibʼaj tkyaqil Txʼotxʼ. Kyuʼjinktze Hebreos 10:24 ex 25, yajxitl che yoline tiʼj xjel lu:
-
Tuʼnju «in laqʼex ttzaj tqʼijlalil» Jehová, ¿tiʼ il tiʼj tuʼn tbʼant quʼn qkyaqilx?
Noqwit jaku tzʼonina kyiʼj xjal tuʼn kyklet, ¿tiʼtzun jaku bʼant tuʼna?
AJU IN KUBʼ KYXJELIN JUNJUN XJAL: «¿Tiquʼn oʼkx in che yolin testigos de Jehová tiʼj abʼqʼi 1914?».
-
¿Tiʼ jaku txi ttzaqʼweʼna?
TOJ CHʼIN YOL
Ma tzʼel qnikʼ tiʼj qa ya in kawin Tkawbʼil Dios tuʼnju ya in che japun twiʼ profecía ateʼ toj Tyol Dios ex tuʼnju in bʼaj twitz Txʼotxʼ toj ambʼil jaʼlo. Ex in kubʼ qyekʼin qa axix tok jlu tuʼnju in qo pakbʼan tiʼj Kawbʼil lu ex in qo ten kyoj chmabʼil.
Aju ma qo yolin tiʼj
-
¿Tiʼ bʼaj tej kykubʼaj wuq abʼqʼi kyaj qʼamaʼn toj uʼj te Daniel?
-
¿Tiquʼn in nok qeʼ tkʼuʼja tiʼj qa xi tzyet tuʼn tkawin Tkawbʼil Dios toj abʼqʼi 1914?
-
¿Tzeʼn jaku kubʼ tyekʼina qa ya in kawin Tkawbʼil Dios?
OJTZQINKA CHʼINTL
Ojtzqinka tiʼ o tzaj kyqʼamaʼn junjun aj xnaqʼtzal tiʼj tzeʼn o chʼexpaj twitz tkyaqil Txʼotxʼ atxix toj abʼqʼi 1914.
«Aju ambʼil tej tchʼexpaj kyximbʼetz xjal tiʼjju bʼaʼn» (¡Weʼktza!, abril te 2007)
Bʼaʼn tuʼn tel tnikʼa tiʼj tzeʼn chʼexpaj tanqʼibʼil jun xjal tej tel tnikʼ tiʼj profecía tkuʼx toj Mateo 24:14.
¿Tzeʼn ojtzqiʼn quʼn qa at toklen profecía tkuʼx toj capítulo 4 toj uʼj te Daniel tukʼil Tkawbʼil Dios?
¿Alkye yekʼbʼil at tiʼj qa e kubʼaj qeju «wuq abʼqʼi» in tzaj qʼamaʼn toj capítulo 4 toj uʼj te Daniel toj abʼqʼi 1914?
a Uʼjinktza qe kabʼe mankbʼil xnaqʼtzbʼil at toj plaj «Ojtzqinka chʼintl», aju at toj xnaqʼtzbʼil lu.
b In che ajbʼen letra t.a.j. quʼne tuʼn t-xi qqʼamaʼne tjaqʼxi ambʼil qʼiʼn quʼn jaʼlo. Ex in che ajbʼen letra a. j. quʼne tuʼn qyoline tiʼj ambʼil qʼiʼn quʼn jaʼlo.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
