Ya in kawin Tkawbʼil Dios ex toj chʼintl ambʼil kbʼantel junjun matij chʼixpubʼil tuʼn tzalu twitz Txʼotxʼ. Qo xnaqʼtzan kyiʼj junjun tbʼanel tiʼchaq kbʼantel tuʼn Tkawbʼil Dios aju jaku yona tiʼj tukʼil nim tzalajbʼil.

1. ¿Tiʼ kbʼantel tuʼn Tkawbʼil Dios tuʼn tten juntl maj mujbʼabʼil tzalu twitz Txʼotxʼ ex tuʼn t-xi bʼinchet aju tzʼaqli?

Tuʼnju a Jesús aj Kawil toj Tkawbʼil Dios, che kbʼel tnajsaʼn qe nya bʼaʼn xjal ex qe aj kawil toj qʼoj Armagedón (Apocalipsis 16:​14, 16). Aj tbʼaj jlu, kjapunel twi profecía lu: «Noq chʼintl taj tuʼn kykubʼ naj qeju mya bʼaʼn» (Salmo 37:​10). Ex noq tuʼn Kawbʼil lu, ktel mujbʼabʼil tuʼn Jesús twitz Txʼotxʼ ex kxel bʼinchet kyiʼj tiʼchaq toj tumel (uʼjinktza Isaías 11:4).

2. ¿Tzeʼn kyanqʼibʼil xjal ktel aj tjapun twi t-ximbʼetz Dios tiʼj Txʼotxʼ?

Aj tkawin Tkawbʼil Dios, aqeju «xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:​29). ¡Noqpe ximana tiʼj tzalajbʼil kbʼel qnaʼn aj kyok kykyaqil xjal te tbʼanel, aj tok kykʼujlaʼn Jehová ex aj tkubʼ kyyekʼin kykʼujlabʼil kyxolx! Ni jun xjal ktzajel yabʼil tiʼj ex kykyaqil che anqʼil te jumajx.

3. ¿Tiʼ mas kbʼantel tuʼn Tkawbʼil Dios aj tkubʼ tnajsaʼn qe nya bʼaʼn xjal?

Aj kykubʼ najsaʼn qe nya bʼaʼn xjal, kkawil Jesús toj mil abʼqʼi. Toj ambʼil aju, kʼonil Jesús ex qeju 144,000 che kawil tukʼil tuʼn kytzaqpaj xjal tiʼj il ex tuʼn kyok te tzʼaqli. Aj tkubʼaj ambʼil lu, ya otoq tzʼok Txʼotxʼ te jun paraíso, jatumel che anqʼil xjal toj tzalajbʼil tuʼnju kxel kybʼiʼn tley Jehová. Aj tbʼant tkyaqil jlu, kʼajel tqʼoʼn Jesús juntl maj Kawbʼil te Jehová. Tojtzun ambʼil aju, kʼokel tbʼi Jehová te xjan (Mateo 6:​9, 10). Iktzun tten kʼelel toj qʼanchaʼl qa jun tbʼanel aj Kawil te Jehová ex qa in xqʼuqin tiʼj ttnam. Yajxitl, kbʼel tnajsaʼn Jehová Satanás, qe demonio ex alkyexku juntl xjal kʼokel meltzʼaj tiʼj Tkawbʼil (Apocalipsis 20:​7-​10). Tkyaqilju kbʼantel tuʼn Tkawbʼil Dios ktel te jumajx.

 QO JYON MAS TQANIL

4. Kbʼel tnajsaʼn Tkawbʼil Dios kykawbʼil xjal

In tzaj tqʼamaʼn Tyol Dios qa o ten tipumal xjal «tuʼn tbʼinchante mya bʼaʼn tiʼj juntl» (Eclesiastés 8:9). Tuʼntzunju, kʼajbʼel Tkawbʼil Jehová tuʼn t-xi tbʼinchaʼn tiʼj tkyaqil nya bʼaʼn o tzaj tuʼn kykawbʼil xjal.

Kyuʼjinktze Daniel 2:​44 ex 2 Tesalonicenses 1:6 a 8, ex che yoline kyiʼj xjel lu:

• ¿Tiʼ kbʼantel tuʼn Jehová ex tuʼn Jesús kyiʼj aj kawil ex qeju in che onin kyiʼj?

• ¿Tiquʼn jaku tzʼok qeʼ tkʼuʼja tiʼj qa kxel tbʼinchaʼn Jehová ex Jesús kyiʼj tiʼchaq toj tumel?

5. Jun tbʼanel aj Kawil Jesús

Tuʼnju a Jesús aj Kawil toj Tkawbʼil Dios, tzul tiʼn nim kʼiwlabʼil kyibʼaj xjal tzalu twitz Txʼotxʼ. Kyqʼonke kywitze tiʼj VIDEO tuʼn tok kyojtzqiʼne tzeʼn kubʼ tyekʼin Jesús qa taj tuʼn tonin kyiʼj xjal ex qa o txi qʼoʼn tipumal tuʼn Dios tuʼn tbʼant tuʼn.

Kyuʼn milagr bʼant tuʼn Jesús tej tten tzalu twitz Txʼotxʼ, kubʼ tyekʼin tiʼ kbʼantel tuʼn Tkawbʼil Dios. Kyxol qeju tziybʼil kʼokel tqʼoʼna twitza tiʼj, ¿alkyeqe taja tuʼn tjapun kywiʼ? Kyuʼjinktze kykyaqil qe texto jatumel ateʼkux promesa lu.

6. Ktel jun tbʼanel qanqʼibʼil toj ambʼil tzul tjaqʼ Tkawbʼil Dios

 TOJ CHʼIN YOL

Aj tkawin Tkawbʼil Dios, kjapunel tkyaqilju in kubʼ t-ximen Jehová. Ax ikx, kʼokel Txʼotxʼ te jun tbʼanel najbʼil jatumel che anqʼil tbʼanel xjal ex che ajbʼel te Jehová te jumajx.

Aju ma qo yolin tiʼj

• ¿Tiʼ kbʼantel tuʼn Tkawbʼil Jehová tuʼn tok tbʼi te xjan?

• ¿Tiquʼn qʼuqli qkʼuʼj tiʼj qa che japunel qe profecía ateʼkux toj Tyol Dios?

• Kyxol qeju tiʼchaq kbʼantel tuʼn Tkawbʼil Dios, ¿alkye taja tuʼn tok tqʼoʼna twitza tiʼj?