Tej qkubʼ tbʼinchan Jehová, tzaj tqʼoʼn jun tbʼanel oyaj qe, aju tuʼn qyolin. ¿In nokpe tqʼoʼn Jehová twitz tiʼj tzeʼn in najbʼen oyaj lu quʼn? In nok tqʼoʼn twitz tiʼj (uʼjinktza Santiago 1:​26). Tuʼntzunju, ¿tiʼ jaku bʼant quʼn tuʼn tjaw qnimsaʼn Jehová kyuʼn qyol?

1. ¿Tzeʼn jaku tzʼajbʼen tbʼanel oyaj lu quʼn?

In tzaj tqʼamaʼn Biblia jlu: «Kyqʼom kynabʼle kyxolxe ex kykyuwsam kynabʼle kyxolxe» (1 Tesalonicenses 5:​11). ¿Atpe jun xjal ojtzqiʼn tuʼna ex taj tuʼn t-xi tqʼuqbʼaʼna tkʼuʼj? ¿Jakupe tzʼonina tiʼj tuʼn ttzalaj? Qa ikju, qʼamanxa te alkyeqe tbʼanel tiʼchaq in bʼant tuʼn ex qʼonka toklen. ¿Atpe jun taqikʼ Tyol Dios in nul toj twiʼya tuʼn t-xi tqʼuqbʼaʼna tkʼuʼj? At nim taqikʼ Tyol Dios jaku tzʼajbʼen tuʼna. Ax ikx, bʼaʼn tuʼn ttzaj tnaʼna qa jaku kubʼ kynaʼn txqantl nya bʼaʼn kyuʼn tyola moqa jaku che tzalaj. Tuʼntzunju, tzʼok tilil tuʼna tuʼn tyolina toj tumel (Proverbios 15:1).

2. ¿Alkyeqe yol il tiʼj tuʼn kyel qikʼun?

In tzaj tqʼamaʼn Tyol Dios jlu: «Miʼn kymaye jun tkʼayil yol» (uʼjinktza Efesios 4:​29). ¿Tiʼ t-xilen jlu? A t-xilen qa mintiʼ tuʼn kyajbʼen nya bʼaʼn yol quʼn nix qeju jaku tzaj kybʼis txqantl tuʼn. Ex mintiʼ tuʼn qok ten yolil tiʼjju in bʼant kyuʼn txqantl nix tuʼn t-xi qqʼamaʼn nya ax tok yol kyiʼj (uʼjinktza Proverbios 16:​28).

3. ¿Tiʼ jaku tzʼonin qiʼj tuʼn qyolin kyiʼj tbʼanel yol?

Chʼixme tkyaqil maj, kyuʼn qyol in nel nikʼbʼaj tiʼj qximbʼetz ex tiʼjju in kubʼ qnaʼn (Lucas 6:​45). Tuʼntzunju, il tiʼj tuʼn qximen kyiʼj tbʼanel tiʼchaq, toj juntl yol, kyiʼj tiʼchaq tzʼaqli, saq ex qeju jaku chʼiy qkʼujlabʼil kyuʼn (Filipenses 4:8). Tuʼn tbʼant jlu quʼn, nim toklen tuʼn qximen tiʼj tiʼ in nok qkeʼyin, tiʼ in nok qbʼiʼn, tiʼ in jaw quʼjin ex alkyeqe qamiw ateʼ (Proverbios 13:​20). Ex naʼmxtoq t-xi qqʼamaʼn jun tiʼ, bʼaʼn tuʼn qximen tiʼj tiʼ kbʼel kynaʼn txqantl tuʼn. In tzaj tqʼamaʼn Biblia jlu: «At xjal in kʼixbʼisan tiʼj juntl kyuʼn qe tyol, atzun kyyol qe xjal at kynabʼl nnoʼk te qʼanbʼil kye txqantl» (Proverbios 12:​18).

 QO JYON MAS TQANIL

4. Bʼaʼn tuʼn tok t-xqʼuqina aju in xi tqʼamaʼna

Qkyaqilx in xi qqʼamaʼn jun tiʼ ex yajxitl in tzaj qbʼis tuʼn (Santiago 3:2). Kyuʼjinktze Gálatas 5:​22 ex 23, ex che yoline kyiʼj xjel lu:

• Tuʼn tok t-xqʼuqina aju in xi tqʼamaʼna ex tzeʼn in xi tqʼamaʼna, ¿alkyeqe mod taja tuʼn t-xi tqanina te Jehová aj tnaʼna Dios? ¿Tzeʼn jaku che onin mod lu tiʼja?

Kyuʼjinktze 1 Corintios 15:​33 ex che yoline kyiʼj xjel lu:

• ¿Jakupe tzʼel tkanoʼna tiʼj tzeʼn che yolin xjal in che etz yekʼin toj televisión moqa kyiʼj tamiwa? ¿Alkye tten?

Kyuʼjinktze Eclesiastés 3:​1 ex 7, ex che yoline tiʼj xjel lu:

• ¿Toj alkye ambʼil mas bʼaʼn tuʼn miʼn qyolin ex toj alkye ambʼil mas bʼaʼn tuʼn t-xi qqʼamaʼn jun tiʼ?

 5. Yolina bʼaʼn kyiʼj txqantl

6. Yolina toj tumel kyukʼil toj tjaya

 TOJ CHʼIN YOL

Jaku che tzalaj txqantl tuʼn qyol moqa jaku tzaj kybʼis. Tuʼntzunju, il tiʼj tuʼn qximen kyiʼj qyol naʼmxtoq t-xi qqʼamaʼn, jtoj kxel qqʼamaʼn ex tzeʼn kxel qqʼamaʼn.

Aju ma qo yolin tiʼj

• ¿Tzeʼn jaku che onin tyola kyiʼj txqantl?

• ¿Alkyeqe yol il tiʼj tuʼn kyel qikʼun?

• ¿Tiʼ kʼonil qiʼj tuʼn qyolin toj tumel ex kyiʼj tbʼanel tiʼchaq?