Teyele junjun qe in nok t-xbʼalumin tibʼ ik tzeʼn tgan. Jaku qo tzalaj tiʼj qxbʼalun kʼokel qqʼoʼn ex jaku tzalaj Jehová quʼn qa ma txi qbʼiʼn junjun consej in tzaj tqʼoʼn qe. Qo xnaqʼtzan kyiʼj junjun.

1. ¿Alkyeqe consej jaku che onin qiʼj aj tbʼaj qxbʼalumin qibʼ?

In tzaj tqʼamaʼn Tyol Dios tuʼn tten qnabʼil aj tbʼaj qxbʼalumin qibʼ ex aj tbʼaj qbʼinchaʼn qten. Ax ikx, nim toklen tuʼn tbʼaj qsaqin qibʼ tuʼntzun tkubʼ qyekʼin qa in qo nimen te Dios (1 Timoteo 2:​9, 10). Qqʼonk qwitz tiʼj kyaje consej in tzaj qʼoʼn qe. 1) Nim toklen tuʼn tbʼaj qxbʼalumin qibʼ toj tumel. Ik tzeʼn o tzʼok tkeʼyina kyoj chmabʼil, junxichaq tten in bʼaj kyxbʼalumin kyibʼ erman, pero in kubʼ kyyekʼin tukʼil kyxbʼalun ex tukʼilju alkye tten in bʼaj kyxyebʼin kywiʼ qa in jaw kynimsaʼn Jehová. 2) Mintiʼ tuʼn tok qqʼoʼn qxbʼalun qʼanchaʼl qxmilal toj moqa jaku tzʼok bʼaj kywitz xjal tiʼj. 3) In kubʼ qyekʼin qa at qnabʼil qa mintiʼ ma qo ok lepeʼ tiʼj akʼaj xbʼalun in netz kyuʼn xjal moqa moda. 4) Nim toklen tuʼn tkubʼ qyekʼin tukʼil qxbʼalun qa in qo nimen te Jehová tuʼntzun tel kynikʼ xjal tiʼj qa in qo ajbʼen te (1 Corintios 10:​31).

2. ¿Tiquʼn bʼaʼn tuʼn qximen kyiʼj erman aj tbʼaj qxbʼalumin qibʼ?

Qkyaqilx at qoklen tuʼn tkubʼ qximen alkye qxbʼalun kʼokel qqʼoʼn. Pero il tiʼj tuʼn tok tilil quʼn tuʼn miʼn tkubʼ kynaʼn txqantl nya bʼaʼn tuʼn jlu. Tuʼntzunju, tbʼanel tuʼn t-xi qbʼiʼn consej lu: «Teyle junjun qe qbʼincham aju bʼaʼn, tuʼn tajbʼen te jun onbʼil te qukʼil ex tuʼn ttzalaj tiʼj, ex tuʼn tchʼiy tnabʼl» (uʼjinktza Romanos 15:​1, 2).

3. ¿Tzeʼn jaku tzʼonin kyiʼj xjal aj tbʼaj qxbʼalumin qibʼ toj tumel?

In nok tilil quʼn tuʼn tbʼaj qxbʼalumin qibʼ toj tumel toj tkyaqil ambʼil, pero mas nim toklen tuʼn tbʼant jlu quʼn aj qxiʼ kyoj chmabʼil ex aj qex pakbʼal. Nya qaj tuʼn tel kyiʼn xjal toklen Tyol Dios noq tuʼnju alkye tten in bʼaj qbʼinchaʼn qten, sino qaj tuʼn tonin kyiʼj tuʼn tel kynikʼ tiʼj axix tok ex tuʼn tok kyojtzqiʼn «qa tbʼanilxix t-xnaqʼtzbʼil Dios aju Klol qe» (Tito 2:​10).

 QO JYON MAS TQANIL

4. In nok qqʼoʼn toklen Jehová aj tbʼaj qbʼinchaʼn qten toj tumel

¿Tiquʼn kʼokel tilil quʼn tuʼn tbʼaj qxbʼalumin qibʼ toj tumel? Kyuʼjinktze Apocalipsis 4:​11 ex che yoline kyiʼj xjel lu:

• ¿Tzeʼn kbʼajel qxbʼalumin qibʼ tuʼnju in qo ajbʼen te Jehová?

• ¿Toj tumelpe aj tok qqʼoʼn qwitz tiʼj tzeʼn in bʼaj qbʼinchaʼn qten aj qxiʼ kyoj chmabʼil ex aj qex pakbʼal? ¿Tiquʼn in kubʼ t-ximana jlu?

 5. ¿Tzeʼn jaku jaw qjyoʼn qxbʼalun ex tzeʼn jaku bʼaj qbʼinchaʼn qten toj tumel?

Kyqʼonke kywitze tiʼj VIDEO.

Nya il tiʼj tuʼn ttzaj qlaqʼoʼn qxbʼalun wiʼyilxix moqa kar twiʼ, aju mas nim toklen aju tuʼn tbʼaj qtxʼjoʼn ex tuʼn tbʼaj qbʼinchaʼn qten toj tumel. Kyuʼjinktze 1 Corintios 10:​24 ex 1 Timoteo 2:9 ex 10. Yajxitl che yoline kyiʼj xjel lu:

• ¿Tiquʼn mlay tzʼok qqʼoʼn qxbʼalun nya toj tumel ex tzʼil?

• ¿Tiquʼn mlay tzʼok qqʼoʼn qxbʼalun jitzʼ, qʼanchaʼl qxmilal toj moqa jaku ten nya bʼaʼn kyximbʼetz txqantl tuʼn?

Ax tok, ya nya atoʼ tjaqʼ Tley Moisés, pero in nonin qiʼj tuʼn tel qnikʼ tiʼj alkye t-ximbʼetz Jehová at. Kyuʼjinktze Deuteronomio 22:5 ex che yoline tiʼj xjel lu:

• ¿Tiquʼn nya toj tumel tuʼn tbʼaj tbʼinchaʼn tten jun xinaq ik tzeʼn jun xuʼj ex jun xuʼj ik tzeʼn jun xinaq?

Kyuʼjinktze 1 Corintios 10:​32 ex 33 ex 1 Juan 2:​15 ex 16. Yajxitl che yoline kyiʼj xjel lu:

• Qa ma kubʼ kynaʼn xjal ex qe erman nya bʼaʼn tuʼnju alkye tten in bʼaj qxbʼalumin qibʼ, ¿nimpe toklen tuʼn qximen tiʼj jlu? ¿Tiquʼn?

• ¿Alkye tten in bʼaj kyxbʼalumin kyibʼ xjal jatumel in nanqʼina ex alkye tten in bʼaj kybʼinchaʼn kyten?

• ¿In kubʼpe t-ximana qa ateʼ junjun xbʼalun mlay tzʼok kyqʼoʼn tmajen Jehová kyiʼj? ¿Tiquʼn in kubʼ t-ximana jlu?

 TOJ CHʼIN YOL

Aj tjaw qjyoʼn tbʼanel qxbʼalun ex aj tbʼaj qbʼinchaʼn qten toj tumel, in kubʼ qyekʼin qa in nok qqʼoʼn toklen Jehová ex kyoklen txqantl.

Aju ma qo yolin tiʼj

• ¿Tiquʼn nim toklen toj twitz Jehová tzeʼn in bʼaj qbʼinchaʼn qten?

• ¿Alkye junjun consej toj Tyol Dios jaku che onin qiʼj tuʼn tbʼaj qxbʼalumin qibʼ toj tumel?

• ¿Jakupe che yolin txqantl bʼaʼn tiʼj Dios moqa nya bʼaʼn tuʼnju alkye tten in bʼaj qbʼinchaʼn qten?