At maj kʼelel txalpaja maske in nok tilil tuʼna tuʼn tok tkʼujlaʼna Jehová ex tuʼn tkubʼ tbʼinchaʼna aju bʼaʼn. Pero ateʼ junjun il mas matij qe kywitz junjuntl (1 Corintios 6:​9, 10). Qa ma kubʼ tbʼinchaʼna jun matij il, naʼntza qa kukx kʼokel kʼujlaʼna tuʼn Jehová, taj tuʼn tkubʼ tnajsaʼn tila ex taj tuʼn tonin tiʼja.

1. ¿Tiʼ kbʼantel quʼn tuʼn tkubʼ tnajsaʼn Jehová qil?

In tzaj bʼaj tkʼuʼj jun tmajen Jehová aj tkubʼ tbʼinchaʼn jun matij il. Pero in xi tqʼuqbʼaʼn Jehová tkʼuʼj kyukʼil yol xi tqʼamaʼn kye tmajen toj ambʼil ojtxe: «Maske kyaqxix keʼyin kyile wen, jaku tzʼok wuʼne te saq ik tzaʼn ttxa cheʼw, ex maske ik tzaʼn jun xbʼalun toksaʼn tkʼaʼ kyaq keʼyin, pero jaku tzʼok wuʼne te saq ik tzaʼn saq lan txʼjoʼmaj wen» (Isaías 1:​18). Qa ma tzʼajtz tiʼj qanmi, kbʼel tnajsaʼn Jehová qil. ¿Tiʼtzun t-xilen tuʼn tajtz tiʼj qanmi? A t-xilen tuʼn ttzaj qbʼis tiʼj il otoq kubʼ qbʼinchaʼn, tuʼn ya miʼn tkubʼ qbʼinchaʼn juntl maj ex tuʼn qkubʼsan twitz Jehová tuʼn tkubʼ tnajsaʼn qil. Kʼokel tilil quʼn tuʼn tkubʼ qchʼexpuʼn qximbʼetz ex tuʼn tkyaj qtzaqpiʼn qe tiʼchaq jaku kubʼ qbʼinchaʼn il kyuʼn, ex kʼokel tilil quʼn tuʼn qanqʼin ik tzeʼn taj Jehová (uʼjinktza Isaías 55:​6, 7).

2. Qa ma kubʼ qbʼinchan jun il, ¿alkye tten in che ajbʼen ansyan tuʼn Jehová tuʼn kyonin qiʼj?

In xi tqʼoʼn Jehová consej lu te jun xjal otoq kubʼ tbʼinchaʼn jun matij il: «Qa at jun yabʼ kyxole, bʼaʼn tuʼn kytzaj txket qe anciano kyxol okslal» (uʼjinktza Santiago 5:​14, 15). O che jaw skʼoʼn xinaq lu tuʼn xewbʼaj xjan ex kʼujlaʼn Jehová kyuʼn ex qe tmajen. Ax ikx, xnaqʼtzaʼn maj kyten tuʼn kyonin qiʼj tuʼn tten juntl maj qamiwbʼil tukʼil Jehová (Gálatas 6:1).

¿Tzeʼn in che onin ansyan qiʼj qa ma kubʼ qbʼinchaʼn jun matij il? Che onil kabʼe moqa oxe ansyan qiʼj tuʼn tel qnikʼ tiʼj tukʼil Tyol Dios tiquʼn jun il aju otoq kubʼ qbʼinchaʼn. Ax ikx tzul kyqʼoʼn tbʼanel consej qe ex che onil qiʼj tuʼn miʼn tkubʼ qbʼinchaʼn juntl maj il. Jakulo tzaj kyqʼamaʼn ansyan qe tuʼn miʼn kybʼant junjun tiʼchaq quʼn toj kʼloj okslal, tzmaxi aj tten juntl maj tbʼanel qamiwbʼil tukʼil Jehová. Qa at jun xjal in kubʼ tbʼinchaʼn jun matij il ex mintiʼ in najtz tiʼj tanmi, kʼelex expulsarin kyuʼn ansyan toj ttnam Jehová tuʼntzun kyok xqʼuqit erman.

 QO JYON MAS TQANIL

3. In tzaj tbʼanel qe aj t-xi qqʼamaʼn qil

In tzaj tbʼis Jehová aj tkubʼ qbʼinchaʼn jun matij il, tuʼntzunju bʼaʼn tuʼn t-xi qqʼamaʼn te qa otoq kubʼ qbʼinchaʼn jun il. Kyuʼjinktze Salmo 32:1 a 5 ex che yoline tiʼj xjel lu:

• ¿Tiquʼn tbʼanel tuʼn t-xi qqʼamaʼn te Jehová qa o kubʼ qbʼinchaʼn jun il twitzju tuʼn tkubʼ qewin?

 4. In tzaj tiʼn tbʼanel kye kykyaqil aj tex expulsarin jun xjal toj ttnam Jehová

Qa o kubʼ tbʼinchaʼn jun xjal jun matij il ex mintiʼ in xi tbʼiʼn qe tley Jehová, kʼelex expulsarin toj kʼloj okslal. Tuʼn jlu, ya mlay qo ten tukʼil ex ya mlay qo yolin tukʼil. Kyuʼjinktze 1 Corintios 5:6 ex 11 ex 2 Juan 9 a 11. Yajxitl che yoline kyiʼj xjel lu:

• Tuʼnju in jaw malj tkʼuʼj tqʼotjil pan tuʼn levadura, ¿in kubʼpe t-ximana qa jaku tzaj nya bʼaʼn kyiʼj txqantl erman qa ma tzʼok qjunin qibʼ tukʼil jun aj il mintiʼ in najtz tiʼj tanmi? ¿Tiquʼn?

 TOJ CHʼIN YOL

Qa ma kubʼ qbʼinchaʼn jun matij il, in kubʼ tnajsaʼn Jehová qil qa ma tzʼajtz tiʼj qanmi ex qa mintiʼ ma kubʼ qbʼinchaʼn juntl maj.

Aju ma qo yolin tiʼj

• Qa ma kubʼ qbʼinchaʼn jun il, ¿tiquʼn il tiʼj tuʼn t-xi qqʼamaʼn te Jehová?

• ¿Tiʼ kbʼantel quʼn tuʼn tkubʼ tnajsaʼn Jehová qil?

• Qa ma kubʼ qbʼinchaʼn jun matij il, ¿tiquʼn il tiʼj tuʼn t-xi qqanin onbʼil kye ansyan?