XNAQʼTZBʼIL 03
¿Jakupe tzʼok qeʼ qkʼuʼj tiʼj Tyol Dios?
In che kanet nim tziybʼil ex consej quʼn toj Tyol Dios. Bʼalo taja tuʼn tel tnikʼa tiʼjju in tzaj t-xnaqʼtzaʼn ex bʼalo ateʼ junjun t-xjela tiʼj. ¿Jakupe tzʼok qeʼ qkʼuʼj kyiʼj tziybʼil ex kyiʼj consej ateʼ toj jun ojtxe uʼj? ¿Jakupe che onin consej ateʼ toj Biblia qiʼj toj ambʼil jaʼlo ex toj ambʼil tzul? Ateʼ nim millón xjal in kubʼ kyximen qa ikju. In qo txokine tiʼja tuʼn tel tnikʼa tiʼj tiquʼn in nok qeʼ kykʼuʼj tiʼj jlu.
1. ¿Axpe tok bʼaj aju in tzaj tqʼamaʼn Tyol Dios?
In tzaj tqʼamaʼn Biblia qa «axix tok» aju tzʼibʼin toj (Eclesiastés 12:10). E ten qe xjal ex e bʼaj qe tiʼchaq in tzaj qʼamaʼn toj (uʼjinktza Lucas 1:3 ex 3:1, 2). Ax ikx, ateʼ nim xjal in che xnaqʼtzan tiʼjju o tzikʼ toj ambʼil ojtxe in tzaj kyqʼamaʼn qa axix tok aju tajlal ambʼil, kybʼi xjal, qe lugar ex qe tiʼchaq in tzaj qʼamaʼn toj Biblia.
2. ¿Tiquʼn jaku tzʼok qeʼ qkʼuʼj tiʼj Tyol Dios maske ojtxe kubʼ tzʼibʼin?
Atxix toj ambʼil ojtxe o tzʼel nikʼbʼaj tiʼj qa tzʼaqli aju in tzaj tqʼamaʼn Tyol Dios tukʼilju o tzʼel kynikʼ xjal tiʼj. Maske toj ambʼil tej tkubʼ tzʼibʼin Biblia attoq junxichaq kyximbʼetz xjal kyiʼj xnaqʼtzbʼil lu, toj ambʼil jaʼlo mas o tzʼel nikʼbʼaj tiʼj qa ax tok aju in tzaj tqʼamaʼn. Tuʼntzunju, jaku tzʼok qeʼ qkʼuʼj tiʼj ex ktel te jumajx (Salmo 111:8).
3. ¿Tiquʼn jaku tzʼok qeʼ qkʼuʼj tiʼjju in tzaj tqʼamaʼn Tyol Dios tiʼj ambʼil tzul?
Ateʼ nim profecía a toj Tyol Dios aju in tzaj kyqʼamaʼn tiʼ «kbʼajel tuj tqʼijlalil tzul» (Isaías 46:10). Kyaj tzʼibʼin toj alkyeqe tiʼchaq tuʼn kybʼaj ex atxtoq nim ambʼil tuʼn kyikʼ. Ax ikx kyaj tqʼamaʼn tzeʼn kymod xjal tuʼn tten toj qqʼijlalil jaʼlo. Toj xnaqʼtzbʼil lu, qo xnaqʼtzal kyiʼj junjun profecía ateʼ toj Tyol Dios ex jaku qo jaw labʼin tiʼjju in tzaj tqʼamaʼn.
QO JYON MAS TQANIL
Kʼelel qnikʼ tiʼj qa at toklen aju in tzaj tqʼamaʼn Tyol Dios tukʼilju o tzʼel kynikʼ xjal tiʼj ex qo xnaqʼtzal tiʼj junjun profecía nim toklen toj Tyol Dios.
4. In tzaj tyekʼin aju o tzʼel kynikʼ xjal tiʼj qa ax tok aju tkuʼx toj Tyol Dios
Toj ambʼil ojtxe kubʼ kyximen nim xjal qa tzyuʼntoq Txʼotxʼ tuʼn jun tiʼ. Kyqʼonke kywitze tiʼj VIDEO.
Qʼonka twitza tiʼjju kubʼ tzʼibʼin toj uʼj te Job aju ma tzikʼ junlo 3,500 abʼqʼi tkubʼlen tzʼibʼin. Kyuʼjinktze Job 26:7 ex che yoline tiʼj xjel lu:
-
¿Tiquʼn in qo jaw labʼin aj ttzaj tqʼamaʼn Tyol Dios qa jaw yobʼan Txʼotxʼ «tibʼaj ju mintiʼ at»?
Ma tzikʼ junlo kabʼe syent abʼqʼi toklen kyojtzqiʼn xjal alkye tten in naqʼunan aʼ. Atzunte Tyol Dios ma tzikʼ nim mil abʼqʼi ttzajlen tqʼamaʼn jlu. Kyuʼjinktze Job 36:27 ex 28, ex che yoline kyiʼj xjel lu:
-
¿Alkye mas tbʼanel in nela toj twitza tiʼjju in tzaj tqʼamaʼn Tyol Dios tiʼj aʼ?
-
¿In che oninpe texto lu tiʼja tuʼn tok qeʼ mas tkʼuʼja tiʼj Tyol Dios?
5. Tzaj tqʼamaʼn Tyol Dios tuʼn kybʼaj junjun tiʼchaq nim kyoklen
Kyuʼjinktze Isaías 44:27 a 45:2 ex che yoline tiʼj xjel lu:
-
Tej atxtoq 200 abʼqʼi tuʼn tkubʼ xiten tnam Babilonia, ¿alkye junjun tiʼchaq tqʼama Tyol Dios tuʼn tbʼaj tiʼj?
O tzʼel kynikʼ xjal tiʼj qa toj abʼqʼi 539 tjaqʼxi ambʼil qʼiʼn quʼn jaʼlo kubʼ tiʼj tnam Babilonia tuʼn rey Ciro te tnam Persia ex kyuʼn tsoldad. Xi kyjyoʼn juntl tbʼe aʼ tok tiʼjele tnam. Tuʼnju otoq che kyaj jaqet tpwertil tnam, e okx toj ex kubʼ tiʼj kyuʼn. Ma tzikʼ mas te 2,500 abʼqʼi tbʼajlen jlu ex toj ambʼil jaʼlo oʼkx qe tbʼuchil tnam ateʼ. Qʼonka twitza tiʼjju kyaj tqʼamaʼn Tyol Dios.
Kyuʼjinktze Isaías 13:19 ex 20, ex che yoline tiʼj xjel lu:
-
¿Tzeʼn japun twi profecía lu?
Qe tbʼuchil tnam Babilonia atz Irak.
6. Kyaj tqʼamaʼn Tyol Dios qe tiʼchaq in che bʼaj toj ambʼil jaʼlo
In tzaj tqʼamaʼn Tyol Dios qa in qo anqʼin toj bʼajsbʼil moqa «mankbʼil tqʼijlalil» (2 Timoteo 3:1). Qʼonka twitza tiʼjju kyaj tqʼamaʼn Tyol Dios tuʼn tbʼaj toj ambʼil jaʼlo.
Kyuʼjinktze Mateo 24:6 ex 7, ex che yoline tiʼj xjel lu:
-
¿Tiʼ kyaj tqʼamaʼn Tyol Dios tuʼn tbʼaj kyoj bʼajsbʼil tqʼijlalil?
Kyuʼjinktze 2 Timoteo 3:1 a 5 ex che yoline kyiʼj xjel lu:
-
Ik tzeʼn kyaj qʼamaʼn toj Tyol Dios, ¿tzeʼn kymod xjal tuʼn tten kyoj bʼajsbʼil tqʼijlalil?
-
Tiʼj kymod xjal in tzaj qʼamaʼn kyoj versículo lu, ¿alkyeqe o tzʼok tqʼoʼna twitza tiʼj?
AJU IN TZAJ KYQʼAMAʼN JUNJUN XJAL: «Nojni Tyol Dios kyuʼn txʼolbʼabʼil nya ax tok».
-
Tiʼjju ma qo xnaqʼtzan tiʼj, ¿tiʼ ma tzʼonin tiʼja tuʼn tok qeʼxix tkʼuʼja tiʼj Tyol Dios?
TOJ CHʼIN YOL
Jaku tzʼok qeʼ qkʼuʼj tiʼj Tyol Dios tuʼn tkyaqilju o tzʼel kynikʼ xjal tiʼj ex kyuʼn profecía in japun kywiʼ.
Aju ma qo yolin tiʼj
-
¿Axpe tok aju in tzaj tqʼamaʼn Tyol Dios moqa noq jun txʼolbʼabʼil?
-
¿Tzeʼn in tzaj tyekʼin aju o tzʼel kynikʼ xjal tiʼj qa ax tok aju in tzaj tqʼamaʼn Biblia?
-
¿In tzajpe tqʼamaʼn Tyol Dios aju kbʼajel toj ambʼil tzul? ¿Tiquʼn in kubʼ t-ximana jlu?
OJTZQINKA CHʼINTL
Tukʼilju o tzʼel kynikʼ xjal tiʼj, ¿tzʼaqlipe tkyaqilju in tzaj tqʼamaʼn Tyol Dios?
¿Tzeʼn jaku tzʼel qnikʼ tiʼj qa in qo anqʼin kyoj bʼajsbʼil tqʼijlalil?
«Qaq profecía toj Tyol Dios in japun kywiʼ» (Aju Xqʼuqil, 1 te mayo te 2011)
Tbʼanel tuʼn tel tnikʼa tiʼj tzeʼn japun kywi yol kyaj tqʼamaʼn Tyol Dios tiʼj tnam Grecia.
In tzaj qʼuqbʼaʼn qkʼuʼj kyuʼn yol o che kyaj tziyen (5:22)
Bʼaʼn tuʼn tel tnikʼa tiʼj tzeʼn o che onin qe profecía tiʼj jun xjal tuʼn tchʼexpaj t-ximbʼetz tiʼj Tyol Dios.
«Mintiʼtoq in xi wokslaʼne qa at Dios» (Aju Xqʼuqil, tajlal 5 te 2017)
a In che yolin profecía tiʼj tqanil in tzaj tqʼoʼn Dios tiʼj ambʼil tzul.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
