XNAQʼTZBʼIL 34
¿Tzeʼn jaku kubʼ qyekʼin qa kʼujlaʼn Jehová quʼn?
¿In kubʼpe t-ximana qa o tzʼok laqʼeʼya mas ttxlaj Jehová atxix tej ttzaj tzyet tuʼn t-xnaqʼtzana tiʼj Tyol? ¿Tajpe teya tuʼn tchʼiy mas tamiwbʼila tukʼil? Qa ikju, bʼaʼn tuʼn ttzaj tnaʼna qa mas ma tzʼok tkʼujlaʼna Jehová, ax ikx te mas kʼokel kʼujlaʼna tuʼn ex kxqʼuqil tiʼja. ¿Tzeʼn jaku kubʼ tyekʼina qa kʼujlaʼn Jehová tuʼna?
1. ¿Tzeʼn in kubʼ qyekʼin qa kʼujlaʼn Jehová quʼn?
In kubʼ qyekʼin qa kʼujlaʼn Jehová quʼn aj qnimen te moqa aj qbʼin te (uʼjinktza 1 Juan 5:3). Noqtzun tuʼnj, mintiʼ in qo ok t-obligarin Jehová tuʼn qnimen te, sino in tzaj tqʼoʼn ambʼil te teyele junjun qe tuʼn tkubʼ qximen tiʼ kbʼantel quʼn. ¿Tiquʼn? Tuʼnju taj tuʼn qnimen te tuʼn tkyaqil qanmi (Romanos 6:17). Toj juntl yol, taj Jehová tuʼn qnimen te tuʼnju kʼujlaʼn quʼn ex nya tuʼnju in qo ok tchqʼoʼn. Kʼonil kʼloj xnaqʼtzbʼil oxe ex kyaje tiʼja tuʼn tkubʼ tyekʼina qa kʼujlaʼn Jehová tuʼna. Jaku kubʼ tyekʼina aj tkubʼ tbʼinchaʼna aju bʼaʼn in nela toj twitz ex aj tel tikʼuna aju in nel tikʼun.
2. ¿Tiquʼn at maj kwest tuʼn tkubʼ qyekʼin qkʼujlabʼil tiʼj Jehová?
In tzaj tqʼamaʼn Tyol Dios qa «aju xjal tzʼaqlxix nim yajbʼil nnikʼx tuʼn» (Salmo 34:19). Qkyaqilx in nok tilil quʼn tuʼn tkubʼ tiʼj nya bʼaʼn qajbʼil. Axlo ikx, in pon jun ambʼil jatumel mintiʼxix qpwaq moqa qmedi, in nok bʼinchaʼn nya bʼaʼn qiʼj kyuʼn junjuntl moqa in qo ok weʼ twitz juntl tiʼ. Kyoj ambʼil lu, maslo kwest tuʼn qanqʼin ik tzeʼn taj Jehová ex tuʼn qnimen te. Pero qa ma tzʼok tilil tuʼna tuʼn tkubʼ tbʼinchaʼna aju taj Jehová, kbʼel tyekʼina qa mas kʼujlaʼn tuʼna twitz alkyexku juntl tiʼ ex qa taja tuʼn ttena tzʼaqli twitz. Ax ikx, kukx kxqʼuqil tiʼja ex mlayx kyaj tzaqpiʼna tuʼn (uʼjinktza Salmo 4:3, XT).
QO JYON MAS TQANIL
Qo xnaqʼtzan tiʼj tiquʼn nim toklen toj twitz Jehová tuʼn qnimen te ex tiʼ jaku bʼant quʼn tuʼn kukx qten tzʼaqli twitz.
3. Jun tiʼ at toklen tukʼila
In tzaj tqʼamaʼn uʼj te Job qa xi tqʼamaʼn Satanás jun nya ax tok yol tiʼj Job. Noqtzun tuʼnj, nya oʼkx tiʼj Job, sino ax ikx kyiʼj kykyaqil xjal kyaj tuʼn kyajbʼen te Jehová. Kyuʼjinktze Job 1:1 ex 1:6 a 2:10, ex che yoline kyiʼj xjel lu:
-
Ik tzeʼn tqʼama Satanás, ¿tiquʼn nimen Job te Jehová? (Kyqʼonke kywitze tiʼj Job 1:9-11).
-
¿Tiʼ nya ax tok yol in tzaj tqʼamaʼn Satanás kyiʼj xjal, axpe ikx tiʼja? (Kyqʼonke kywitze tiʼj Job 2:4).
Kyuʼjinktze Job 27:5b, TNM. Yajxitl, che yoline tiʼj xjel lu:
-
¿Tzeʼn kubʼ tyekʼin Job qa ax tok kʼujlaʼntoq Jehová tuʼn?
Kubʼ tyekʼin Job qa kʼujlaʼn Jehová tuʼn, tuʼnju kukx ten tzʼaqli twitz.
In kubʼ qyekʼin qa kʼujlaʼn Jehová quʼn aj qnimen te toj tkyaqil ambʼil.
4. Bʼaʼn tuʼn ttzalaj tanmi Jehová tuʼna
Kyuʼjinktze Proverbios 27:11 ex che yoline kyiʼj xjel lu:
-
¿Tiʼ in kubʼ tnaʼn Jehová aj tnimana te ex aj tjaw tjyoʼna aju mas bʼaʼn? ¿Tiquʼn?
5. Kukx tzʼajbʼena te Jehová
In nok tilil quʼn tuʼn qyolin tiʼj Jehová kyukʼil txqantl tuʼnju kʼujlaʼn quʼn, axpe ikx qa at maj kwest. Kyqʼonke kywitze tiʼj VIDEO ex che yoline kyiʼj xjel lu:
-
¿Kwestpe in nela toj twitza tuʼn tyolina kyukʼil txqantl tiʼj Jehová?
-
Ik tzeʼn sok qkeʼyin toj video, ¿tiʼ onin tiʼj Grayson tuʼn miʼn ttzaj xobʼ?
Mas nya kwest tuʼn qten tzʼaqli twitz Jehová aj tok qkʼujlaʼn aju kʼujlaʼn tuʼn ex aj tel qikʼun aju in nel tikʼun. Kyuʼjinktze Salmo 97:10 ex che yoline kyiʼj xjel lu:
-
Ik tzeʼn o tzʼel tnikʼa tiʼj, ¿alkyeqe tiʼchaq kʼujlaʼn tuʼn Jehová ex alkyeqe tiʼchaq in nel tikʼun?
-
¿Tzeʼn jaku tzʼok tkʼujlaʼna aju bʼaʼn ex tzeʼn jaku tzʼel tikʼuna aju nya bʼaʼn?
6. In tzaj tbʼanel qe aj qnimen te Jehová
Mas tbʼanel qa ma qo bʼin te Jehová. Kyuʼjinktze Isaías 48:17 ex 18, ex che yoline kyiʼj xjel lu:
-
¿In kubʼpe t-ximana qa ojtzqiʼn tuʼn Jehová alkye mas tbʼanel te qe? ¿Tiquʼn in kubʼ t-ximana jlu?
-
Tuʼnju in xnaqʼtzana tiʼj Tyol Dios ex tuʼnju mas o tzʼel tnikʼa tiʼj Jehová, ¿tzeʼn o tzʼonin jlu tiʼja?
AJU IN TZAJ KYQʼAMAʼN JUNJUN XJAL: «Mintiʼ taj Dios tiʼjju in bʼant wuʼne».
-
¿Alkye texto jaku tzʼajbʼen tuʼna tuʼn t-xi tqʼamaʼna te jun xjal qa jaku tzalaj Dios tuʼn qbʼinchbʼen moqa jaku tzaj tbʼis?
TOJ CHʼIN YOL
In kubʼ tyekʼina qa kʼujlaʼn Jehová tuʼna aj tnimana te ex aj ttena tzʼaqli twitz maske in nok weʼya twitz nya bʼaʼn.
Aju ma qo yolin tiʼj
-
¿Tiʼ xnaqʼtzbʼil jaku tzʼel tiʼna tiʼj Job?
-
¿Tzeʼn jaku kubʼ tyekʼina tkʼujlabʼila tiʼj Jehová?
-
¿Tiʼ kʼonil tiʼja tuʼn kukx tajbʼena te Jehová?
OJTZQINKA CHʼINTL
Bʼaʼn tuʼn tel tnikʼa tiʼj tiʼ jaku bʼant tuʼna tuʼn ttena tzʼaqli twitz Jehová ex kywitz erman.
Ojtzqinka mas tqanil kyiʼj nya ax tok yol tqʼama Satanás.
«Kukx ajbʼen Job te Dios» (¿Alkye tqanil tkuʼx toj Tyol Dios? Xnaqʼtzbʼil 6)
Keʼyinka qa jaku kubʼ kyyekʼin kʼwal qa kʼujlaʼn Jehová kyuʼn.
¿Tzeʼn jaku che ten kuʼxun tzʼaqli twitz Dios aj ttzaj qʼamaʼn kye tuʼn tkubʼ kybʼinchaʼn jun nya bʼaʼn?
Tenx tipumala tuʼn miʼn tkubʼ tbʼinchaʼna aju in tzaj kyqʼamaʼn txqantl (4:00)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
