XNAQʼTZBʼIL 37
Aju in tzaj tqʼamaʼn Tyol Dios tiʼj pwaq ex tiʼj aqʼuntl
¿Ope tzaj jun maj tbʼisa tuʼnju mintiʼ tpwaqa moqa tuʼnju mintiʼ taqʼuna? At maj kwest tuʼn tkanet aju at tajbʼen qe ex tuʼn qajbʼen te Jehová ik tzeʼn taj. Noqtzun tuʼnj, in tzaj tqʼoʼn Biblia tbʼanel consej qe ex jaku che onin qiʼj tuʼn qajbʼen te.
1. ¿Tiʼ in tzaj tqʼamaʼn Tyol Dios tiʼj aqʼuntl?
Taj Dios tuʼn qtzalaj tiʼj qaqʼun. Ex in tzaj tqʼamaʼn Biblia qa «aju mas bʼaʼn tuʼn tbʼinchante xjal», atzunju «tuʼn ttzalaj tiʼj taqʼunbʼen» (Eclesiastés 2:24). Ax ikx te Jehová tgan tuʼn taqʼunan. Tuʼntzunju, aj qok te jun tbʼanel aqʼunal ik tzeʼn te, in kubʼ qbʼinchaʼn aju bʼaʼn in nela toj twitz ex in qo tzalaj.
Nim toklen aqʼuntl, pero mintiʼ tuʼn tkubʼ qqʼoʼn tnejel twitz qajbʼebʼil te Jehová (Juan 6:27). In tzaj ttziyen Jehová qa tzul tqʼoʼn aju at tajbʼen qe qa ma kubʼ qqʼoʼn tajbʼil tnejel toj qanqʼibʼil.
2. ¿Alkye qximbʼetz ktel tiʼj pwaq?
In tzaj tqʼamaʼn Tyol Dios qa at tajbʼen pwaq moqa sentav, noqtzun tuʼnj, in tzaj tqʼamaʼn qa mlayx tzaj tqʼoʼn tzalajbʼil qe (Eclesiastés 7:12). Tuʼntzunju, in tzaj tqʼamaʼn Biblia qe tuʼn miʼn tok qkʼujlaʼn pwaq ex in tzaj tqʼoʼn consej lu qe: «Che tzalaje tiʼj chʼin at kyeye» (uʼjinktza Hebreos 13:5). Aj qtzalaj tiʼjju at qe, mintiʼ in tzaj bʼaj qkʼuʼj tuʼn tkanet mas ex mas qpwaq ex mintiʼ in qo kyaj tjaqʼ kʼas (Proverbios 22:7). Ax ikx, mintiʼ in qo saqchan kyiʼj juego tuʼn qkambʼan pwaq ex mintiʼ in xi qjyoʼn junjun tumel tzeʼn tuʼn qok te qʼinun.
3. ¿Tzeʼn jaku tzʼajbʼen qpwaq tuʼn qonin kyiʼj txqantl?
Tgan Jehová tuʼn tbʼinchan xtalbʼil ex in nel qkanoʼn tiʼj aj t-xi qqʼoʼn chʼin kye txqantl tiʼjju at qe (1 Timoteo 6:18). Jaku tzʼajbʼen qpwaq aj qonin kyiʼj gast in najbʼen toj Ja te Chmabʼil ex aj qonin kyiʼj qeju mintiʼxix at kye, ex mas nim toklen tuʼn qonin kyiʼj qerman. Mintiʼ in nok tqʼoʼn Jehová twitz tiʼj jniʼ onbʼil in xi qqʼoʼn, sino mas in nok tqʼoʼn twitz tiʼj tiquʼn in bʼant quʼn. Aj qonin kyiʼj txqantl tuʼn tkyaqil qkʼuʼj, in qo tzalaj ex in tzalaj Jehová quʼn (uʼjinktza Hechos 20:35).
QO JYON MAS TQANIL
Qo xnaqʼtzan tiʼj tzeʼn jaku tzʼonin qiʼj qa ma ten qximbʼetz toj tumel tiʼj aqʼuntl ex qa ma qo tzalaj tiʼjju at qe.
4. In jaw qnimsaʼn Jehová aj qok te tbʼanel aqʼunal
Qa at jun tbʼanel qamiwbʼil tukʼil Jehová, kʼonil qiʼj tuʼn tten qximbʼetz toj tumel tiʼj aqʼuntl. Kyqʼonke kywitze tiʼj VIDEO ex che yoline kyiʼj xjel lu:
-
¿Tiʼ mas tbʼanel in nela toj twitza tiʼj tmod Jason in kubʼ tyekʼin toj aqʼuntl?
-
¿Tiʼ bʼant tuʼn Jason tuʼn tkubʼ tqʼoʼn aqʼuntl toj tlugar?
Kyuʼjinktze Colosenses 3:23 ex 24, ex che yoline tiʼj xjel lu:
-
¿Tiquʼn nim toklen tuʼn qaqʼunan tuʼn tkyaqil qkʼuʼj?
Tbʼanel tuʼn tok qqʼoʼn toklen aqʼuntl, pero mintiʼ tuʼn tok qqʼoʼn mas nim toklen twitz qajbʼebʼil te Jehová.
5. Aʼyeju kʼiwlabʼil jaku che tzaj qkʼamoʼn qa ma qo tzalaj tiʼjju at qe
Ateʼ nim xjal in nok tilil kyuʼn tuʼn tchmet nim kypwaq, noqtzun tuʼnj, junxitl consej in tzaj tqʼoʼn Biblia qe tiʼj jlu. Kyuʼjinktze 1 Timoteo 6:6 a 8 ex che yoline tiʼj xjel lu:
-
¿Alkye consej in tzaj tqʼoʼn Biblia qe?
Jaku qo tzalaj maske noq chʼin at qe. Kyqʼonke kywitze tiʼj VIDEO ex che yoline tiʼj xjel lu:
-
¿Tiquʼn in che tzalaj ja xjal lu maske nya nim kypwaq at?
¿Yajtzun qa at nim tiʼchaq qe, pero kukx qaj tuʼn tten mas? Ajbʼen jun techel tuʼn Jesús tuʼn ttzaj tchikʼbʼaʼn qa jaku tzaj nya bʼaʼn qiʼj qa ma pon qkʼuʼj tiʼj nim pwaq. Kyuʼjinktze Lucas 12:15 a 21 ex che yoline tiʼj xjel lu:
-
¿Tiʼ xnaqʼtzbʼil jaku tzʼel tiʼna tiʼj techel tqʼama Jesús? (Kyqʼonke kywitze tiʼj versículo 15).
Kyuʼjinktze Proverbios 10:22 ex kymojbʼankuye tukʼil 1 Timoteo 6:10. Yajxitl che yoline kyiʼj xjel lu:
-
Alkyetzulo mas nim toklen, ¿ape tuʼn qok te tamiw Jehová moqa aju tuʼn tten nim qpwaq? ¿Tiquʼn?
-
¿Alkyeqe nya bʼaʼn jaku che tzaj qiʼj qa oʼkx ma qo ximen tiʼj tuʼn tten nim qpwaq?
6. Tzul tqʼoʼn Jehová aju at tajbʼen qe
Qa kwest tuʼn tkanet qaqʼun ex qpwaq, jaku tzʼajbʼen ambʼil lu quʼn tuʼn tel qnikʼ tiʼj qa in nok qeʼxix qkʼuʼj tiʼj Jehová. Kyqʼonke kywitze tiʼj VIDEO tuʼn tel kynikʼe tiʼj tzeʼn jaku tzʼok qeʼ kykʼuʼje tiʼj Jehová kyoj ambʼil kwest ex che yoline kyiʼj xjel lu:
-
Ik tzeʼn ma tzʼetz yekʼin toj video, ¿alkyeqe nya bʼaʼn ok weʼ ermano twitz?
-
¿Tiʼ bʼant tuʼn tuʼn tex twitz nya bʼaʼn?
Kyuʼjinktze Mateo 6:25 a 34 ex che yoline tiʼj xjel lu:
-
¿Tiʼ in tzaj ttziyen Jehová qe qa ma kubʼ qqʼoʼn Tkawbʼil tnejel toj qanqʼibʼil?
AJU IN TZAJ KYQʼAMAʼN JUNJUN XJAL: «Il tiʼj tuʼn waqʼunane tuʼn kywaʼn qe toj njaye. Tuʼntzunju, mlayx chinxe tkyaqil maj toj reunión».
-
¿Alkye taqikʼ Tyol Dios jaku tzʼonin tiʼja tuʼn tok qeʼ tkʼuʼja tiʼj qa mas tbʼanel tuʼn tkubʼ tqʼoʼna tajbʼil Jehová tnejel toj tanqʼibʼila?
TOJ CHʼIN YOL
At tajbʼen pwaq ex aqʼuntl, noqtzun tuʼnj, mintiʼ tuʼn tel kyiʼn ambʼil qe tuʼn qajbʼen te Jehová.
Aju ma qo yolin tiʼj
-
¿Tiʼ jaku tzʼonin tiʼja tuʼn tten t-ximbʼetza toj tumel tiʼj aqʼuntl?
-
¿Tzeʼn jaku tzʼonin tiʼja qa ma tzalaja tiʼjju at teya?
-
Tuʼnju in tzaj ttziyen Jehová qa tzul tqʼoʼn aju at tajbʼen kye tmajen, ¿tzeʼn jaku kubʼ tyekʼina qa in nok qeʼ tkʼuʼja tiʼj?
OJTZQINKA CHʼINTL
Bʼaʼn tuʼn tel tnikʼa tiʼj tiʼ in tzaj tqʼamaʼn Tyol Dios tiʼj pwaq.
«¿Tuʼnpe pwaq in tzaj tkyaqil nya bʼaʼn?» (Xnaqʼtzbʼil toj jw.org)
Ojtzqinka alkye t-ximbʼetz Dios at tiʼjju tuʼn t-xi qqʼoʼn jun oyaj.
«¿Tiʼ in tzaj tqʼamaʼn Tyol Dios tiʼjju tuʼn t-xi qqʼoʼn oyaj?» (Xnaqʼtzbʼil toj jw.org)
¿Jakupe tzaj nya bʼaʼn qiʼj qa ma qo apostarin tiʼj pwaq?
«Aju in tzaj tqʼamaʼn Tyol Dios: Qe saqchbʼil tuʼn tkambʼet pwaq» (¡Weʼktza!, marzo te 2015)
Bʼaʼn tuʼn tok tojtzqiʼna tiʼ onin tiʼj jun xjal tuʼn tchʼexpaj tanqʼibʼil, aju tgantoq tuʼn t-apostarin ex tuʼn telqʼan.
«Ngantoqe qe carrera kyiʼj chej» (Aju Xqʼuqil, 1 te noviembre te 2011)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
