XNAQʼTZBʼIL 38
Qqʼonx chjonte tiʼj qchwinqlal
In che ikʼ junjun tbʼanel tiʼchaq toj qanqʼibʼil. Axpe ikx aj qikʼ toj nya bʼaʼn, jaku qo tzalaj kyiʼj junjun tiʼchaq. ¿Tzeʼn jaku kubʼ qyekʼin qa in nok qqʼoʼn toklen qchwinqlal o tzaj tqʼoʼn Jehová? ¿Ex tiquʼn nim toklen tuʼn tbʼant quʼn?
1. ¿Tiquʼn il tiʼj tuʼn tok qqʼoʼn toklen qchwinqlal?
A Jehová in tzaj qʼonte qchwinqlal moqa qanqʼibʼil ex bʼaʼn tuʼn tok qqʼoʼn toklen. Ax ikx, atz tukʼil in tzaj «twi aʼ in tqʼoʼn chwinqlal» tuʼnju a kubʼ bʼinchante tkyaqilju at tanqʼibʼil (Salmo 36:9). In tzaj tqʼamaʼn Biblia jlu: «Ax [te Dios] in qʼonte qchwinqlal ex qxew qkyaqil ex tkyaqilju at» (Hechos 17:25, 28). Tuʼn jlu, in nel qnikʼ tiʼj qa a Jehová in tzaj qʼonte tkyaqilju at tajbʼen qe tuʼn qanqʼin ex tuʼn qtzalaj tiʼj (uʼjinktza Hechos 14:17).
2. ¿Tzeʼn jaku txi qqʼoʼn chjonte te Jehová tiʼj qchwinqlal?
Tej tok tena toj talbʼil ttxuʼya, ok tqʼoʼn Jehová twitz tiʼja. Tuʼn tonbʼil xewbʼaj xjan, xi tqʼamaʼn David jlu toj jun naʼj Dios: «[O chin tila tej] intoq tbʼinchaʼntibʼjuʼ nxmilaleʼ tuʼn tchʼiy» (Salmo 139:16, XT). A jlu in tzaj tyekʼin qa nim toklen tchwinqlala toj twitz Jehová (uʼjinktza Mateo 10:29-31). Tuʼntzunju, jaku tzaj nim tbʼis aj tkubʼ t-ximen jun xjal tuʼn tkubʼ tbʼyon tibʼ moqa aj tel tiʼn tchwinqlal juntl (Éxodo 20:13). a Ax ikx, jaku tzaj nim tbʼis Jehová qa mintiʼ ma tzʼok qkwentin qchwinqlal ex kychwinqlal txqantl. Pero qa ma tzʼok qkwentin qchwinqlal ex kychwinqlal txqantl, in kubʼ qyekʼin qa in nok qqʼoʼn toklen oyaj moqa regalo lu.
QO JYON MAS TQANIL
Qo xnaqʼtzan kyiʼj junjun tumel tzeʼn jaku tzʼok qqʼoʼn toklen qchwinqlal.
3. Xqʼuqink tchwinqlala
Aqeju xjal o txi kytziyen tuʼn kyajbʼen te Jehová, in najbʼen kychwinqlal kyuʼn tuʼn kyajbʼen te. O txi kyqʼoʼn kyxmilal te ik tzeʼn jun oyaj, tuʼntzunju il tiʼj tuʼn tok kyxqʼuqin. Kyuʼjinktze Romanos 12:1 ex 2, ex che yoline kyiʼj xjel lu:
-
¿Tiquʼn tbʼanel tuʼn tok t-xqʼuqina tchwinqlala?
-
¿Tzeʼn jaku bʼant jlu tuʼna?
4. Qʼonka tilil tuʼn miʼn ttzaj nya bʼaʼn tiʼja ex kyiʼj txqantl
In tzaj tqʼamaʼn Tyol Dios tuʼn tel qikʼun tkyaqilju jaku tzaj tiʼn nya bʼaʼn qiʼj. Kyqʼonke kywitze tiʼj VIDEO ex bʼaʼn tuʼn tel kynikʼe tiʼj tiʼ jaku bʼant quʼn tuʼn tok qxqʼuqin qibʼ.
Kyuʼjinktze Proverbios 22:3 ex che yoline tiʼj tzeʼn jaku tzʼok t-xqʼuqin tibʼ jun xjal...
-
atz tja.
-
toj aqʼuntl.
-
aj tbʼant deporte tuʼn.
-
aj tmanejarin moqa aj t-xiʼ toj jun kar.
5. Qʼonka toklen tchwinqlal neʼ naʼmx tul itzʼj
Toj jun poema, tqʼama David qa in nok tqʼoʼn Jehová toklen tchwinqlal jun tal neʼ moqa neʼẍ in chʼiy toj talbʼil ttxuʼ. Kyuʼjinktze Salmo 139:13 a 17 ex che yoline tiʼj xjel lu:
-
¿Toj alkye ambʼil in nok tqʼoʼn Jehová toklen tchwinqlal jun neʼ, aj tul itzʼj moqa aj tok ten toj talbʼil ttxuʼ?
Xqʼuqin ley xi tqʼoʼn Jehová kye aj Israel toj ambʼil ojtxe kyiʼj txubʼaj otoq tzʼok ten kyal ex tiʼj tal neʼ attoq toj kyalbʼil. Kyuʼjinktze Éxodo 21:22 ex 23, ex che yoline kyiʼj xjel lu:
-
Toj ambʼil ojtxe, ¿tiʼ kubʼ tnaʼn Jehová qa ma kyim jun tal neʼ tuʼn jun xjal ex nyatoq ximen maj tuʼn?
-
¿Tiʼtzun in kubʼ tnaʼn Jehová qa ma kubʼ t-ximen jun xuʼj moqa qya tuʼn tel tiʼn tal? b
-
¿Tiʼ teya t-ximbʼetz tiʼjju in kubʼ tnaʼn Dios?
Maske in nok tqʼoʼn jun xuʼj toklen tchwinqlal, jakulo kubʼ t-ximen qa mas bʼaʼn tuʼn tel tiʼn tal. Kyuʼjinktze Isaías 41:10 ex che yoline kyiʼj xjel lu:
-
Qa ma tzʼok obligarin jun xuʼj tuʼn tel tiʼn tal, ¿alqe kxel tqanin onbʼil? ¿Tiquʼn?
AJU IN TZAJ KYQʼAMAʼN JUNJUN XJAL: «Teyele junjun xuʼj kbʼel t-ximen qa kʼelel tiʼn tal moqa miʼn. A tajaw t-xmilal».
-
¿Tiquʼn in nok qeʼ tkʼuʼja tiʼj qa nim toklen tchwinqlal jun xuʼj toj twitz Jehová ex aju tchwinqlal tal neʼ at toj talbʼil?
TOJ CHʼIN YOL
Jun oyaj qchwinqlal tuʼn Jehová ex in tzaj tqʼamaʼn Biblia tuʼn tok qqʼoʼn toklen, tuʼn tok qxqʼuqin ex tuʼn tok qkʼujlaʼn. Ax ikx in tzaj tqʼamaʼn tuʼn tbʼant jlu quʼn kyukʼil txqantl.
Aju ma qo yolin tiʼj
-
¿Tiquʼn jaku txi qqʼamaʼn qa in nok tqʼoʼn Jehová toklen qchwinqlal?
-
¿Tiʼ in kubʼ tnaʼn Jehová aj tkubʼ t-ximen jun xjal tuʼn tkubʼ tbʼyon tibʼ moqa aj tkubʼ tbʼyoʼn juntl xjal?
-
¿Tiquʼn in xi tqʼoʼna chjonte tiʼj qchwinqlal?
OJTZQINKA CHʼINTL
¿Tzeʼn jaku txi qqʼoʼn chjonte te Jehová tiʼj qchwinqlal?
¿Jakupe kubʼ tnajsaʼn Dios til jun xuʼj o tzʼel tiʼn tal?
«¿Tiʼ in tzaj tqʼamaʼn Tyol Dios tiʼjju tuʼn tel kyiʼn xuʼj kyal?» (Xnaqʼtzbʼil toj jw.org)
Qa ma tzʼel tnikʼa tiʼj alkye t-ximbʼetz Dios at tiʼj qchwinqlal, ¿tzeʼn jaku tzʼonin jlu tiʼja aj tjaw tjyoʼna jun deporte?
¿Yajtzun qa o kubʼ t-ximen jun xjal tuʼn tkubʼ tbʼyon tibʼ? Ojtzqinka tzeʼn jaku tzʼonin Tyol Dios tiʼj.
a In ximen Jehová kyiʼj qeju in tzaj bʼaj kykʼuʼj (Salmo 34:18). In nel tnikʼ kyiʼj qeju in kubʼ kyximen tuʼn tkubʼ kybʼyon kyibʼ ex taj tuʼn tonin kyiʼj tuʼn miʼn tbʼant jlu kyuʼn. Ojtzqinka qe tbʼanel consej in tzaj qʼoʼn qe toj xnaqʼtzbʼil tok tbʼi: «¿Jakupe tzʼonin Tyol Dios wiʼje qa ya nya waje tuʼn wanqʼine ex qa in kubʼ nximane tuʼn tkubʼ nbʼyon wibʼe?», aju at toj plaj «Ojtzqinka chʼintl» toj xnaqʼtzbʼil lu.
b Qa el tiʼn jun xuʼj tal tej naʼmxtoq tel tnikʼ tiʼj Jehová, mintiʼ tuʼn ttzaj bʼaj tkʼuʼj tuʼnju taj Jehová tuʼn tkubʼ tnajsaʼn til. Kkanetel mas tqanil tuʼna tiʼj jlu toj xnaqʼtzbʼil tok tbʼi: «¿Tiʼ in tzaj tqʼamaʼn Tyol Dios tiʼjju tuʼn tel kyiʼn xuʼj kyal?», aju at toj plaj «Ojtzqinka chʼintl» toj xnaqʼtzbʼil lu.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
