Ximana tiʼj jun txubʼaj in bʼaj tchʼexpuʼn tiʼj tal tuʼn t-xiʼ toj tja xnaqʼtzbʼil. In nok tkeʼyin qa otoq bʼaj bañarin tal ex qa saq t-xbʼalun tok. Tuʼn jlu mintiʼxix in tzaj yabʼil tiʼj kʼwal ex in nel kynikʼ txqantl tiʼj qa in che ximen tman tiʼj. Ax jlu in bʼaj qiʼj, kʼujlaʼn qoʼ tuʼn Jehová ex taj tuʼn tbʼaj qsaqin qibʼ ex tuʼn tten tbʼanel qximbʼetz. Qa ma bʼaj qsaqin qibʼ, jaku tzaj tbʼanel qe tuʼn ex jaku che yolin xjal bʼaʼn tiʼj Dios.

1. ¿Alkye tten jaku bʼaj qsaqin qibʼ?

In tzaj tqʼamaʼn Jehová jlu qe: «Che okxe xjan» (1 Pedro 1:​16). Tuʼn qok te xjan, nim toklen tuʼn tbʼaj qsaqin qibʼ ex tuʼn tel qikʼun tkyaqil nya bʼaʼn. Tuʼn qten saq, il tiʼj tuʼn qbañarin, tuʼn tbʼaj qsaqin qxbʼalun, qja, qkar ex tkyaqilju at qe. Ax ikx in qo onin tuʼn tbʼaj saqet Ja te Chmabʼil. Qa ma bʼant tkyaqil jlu quʼn, jakulo tzʼonin kyiʼj txqantl tuʼn tjaw kynimsaʼn Jehová (2 Corintios 6:​3, 4).

2. ¿Alkyeqe nya bʼaʼn il tiʼj tuʼn kyel qikʼun tuʼn qten saq?

In tzaj tqʼoʼn Tyol Dios consej lu qe: «Qtxʼjoʼmel tkyaqilju in tzʼilsante qchibʼjal ex in tzʼilsante qanmi» (2 Corintios 7:1). Tuʼntzunju, in nok tilil quʼn tuʼn tel qikʼun tkyaqilju jaku bʼaj tzʼilsante qxmilal ex qximbʼetz. Ex tuʼnju qaj tuʼn ttzalaj Jehová quʼn tukʼilju in kubʼ qximen, in nok tilil quʼn tuʼn tel qikʼun nya bʼaʼn ximbʼetz (Salmo 104:​34). Ax ikx, in nok tilil quʼn tuʼn t-xi qqʼamaʼn tbʼanel yol (uʼjinktza Colosenses 3:8).

¿Alkye junjuntl tiʼchaq jaku bʼaj tzʼilsante qxmilal ex qximbʼetz? Ateʼ junjun tiʼchaq jaku bʼaj kytzʼilsaʼn qxmilal. Tuʼntzunju, mintiʼ in qo sichʼin, mintiʼ in najbʼen t-xaq cocaína quʼn, mintiʼ in najbʼen droga quʼn ex mintiʼ in chex qkʼaʼn qʼanbʼil qa nya il tiʼj. Qa ma che el qikʼun tiʼchaq lu, in nok qxqʼuqin qxmilal ex in nok qqʼoʼn toklen qchwinqlal. Ax ikx, mintiʼ tuʼn qsaqchan tiʼj qtzʼalbʼil ex mintiʼ tuʼn tok qkeʼyin pornografía tuʼntzun qten saq twitz Dios (Salmo 119:​37; Efesios 5:5). Kwestlo jaku tzʼela te jun xjal tuʼn tkyaj ttzaqpiʼn tkyaqil jlu, pero taj Jehová tuʼn tonin tiʼj (uʼjinktza Isaías 41:​13).

 QO JYON MAS TQANIL

3. In jaw qnimsaʼn Jehová aj tbʼaj qsaqin qibʼ

Aj tjaw quʼjin qe ley xi tqʼoʼn Jehová kye aj Israel, in nel qnikʼ tiʼj qa taj tuʼn qten saq moqa ẍnuʼl. Kyuʼjinktze Éxodo 19:​10 ex 30:​17 a 19, ex che yoline kyiʼj xjel lu:

• ¿Tiʼ in tzaj kyxnaqʼtzaʼn versículo lu qe tiʼj t-ximbʼetz Jehová at tiʼjju tuʼn tbʼaj qsaqin qibʼ?

• ¿Tiʼ jaku tzʼonin qiʼj tuʼn kukx qten saq?

In xi tiʼn ambʼil tuʼn tbʼaj qsaqin qibʼ ex il tiʼj tuʼn tok tilil quʼn. Pero noq jaxku tumel in qo anqʼin, qa at qpwaq moqa mintiʼ, il tiʼj tuʼn tbʼant quʼn. Kyqʼonke kywitze tiʼj VIDEO ex che yolin tiʼj xjel lu:

• Qa ma tzʼok kykeʼyin xjal qa saq qiʼj ex qe tiʼchaq qʼiʼn quʼn toj pakbʼabʼil, ¿jakupe tzʼonin jlu kyiʼj tuʼn tok kyqʼoʼn toklen Jehová?

4. Bʼaʼn tuʼn tkyaj ttzaqpiʼna qe vicio

Qa in sichʼina, qa in najbʼen droga tuʼna moqa o naqʼeta tuʼn t-xi tkʼaʼna junjun qʼanbʼil, ojtzqiʼnlo tuʼna qa kwest tuʼn tkyaj ttzaqpiʼna vicio lu. Pero qa ma ximana tiʼj alkyeqe nya bʼaʼn o tzaj tiʼja tuʼn vicio lu, jaku tzʼonin tiʼja tuʼn tkyaj ttzaqpiʼna. Kyuʼjinktze Mateo 22:​37 a 39 ex che yoline kyiʼj xjel:

• ¿Tiʼ nya bʼaʼn jaku tzaj tiʼj tamiwbʼil jun xjal tukʼil Jehová qa in sichʼin moqa in najbʼen droga tuʼn?

• ¿Ex tiʼ nya bʼaʼn jaku tzaj kyiʼj toj tja moqa kyiʼj junjuntl xjal?

Ximana tiʼj tiʼ jaku bʼant tuʼna tuʼn tkubʼ tiʼj jun vicio tuʼna. a Kyqʼonke kywitze tiʼj VIDEO.

Kyuʼjinktze 2 Corintios 4:7 ex che yoline kyiʼj xjel lu:

• Qa ma naqʼet jun xjal tuʼn tnaʼn Dios, tuʼn tuʼjin tiʼj Biblia ex tuʼn tbʼet kyoj chmabʼil, ¿jakupe tzʼonin jlu tiʼj tuʼn tten tipumal tuʼn tkubʼ tiʼj jun vicio tuʼn? ¿Tiquʼn in kubʼ t-ximana jlu?

 5. Bʼaʼn tuʼn tel tikʼuna yaẍbʼil ex qe nya bʼaʼn ximbʼetz

Kyuʼjinktze Colosenses 3:5 ex che yoline kyiʼj xjel lu:

• ¿Tiquʼn ojtzqiʼn quʼn qa tzʼil in nela toj twitz Jehová aju pornografía, sexteo ex aju tuʼn tsaqchan jun xjal tiʼj ttzʼalbʼil?

• ¿Tojpe tumel aj ttzaj tqʼamaʼn Jehová qe tuʼn tel qikʼun tkyaqil nya bʼaʼn? ¿Tiquʼn?

Ojtzqinka tzeʼn jaku kubʼ kyiʼj nya bʼaʼn ximbʼetz quʼn. Kyqʼonke kywitze tiʼj VIDEO.

Ajbʼen jun techel tuʼn Jesús tuʼn ttzaj t-xnaqʼtzaʼn qe qa il tiʼj tuʼn tok tilil quʼn tuʼn qten saq twitz Dios. Kyuʼjinktze Mateo 5:​29 ex 30, ex che yoline tiʼj xjel lu:

• Mintiʼ tqʼama Jesús tuʼn tok qbʼinchaʼn nya bʼaʼn qiʼj, sino oʼkx tqʼama tuʼn tbʼant junjun tiʼ quʼn. ¿Tiʼ il tiʼj tuʼn tbʼant quʼn tuʼn tel qikʼun nya bʼaʼn ximbʼetz? b

Qa in nok tilil tuʼna tuʼn tkyaj ttzaqpiʼna jun nya bʼaʼn, jaku tzʼok qeʼ tkʼuʼja tiʼj qa in tzalaj Jehová tuʼnju in nok tilil tuʼna. Kyuʼjinktze Salmo 103:​13 ex 14, ex che yoline tiʼj xjel lu:

• ¿Jakupe che onin texto lu tiʼja tuʼn kukx tok tilil tuʼna tuʼn tkubʼ tiʼj jun nya bʼaʼn?

 TOJ CHʼIN YOL

In tzalaj Jehová quʼn aj tbʼaj qsaqin qibʼ, aj tten tbʼanel qximbʼetz ex tbʼanel qmod.

Aju ma qo yolin tiʼj

• ¿Tiquʼn nim toklen tuʼn qten saq?

• ¿Tiʼ jaku bʼant quʼn tuʼn tbʼaj qsaqin qibʼ?

• ¿Tiʼ jaku bʼant quʼn tuʼn tel qikʼun nya bʼaʼn ximbʼetz ex nya bʼaʼn bʼinchbʼen?