XNAQʼTZBʼIL 46
¿Tiquʼn bʼaʼn tuʼn t-xi tqʼamaʼna te Jehová tuʼn tajbʼena te ex tuʼn tbautisarina?
Aj t-xi tqʼamaʼna te Jehová tuʼn tajbʼena te, kxel ttziyena toj jun naʼj Dios qa oʼkx kkʼulila te ex qa kbʼel tqʼoʼna tajbʼil tnejel toj tanqʼibʼila (Salmo 40:8). Ajtzun tbautisarina, kbʼel tyekʼina kywitz txqantl qa o txi ttziyena jun tyola te Jehová. Aj t-xi qtziyen tuʼn qajbʼen te, atzunju mas nim toklen, tuʼnju jaku chʼexpaj qanqʼibʼil tuʼn. Pero, ¿tiʼ jaku tzʼonin tiʼja tuʼn t-xi tqʼamaʼna te Jehová tuʼn tajbʼena te?
1. ¿Tiʼ jaku tzʼonin tiʼja tuʼn t-xi tqʼamaʼna te Jehová tuʼn tajbʼena te?
Qa kʼujlaʼn Jehová tuʼna, kʼonil tiʼja tuʼn t-xi ttziyena tuʼn tajbʼena te (1 Juan 4:10, 19). In tzaj tqʼamaʼn Tyol Dios jlu: «Kykʼujlamtzune Qman Dios tuʼn tkyaqil kyanmiye, tuʼn tkyaqil kykʼuʼje, tuʼn tkyaqil kynabʼle, ex tuʼn tkyaqil kyipumale» (Marcos 12:30). In kubʼ qyekʼin qkʼujlabʼil tiʼj Jehová tukʼilju in bʼant quʼn ex tukʼilju in xi qqʼamaʼn. Ik tten jlu ik tzeʼn jun qʼa tukʼil jun txin, qa at-xix kʼujlabʼil kyxol, ok che kbʼel mojeʼ. Ax ikx qe, qa axix tok kʼujlaʼn Jehová quʼn, in xi qqʼamaʼn tuʼn qajbʼen te ex in qo bautisarin.
2. ¿Alkyeqe kʼiwlabʼil in tzaj tqʼoʼn Jehová kye xjal o che bautisarin?
Aj tbautisarina, ktela kyxol toj tja Jehová aqeju in che tzalaj. Ax ikx, kbʼel tnaʼna tkʼujlabʼil Jehová toj nimku tten ex kbʼel tnaʼna qa mas nqayin toka ttxlaj (uʼjinktza Malaquías 3:16-18). Nya oʼkx kʼokel Jehová te Ttata, sino ax ikx che tel ttzika ex titzʼina twitz tkyaqil txʼotxʼ, aqeju kʼujlaʼn Jehová kyuʼn ex kʼokel kʼujlaʼna kyuʼn (uʼjinktza Marcos 10:29, 30). Noqtzun tuʼnj, naʼmxtoq tbautisarina, nim toklen tuʼn tok tojtzqiʼna Jehová, tuʼn tok tkʼujlaʼna ex tuʼn tkubʼ tyekʼina qa qʼuqli tkʼuʼja tiʼj Tkʼwal. Ajtzun tbʼant jlu tuʼna, kxel ttziyena te Jehová tuʼn tajbʼena te. Qa ma bʼant tkyaqil jlu tuʼna ex qa ma bautisarina, ktzalajela tiʼj tanqʼibʼila te jumajx. In tzaj tqʼamaʼn Biblia jlu: «Aju aʼ lu o yekʼunjtz naj te jun yekʼbʼil tiʼj ju bʼyabʼl, aju ma qo klet tuʼn jaʼlo» (1 Pedro 3:21).
DQO JYON MAS TQANIL
Qo xnaqʼtzan tiʼj tiquʼn nim toklen tuʼn t-xi tqʼamaʼna te Jehová tuʼn tajbʼena te ex tuʼn tbautisarina.
3. Qkyaqilx bʼaʼn tuʼn qximen tiʼj alqe qo ajbʼel
Toj ojtxe tnam Israel, kubʼ kyximen junjun xjal qa jakutoq che ajbʼen te Jehová ex te nya ax tok dios Baal. Noqtzun tuʼnj, mlaytoq bʼant jlu kyuʼn. Tuʼntzunju, xi tqʼamaʼn Jehová te profeta Elías tuʼn kyxi tkawin. Kyuʼjinktze 1 Reyes 18:21 ex che yoline tiʼj xjel lu:
-
¿Tiʼ kubʼ kyximen aj Israel tuʼn tbʼant kyuʼn?
Ik tzeʼn kye aj Israel, ax ikx qe il tiʼj tuʼn tkubʼ qximen alqe qo ajbʼel. Kyuʼjinktze Lucas 16:13 ex che yoline kyiʼj xjel lu:
-
¿Tiquʼn mlay bʼant tuʼn qajbʼen te Jehová ex toj ax ambʼil in qo ajbʼen te jun xjal moqa te jun tiʼ?
-
¿Tiʼ il tiʼj tuʼn tbʼant quʼn tuʼn tkubʼ qyekʼin te Jehová qa oʼkx te in qo ajbʼen?
4. Ximana tiʼj jniʼ tkʼujlabʼil Jehová at tiʼja
O tzaj tqʼoʼn Jehová nimku tbʼanel oyaj qe. Yajtzun qe, ¿tiʼ jaku txi qqʼoʼn te? Kyqʼonke kywitze tiʼj VIDEO.
¿Tzeʼn o kubʼ tyekʼin Jehová tkʼujlabʼil tiʼja? Kyuʼjinktze Salmo 104:14 ex 15 ex 1 Juan 4:9 ex 10. Yajxitl che yoline kyiʼj xjel lu:
-
Tiʼj tkyaqil oyaj o tzaj tqʼoʼn Jehová teya, ¿alkye mas tbʼanel in nela toj twitza ex taja tuʼn t-xi tqʼoʼna chjonte tiʼj?
-
Aj t-ximana kyiʼj oyaj lu, ¿tiʼ in kubʼ tnaʼna tiʼj Jehová?
Aj ttzaj tqʼoʼn jun xjal jun oyaj qe aju qgan, qaj tuʼn tkubʼ qyekʼin qa in qo tzalaj tiʼj. Kyuʼjinktze Deuteronomio 16:17 ex che yoline kyiʼj xjel lu:
-
Aj t-ximana tiʼj tkyaqilju o tzaj tqʼoʼn Jehová teya, ¿atpe jun tiʼ taja tuʼn t-xi tqʼoʼna te? ¿Tiʼ jaku txi tqʼoʼna te?
5. Ktzajel tqʼoʼn Jehová nim kʼiwlabʼil teya qa ma txi tqʼamaʼna te tuʼn tajbʼena te
Ateʼ nim xjal in kubʼ kyximen qa che tzalajel qa ma ten jun kyoklen kyxol txqantl, qa ma ten nim kypwaq moqa ma tzʼetz jun tbʼanel kycarrera. Pero ¿axpe tok jlu? Kyqʼonke kywitze tiʼj VIDEO ex che yoline kyiʼj xjel lu:
-
Maske kʼujlaʼntoq fútbol tuʼn ermano setz yekʼin toj video, ¿tiquʼn kyaj ttzaqpiʼn?
-
Kubʼ t-ximen ermano tuʼn tajbʼen te Jehová ex kyaj ttzaqpiʼn fútbol. Tiʼ teya t-xim tiʼj, ¿bʼaʼnpe aju bʼant tuʼn? ¿Tiquʼn?
Tej naʼmxtoq tok apóstol Pablo te okslal, attoq jun tbʼanel tcarrera. Axpe ikx, otoq txi qʼoʼn xnaqʼtzbʼil te tuʼn jun tbʼanel aj xnaqʼtzal tiʼj kyley aj Judiy. Noqtzun tuʼnj, kyaj tqʼoʼn tkyaqil jlu tej tok te okslal moqa nimil. ¿Tzajpe tbʼis tiʼjju otoq kyaj tqʼoʼn? Kyuʼjinktze Filipenses 3:8 ex che yoline kyiʼj xjel lu:
-
¿Tiquʼn ok tqʼoʼn Pablo «ik tzaʼn tzʼis» tkyaqil tiʼchaq bʼant tuʼn tej naʼmxtoq tok te okslal?
-
¿Tiʼ kambʼet tuʼn apóstol Pablo te t-xelju otoq kyaj tqʼoʼn?
-
¿Maspe tbʼanel kʼokel tanqʼibʼila qa ma tzʼajbʼena te Jehová? ¿Tiquʼn in kubʼ t-ximana qa ikju?
Tej tok apóstol Pablo te okslal, kambʼet mas tuʼn twitzju kyaj tqʼoʼn.
AJU IN TZAJ KYQʼAMAʼN JUNJUN XJAL: «Naʼmx tkubʼ nximane tuʼn wajbʼene te Dios».
-
Tiʼ t-ximbʼetza tiʼj, ¿bʼaʼnpe tuʼn tajbʼena te Jehová? ¿Tiquʼn?
TOJ CHʼIN YOL
In nonin qkʼujlabʼil at tiʼj Jehová tuʼn t-xi qqʼamaʼn te tuʼn qajbʼen te ex tuʼn qbautisarin.
Aju ma qo yolin tiʼj
-
¿Tiquʼn tbʼanel tuʼn tok qkʼujlaʼn Jehová tuʼn tkyaqil qkʼuʼj ex tuʼn qajbʼen oʼkx te?
-
¿Alkye oyaj in tzaj tqʼoʼn Jehová kye xjal o che bautisarin?
-
¿Tajpe teya tuʼn tajbʼena te Jehová?
OJTZQINKA CHʼINTL
Qʼonka twitza tiʼj tiquʼn kubʼ t-ximen jun cantante ex jun deportista tuʼn kyajbʼen te Dios.
Kyxjel kuʼxun: ¿Tiʼ kbʼantel wuʼne tukʼil wanqʼibʼile?: Aj kyximen tiʼjju o kyaj (6:52)
Ojtzqinka tiquʼn bʼaʼn tuʼn tajbʼena te Jehová.
«¿Tiquʼn kxel qqʼamaʼn te Jehová tuʼn qajbʼen te?» (Aju Xqʼuqil, 15 te enero te 2010)
Qʼonka twitza tiʼj tzalajbʼil in kubʼ kynaʼn qeju in che ajbʼen te Jehová toj video lu.
Uʼjinktza tiʼ onin tiʼj jun xuʼj tuʼn kybʼant chʼixpubʼil tuʼn toj tanqʼibʼil toj xnaqʼtzbʼil tok tbʼi: «Toj nimku abʼqʼi kubʼ nxjeline tiquʼn o qo kubʼ bʼinchaʼn».
«Chʼexpaj kyanqʼibʼil tuʼn Tyol Dios» (Aju Xqʼuqil, 1 te noviembre te 2012)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
