Kubʼ tbʼinchaʼn Jehová jun tbʼanel najbʼil toj jun tembʼil aju Edén tbʼi. Attoq nim bʼech, tzeʼ ex txkup toj. Yajxitl kubʼ tbʼinchaʼn Dios aju tnejel xinaq, moqa ichan, aju Adán tbʼi. Tiʼj tquqil txʼotxʼ kubʼ tbʼinchaʼn ex xi t-xupin kyqʼiqʼ toj ttxaʼn. ¿Ojtzqiʼn tuʼna tiʼtl bʼaj? ¡Ok xjal te itzʼ! Xi tqʼamaʼn Jehová te Adán tuʼn tok t-xqʼuqin tbʼanel najbʼil lu ex tuʼn tok tqʼoʼn kybʼi kykyaqil qe txkup.

Xi tqʼoʼn Jehová jun kawbʼil nim toklen te Adán. Xi tqʼamaʼn jlu te: «Jaku txi tloʼna twitz alkyexku tzeʼ, pero miʼn xi tloʼna twitz jun tzeʼ tuʼnju nim toklen. Qa ma txi tloʼna twitz tzeʼ lu, ok kkyimela».

Tej tbʼet ambʼil, tqʼama Jehová jlu: «Kbʼel nbʼinchaʼne jun onil te Adán». Tuʼntzunju, tzaj twatl Adán tuʼn ex ajbʼen jun tbʼaqil tuʼntzun tbʼant jun t-xuʼjil tiʼj. Eva tbʼi xuʼj ok, moqa qya. A Adán tukʼil Eva e ok te tnejel ja xjal. ¿Tiʼ tnaʼ Adán tej tok tqʼoʼn twitz tiʼj t-xuʼjil? Nimxix  jaw tzalaj, tuʼntzunju tqʼama: «¡Tbʼanel aju ma bʼant tuʼn Jehová tiʼj jun nbʼaqile! ¡Ya at jun xjal ik tzeʼn weye!».

Xi tqʼamaʼn Jehová te Adán ex Eva tuʼn tten nim kykʼwaʼl ex tuʼn tnoj twitz txʼotxʼ kyuʼn. Tajtoq tuʼn kyaqʼunan junx toj tzalajbʼil tuʼn tok Txʼotxʼ kyuʼn te jun tbʼanel najbʼil. Iktoq kʼokel Txʼotxʼ ik tzeʼn jun tbʼanel parque, ik tzeʼn Edén. Pero nya ik bʼajju. ¿Tiquʼn? Ok qo xnaqʼtzal tiʼj toj juntl xnaqʼtzbʼil.