A Jehová Bʼinchal qe. Kubʼ tbʼinchaʼn tkyaqil tiʼchaq: aʼyeju qʼanchaʼl ex qeju mintiʼ qʼanchaʼl. Tej naʼmxtoq tkubʼ tbʼinchaʼn Jehová aju qʼanchaʼl, tnejel e kubʼ tbʼinchaʼn nimxix anjel. ¿Ojtzqiʼn tuʼna alkyeqe anjel? Xjal qe e kubʼ tbʼinchaʼn Jehová ex xewbʼaj qe ik tzeʼn te. Mlay qil Jehová nix qe anjel. Aju tnejel anjel kubʼ tbʼinchaʼn Jehová ok te onil te. Onin tiʼj Jehová tuʼn kykubʼ bʼinchet qe cheʼw, qe planeta ex qe txqantl tiʼchaq. In qo anqʼin toj jun kyxol qeju planeta lu, aju Txʼotxʼ.

Tej tbʼet ambʼil, kubʼ tbʼinchaʼn Jehová Txʼotxʼ tuʼn kyanqʼin txkup ex qe xjal twitz. Bʼant tuʼn tuʼn tul tqan qʼij tibʼaj Txʼotxʼ. Ex e kubʼ tbʼinchaʼn witz, mar ex qe nim aʼ.

¿Tiʼ bʼaj yajxitl? Tqʼama Jehová jlu: «Kbʼel nbʼinchaʼne itzaj, kʼul ex tzeʼ». Iktzun tten tzaj chʼiy nimku wiq lobʼj, itzaj ex bʼech twitz txʼotxʼ. Ax ikx e kubʼ tbʼinchaʼn Jehová nimku wiq txkup: aqeju in che lipen twitz kyaʼj, aqeju in che nadarin toj aʼ ex qeju in xi kyjakʼun kykʼuʼj twitz txʼotxʼ. E kubʼ tbʼinchaʼn qe tal txkup ik tzeʼn qe ẍik ex qe nimaq txkup ik tzeʼn elefant. ¿Alkye teya txkup mas tbʼanel toj twitz?

Xitzun tqʼamaʼn Jehová jlu te tnejel anjel: «Kbʼel qbʼinchaʼn xjal». Junxitl qe xjal kywitz txkup. Jaku bʼant junjuntl tiʼchaq kyuʼn, jaku che yolin, jaku che tzeʼn ex jaku che naʼn Dios. Jaku che xqʼuqin  tiʼj txʼotxʼ ex kyiʼj txkup. ¿Bʼiʼn tuʼna alkye tnejel xjal? Qo xnaqʼtzal tiʼj.