Darío tbʼi juntl rey ok toj tnam Babilonia ex jun xjal te tnam Media. El tnikʼ tiʼj qa nim toklen Daniel, tuʼntzunju, xi tqʼoʼn toklen Daniel kyibʼaj txqantl xjal toj tnam. Tzaj kyqʼoj xjal lu tiʼj Daniel ex kyajbʼiltoq tuʼn tkubʼ kybʼyoʼn. Ojtzqiʼntoq kyuʼn qa in naʼn Daniel Dios oxe maj toj jun qʼij te Jehová, tuʼntzunju xi kyqʼamaʼn jlu te Darío: «Aya tat rey, bʼaʼn tuʼn tten jun ley jatumel in tzaj tqʼamaʼn tuʼn kynaʼn kykyaqil xjal dios oʼkx teya. Qa at jun mintiʼ ma txi bʼinte ley lu, kbʼelex qʼet toj kyjul león». Tbʼanel ela ximbʼetz lu toj twitz Darío ex kubʼ tqʼoʼn twi tqʼabʼ tiʼj ley.

Tej tok tbʼiʼn Daniel qa at jun akʼaj ley, xiʼ tja. Tej tkanin tja, kubʼ ẍmejeʼ ex naʼn Dios te Jehová ttzi jun ventan jaqoʼn. Aqeju nya bʼaʼn xjal noq minabʼen e okx toj tja Daniel tej tzmatoq in naʼn Dios. Jun rat i eʼx qʼamalte te Darío: «Mintiʼ ma bʼin Daniel teya. In naʼn Dios oxe maj toj qʼij te Tdios». Tbʼanel otoq tzʼela Daniel toj twitz Darío ex nyatoq tajbʼil tuʼn tkubʼ bʼyoʼn. Ximen tiʼj toj enter qʼij tiʼtoq jaku bʼant tuʼn tuʼntzun miʼn tkubʼ bʼyoʼn, noqtzun tuʼnj, mlaytoq kubʼ tchʼixpuʼn aju ley otoq kubʼ tqʼoʼn twi tqʼabʼ tiʼj. Tuʼntzunju, xi tqʼamaʼn tuʼn tkux xoʼn Daniel toj kyjul león.

Toj qonikʼan aju, nimxix ximen Darío tiʼj Daniel ex  mintiʼ ok twatl. Toj juntl qʼij, xi ojqelan ttzi jul, kux tqʼoʼn twitz ttzi jul ex xi tqʼamaʼn jlu te Daniel: «¡Daniel! ¿Mape kleta tuʼn Tdiosa?».

Tbʼi Darío jun tqʼajqʼajel wibʼaj. Atoq Daniel ex xi ttzaqʼweʼn jlu te: «Ma lamet kytziʼ león tuʼn t-anjel Jehová, ex mintiʼx jun tiʼ sok kybʼinchaʼn wiʼje». Nimxix jaw tzalaj Darío ex xi tqʼamaʼn tuʼn tjatz qʼiʼn Daniel toj jul. Mintiʼx chʼin nya bʼaʼn otoq tzʼok bʼinchaʼn tiʼj Daniel kyuʼn león. Yajxitl, xi tqʼamaʼn rey jlu: «¡Bʼaʼn tuʼn tkux kyxoʼne qe xjal toj kyjul león, aʼyeju ma tzʼok kybʼinchaʼn nya bʼaʼn tiʼj Daniel!». Tej kykux xoʼn xjal toj jul, jurat naj i ex waʼn kyuʼn león.

Etz tqʼoʼn Darío tqanil lu kye xjal toj tnam: «Kykyaqil il tiʼj tuʼn t-xi kynimen Tdios Daniel. Ma klet Daniel tuʼn toj kytzi león».

¿Yajtzun teya? ¿In naʼna Dios te Jehová tkyaqil qʼij ik tzeʼn te Daniel?