Toj jun qonikʼan ok jun twitzikʼ aj kawil Nabucodonosor ex ok ten ximel tiʼj. Tuʼnju nimxix tzaj bʼaj tkʼuʼj tuʼn jlu, ya mintiʼtl tzaj twatl. E tzaj ttxkoʼn qe chman ex xi tqʼamaʼn jlu kye: «Kychikʼbʼantze aju nwitzikʼe sok». Atzun kye chman kyqʼama: «Qʼamantza qeye tiʼ twitzikʼa sok tat rey». Noqtzun tuʼnj, xi tqʼamaʼn Nabucodonosor jlu kye: «¡Miʼn! Aqeye kyqʼamantze weye tiʼ sok nwitzkʼaʼne, qa mintiʼ saj kyqʼamaʼne weye, che kbʼel nbʼyoʼne». Juntl maj xi kyqʼamaʼn chman jlu te aj kawil: «Qʼamantza qeye aju sok twitzkʼaʼna, kxeltzun qqʼamaʼne teya tiʼ t-xilen». Xitzun ttzaqʼweʼn aj kawil jlu kye: «Noq kyaje tuʼn kysbʼune wiʼje. ¡Kyqʼamantze tiʼ sok nwitzkʼaʼne!». Xi kytzaqʼweʼn te: «Mintiʼ jun xjal at twitz Txʼotxʼ jaku bʼant tuʼn aju in tzaj tqanina. Mlayx bʼant».

Tzaj nimxix tqʼoj Nabucodonosor ex tuʼntzunju xi tqʼamaʼn tuʼn kykubʼ bʼyoʼn kykyaqil xjal aj nabʼil toj tnam. Ax ikx iltoq tiʼj tuʼn tkubʼ bʼyet Daniel, Sadrac, Mesac ex Abednego. Xitzun tqanin Daniel tuʼn t-xi tqʼoʼn aj kawil chʼintl ambʼil te. E oktzun ten Daniel ex qe tamiw naʼl Dios te Jehová tuʼntzun tonin kyiʼj. ¿Tiʼ bʼant tuʼn Jehová?

Xi tyekʼin Jehová twitzikʼ Nabucodonosor te Daniel toj jun witzikʼj ex xi tqʼamaʼn te tiʼ t-xilen. Toj juntl qʼij, xiʼ Daniel yolil tukʼil tmajen aj kawil ex xi tqʼamaʼn jlu te: «Miʼn kubʼ kybʼyoʼne mi jun xjal at tnabʼil. Jaku txi nchikʼbʼaʼne twitzikʼ aj kawil». Xi qʼiʼn Daniel tuʼn majen tuʼn t-xiʼ yolil twitz Nabucodonosor. Xi tqʼamaʼn Daniel jlu te aj kawil: «Ma tzaj tyekʼin Dios teya aju kbʼajel toj ambʼil tzul. Atzun twitzikʼa lu: ma tzʼok tqʼoʼna twitza tiʼj jun matij tilbʼilal qʼan pwaq ttxʼotxʼil twiʼ, saq pwaq ttxʼotxʼil ttzi t-xukʼ ex qe tqʼabʼ, qʼan kʼuxbʼil ttxʼotxʼil tkʼuʼj ex qe tkux, ex kʼuxbʼil qe tqan smoʼn tukʼil xoqʼl. Tej tbʼaj jlu, etz tolj jun abʼj tiʼj jun witz ex atz kubʼ tzʼaq tibʼaj tqan tilbʼilal. Kubʼ pax tilbʼilal ex ok te quq, ex xi qʼiʼn tuʼn kyqʼiqʼ. Atzunte abʼj ok te jun matij witz aju kubʼ noj twitz Txʼotxʼ tuʼn».

 Yajxitl, tqʼama Daniel jlu: «Aju twitzikʼa in tzaj tyekʼin jlu: aju twiʼ tilbʼilal qʼan pwaq ttxʼotxʼil, atz in yolin tiʼj tkawbʼila. Aju piẍ saq pwaq ttxʼotxʼil atz in yolin tiʼj jun kawbʼil tzul tiʼjxi tkawbʼila. Atzunju qʼan kʼuxbʼil in nok te techel juntl kawbʼil tzul yajxitl ex atz kkawil tibʼaj tkyaqil twitz Txʼotxʼ. Aju juntl kawbʼil tzul nim tipumal ktel ik tzeʼn kʼuxbʼil. Ex tuʼn tkubʼ bʼaj, ktel jun kawbʼil kbʼel tpan tibʼ, ktel junjun plaj nim tipumal ik tzeʼn kʼuxbʼil ex atzun juntl plaj mintiʼxix tipun ktel ik tzeʼn xoqʼl. Atzun abʼj in nok te witz, atz in yolin tiʼj Tkawbʼil Dios, aju kbʼel tnajsaʼn txqantl kawbʼil ex atzunte kukx ktel te jumajx».

Kubʼtzun ẍmejeʼ Nabucodonosor twitz Daniel ex kubʼ mokʼeʼ twiʼ twitz txʼotxʼ, ex tqʼama: «A Tdiosa saj qʼamante teya aju witzikʼ. Mintiʼ juntl Dios at ik tzeʼn te». Mintiʼ kubʼ bʼyoʼn Daniel tuʼn Nabucodonosor, sino xi tqʼoʼn toklen te nejenel kywitz kykyaqil xjal at kynabʼil ex te kawil toj tnam Babilonia. ¿Ma tzʼok tqʼoʼna twitza tiʼj alkye tten tzaj ttzaqʼweʼn Jehová tnaʼj Dios Daniel?