Jaw jyoʼn Jeremías tuʼn Jehová tuʼn tok te tsanjel toj tnam Judá. Xi tqʼamaʼn te tuʼn t-xiʼ pakbʼal kye xjal toj tnam aju, ex tuʼn t-xi tqʼamaʼn kye tuʼn miʼn tkubʼ kybʼinchaʼntl nya bʼaʼn. Noqtzun tuʼnj, xi tqʼamaʼn Jeremías jlu te Jehová: «Tzma kʼwaʼlx qiʼne, mintiʼ in bʼant nyoline kywitz xjal». Xi ttzaqʼweʼn Jehová jlu te: «Miʼn tzaj xobʼa, chin onile tiʼja ex kxel nqʼamaʼne teya aju kxel tqʼamaʼna».

Xi tqʼamaʼn Jehová te Jeremías tuʼn kyok tchmoʼn tij xjal toj tnam tuʼntzun tkubʼ tpaʼn jun xar kywitz ex tuʼn t-xi tqʼamaʼn jlu kye: «Axtzun jlu kbʼajel tiʼj Jerusalén». Tej tbʼant jlu tuʼn Jeremías, tzaj nimxix kyqʼoj tij xjal. At jun pal Pasjur tbʼi ok ten bʼiyel Jeremías ex e okx tqʼoʼn qe tqʼabʼ ex qe tqan kyoj kabʼe tzʼlam. Mintiʼ yukch Jeremías toj tkyaqil qonikʼan. El tzaqpiʼn Jeremías tuʼn Pasjur tojxi juntl qʼij. Tqʼamatzun Jeremías jlu: «Ya mlay tzikʼxtl wuʼne. Ya mlay chinxtle pakbʼal». Noqtzun tuʼnj, ¿ikpe bʼantju tuʼn? Miʼn. Kubʼ ten ximel tiʼj ex tqʼama: «Aju tyol Jehová at toj wanmiye ik tten ik tzeʼn qʼaqʼ. Mlay kyaj ntzaqpiʼne tuʼn npakbʼane». Iktzun tten kukx pakbʼan Jeremías.

Tej tikʼ nim abʼqʼi, ok juntl aj kawil tuʼn tkawin toj tnam Judá. El ikʼun tpakbʼabʼil Jeremías kyuʼn pal ex kyuʼn qeju in kyqʼamaʼn qa tsanjel Dios qe ex nya ik ttenju. Tuʼntzunju xi kyqʼamaʼn jlu kye xjal nim kyoklen: «Bʼaʼn tuʼn tkyim xjal lu». Xi tqʼamaʼn Jeremías jlu: «Qa ma chin kubʼ kybʼyoʼne, kbʼel kybʼyoʼne jun xjal mintiʼ til. Oʼkx in xi nqʼamaʼne aju in tzaj tqʼamaʼn Jehová weye ex nya aju in nul toj nwiʼye». Tej tok kybʼiʼn xjal nim kyoklen jlu, kyqʼama: «Nya bʼaʼn tuʼn tkyim xjal lu».

Kukx pakbʼan Jeremías, noqtzun  tuʼnj, toj ambʼil lu tzajxix kyqʼoj xjal nim kyoklen ex xi kyqʼamaʼn te aj kawil tuʼn tkubʼ bʼyoʼn Jeremías. Xi tqʼamaʼn aj kawil kye qa jaku tzʼok kybʼinchaʼn alkyexku kyajbʼil tiʼj. Tuʼntzunju, kubʼ kytzyuʼn ex kux kyxoʼn toj jun jul nim t-xeʼ ex nojni tuʼn xoqʼl tuʼntzun tkyim Jeremías toj. Chebʼe chebʼe xi mulqʼaj Jeremías toj xoqʼl.

Tzajtzun jun xjal at toklen twitz aj kawil aju Ébed-Mélec tbʼi, xi tqʼamaʼn jlu te aj kawil: «Aʼyeju xjal nim kyoklen ma kux kyxoʼn Jeremías toj jun jul. Qa ma kyaj qqʼoʼn atztzun, ok kkyimel». Xitzun tqʼamaʼn aj kawil te Ébed-Mélec tuʼn kyxi tiʼn 30 xjal tuʼn tjatz qʼiʼn Jeremías kyuʼn toj jul. Mintiʼ xi tqʼoʼn Jeremías ambʼil tuʼn tkyaj ttzaqpiʼn tpakbʼabʼil, maske ok bʼinchaʼn nya bʼaʼn tiʼj. Yajtzun teya, ¿taja tuʼn toka ik tzeʼn te?