Tej tbʼet ambʼil, ok Belsasar te aj kawil toj tnam Babilonia. Toj jun qonikʼan, ok jun nintz waʼn kye mil xjal e tzaj txkoʼn. E tzaj ttxkoʼn Belsasar qe xjal mas nim kyoklen toj tnam. Xi tqʼamaʼn Belsasar kye tmajen tuʼn tetz kyiʼn qe vas qʼan pwaq kytxʼotxʼil, aʼyeju i ex tiʼn Nabucodonosor toj tja Jehová. E ajbʼen qe vas lu kyuʼn tuʼn kykʼan toj ex e ok ten nimsal qe kydios. Noq minabʼen, qʼanchaʼlix tqʼabʼ jun xinaq ex ok ten tzʼibʼil junjun yol mintiʼ in nel nikʼbʼaj kyiʼj twitz ja atz jatumel in che waʼn.

Tzaj xobʼxix Belsasar. E tzaj ttxkoʼn qe chman ex xi ttziyen jlu kye: «Aju ktzajel qʼamante tiʼ kyxilen yol lu, kxel nqʼoʼne toklen te toxin xjal mas nim toklen toj tnam Babilonia». Tuʼntzunju, ok tilil kyuʼn chman tuʼn tel kynikʼ tiʼj tqanil, pero ni jun bʼant tchikʼbʼet tuʼn. Pontzun jun reina ex xi tqʼamaʼn te: «At jun xjal Daniel tbʼi in xitoq tchikʼbʼaʼn tiʼ kyxilen qe twitzikʼ Nabucodonosor ex qeju tyol kwest tuʼn tel nikʼbʼaj kyiʼj. A jaku tzaj qʼamante tiʼ kyxilen qe yol lu».

Pontzun Daniel tukʼil rey. Tej tpon, xi tqʼamaʼn Belsasar te: «Qa ma jaw tuʼjina qe yol lu ex qa ma tzʼel tnikʼa kyiʼj, kxel nqʼoʼne jun uwj qʼan pwaq ttxʼotxʼil teya ex kʼokel nqʼoʼna te toxin xjal mas nim toklen toj Babilonia». Xi ttzaqʼweʼn Daniel te: «Nya waje qe oyaj. Pero kxel nqʼamaʼne teya tiʼ kyxilen qe yol lu. Aju ttata Nabucodonosor, nimtoq in jaw tnimsan tibʼ ex xi t-xnaqʼtzaʼn Jehová te tuʼn tkubʼ tin tibʼ. Ojtzqiʼn tuʼna tkyaqilju ikʼ tiʼj, maske ikju, ax ikx teya mintiʼ ma txi tnimana Jehová. Ma che ajbʼen tvas qʼan pwaq kytxʼotxʼil tuʼna, aʼyeju ateʼ toj tja tuʼn tkʼana vin kyoj. Tuʼntzunju, ma kubʼ ttzʼibʼin Dios qe yol lu: MENÉ, MENÉ, TEQUEL ex PARSÍN. A kyxilen yol lu qa kbʼel tiʼj tnam Babilonia kyuʼn xjal te Media ex te Persia, atzun teya kʼelel qʼiʼn toklena te rey».

Kubʼ kyximen xjal qa mlaytoq kubʼ tiʼj tnam Babilonia. Xqʼuqintoq taʼ tnam kyuʼn matij muro ex tuʼn jun nim aʼ  nim t-xeʼ. Pero tojx qonikʼan aju, e ok tzoqpaj xjal te Media ex te Persia tiʼj Babilonia. Xi tbʼinchaʼn Ciro, aju aj kawil te Persia, tbʼe aʼ tuʼntzun kyokx tsoldad ttzi tpwertil tnam. Tej kykanin tsoldad ttzi tpwertil tnam, ¡jaqoʼn qe pwert! Jun rat naj e ok tzoqpaj soldad tiʼj tnam, kubʼ tiʼj kyuʼn ex kubʼ kybʼyoʼn aj kawil. Oktzun Ciro te aj kawil toj tnam Babilonia.

Toj tnejel abʼqʼi tkawbʼil Ciro xi tqʼoʼn tqanil lu: «Ma tzaj tqʼamaʼn Jehová weye tuʼn tjaw nbʼinchaʼne juntl maj tja toj Jerusalén. Qa at jun aj Judiy taj tuʼn tonin, jaku txiʼ». Tuʼntzunju, nim aj Judiy e meltzʼaj toj kytxʼotxʼ tej otoqxi tzikʼ 70 abʼqʼi tkubʼlen xiten Jerusalén. Iktzun tten japun twi tyol Jehová. Ax ikx xi tqʼoʼntl Ciro qe vas qʼan pwaq kytxʼotxʼil ex aju saq pwaq kytxʼotxʼil, ex junjuntl tiʼchaq otoq che ex tiʼn Nabucodonosor toj tja Dios. ¿Mape tzʼok tqʼoʼn twitza tiʼj alkye tten ajbʼen Ciro tuʼn Jehová tuʼn tonin tiʼj ttnam?