Toj kʼloj xnaqʼtzbʼil lu kxel tzyet tuʼn quʼjin kyiʼj txʼolbʼabʼil e kubʼ tzʼibʼin toj yol griego. Ok kʼokel qqʼoʼn qwitz tiʼj qa atz ul itzʼj Jesús kyxol jun ja xjal mintiʼxix kypwaq toj jun tnam, ex aqʼunan tukʼil ttat, aju karpinter. A Jesús kʼokel te Kolel kye kykyaqil xjal. Jaw tskʼoʼn Jehová te tuʼn tok te aj Kawil toj Tkawbʼil toj kyaʼj. Qa ateʼ teya tkʼwaʼl, bʼaʼn tuʼn tonina kyiʼj tuʼn tel kynikʼ tiʼj qa jaw tjyoʼn Jehová qe toj tja Jesús tuʼntzun tjaw chʼiy toj tbʼanel. Chikʼbʼanxa kye qa ok t-xqʼuqin Jehová Jesús tej tajtoq Herodes tuʼn tkubʼ tbʼyoʼn. Mintiʼ jun tiʼ jaku tzʼel qʼinte ambʼil tuʼn tjapun twi t-ximbʼetz Jehová. Xnaqʼtzanxa kye qa jaw tjyoʼn Jehová Juan tuʼn tbʼaj tbʼinchaʼn tbʼe Jesús. Chikʼbʼanxa kye qa ok tkʼujlaʼn Jesús aju tnabʼil Jehová tej tzmatoq kʼwaʼlx ex qa ok qeʼ tkʼuʼj tiʼj onbʼil tzaj tqʼoʼn Dios te, ex nya tiʼjju tex t-ximbʼetz.