Ate Juan tkʼwaʼl Zacarías ex Elisabet. Ok tqʼoʼn Jehová toklen te aj sanjel ex ajbʼen tuʼn tuʼn t-xi tqʼamaʼn tqanil kye xjal qa chʼixtoq tul Mesías. Noqtzun tuʼnj, mintiʼ pakbʼan kyoj tnam nix kyoj ja te kʼulbʼil, sino atz toj tzqij txʼotxʼ. Nim xjal te Jerusalén ex te tkyaqil tnam Judá in cheʼxtoq bʼil Juan. In xitoq tqʼamaʼn Juan kye qa mintiʼ tuʼn tkubʼ kybʼinchaʼn xjal nya bʼaʼn tuʼntzun ttzalaj Dios kyiʼj. Tuʼntzunju, nim xjal ajtz tiʼj kyanmi tiʼj kybʼinchbʼen nya bʼaʼn ex jaw aʼ kywiʼ, moqa e bʼyan, tuʼn Juan toj aʼ te Jordán.

Nyatoq nim tiʼchaq at te Juan. In noktoq t-xbʼalumin tibʼ tukʼil ttzmal kamey ex in xi twaʼntoq qe ẍplon ex taʼl kabʼ toj tzeʼ. Kyajtoq xjal tuʼn tel mas kynikʼ tiʼj Juan. Axpe ikx qeju fariseo ex qe saduceo aju in jaw kynimsan kyibʼ, kyajtoq tuʼn tok kyqʼoʼn kywitz tiʼj. Tuʼntzunju xi tqʼamaʼn Juan jlu kye: «Il tiʼj tuʼn tajtz tiʼj kyanmiye ex kybʼinchame bʼaʼn. In kubʼ kyximane qa nim kyoklene tuʼnju tyajil Abrahán qeye, pero nya t-xilen jlu qa tkʼwaʼl Dios qeye».

Nim xjal in xitoq tqanin te Juan: «¿Tiʼ kbʼantel quʼne tuʼn ttzalaj Dios quʼne?». In xitoq ttzaqʼweʼn jlu kye: «Alkye at kabʼe tkamiẍ, qʼonx jun teju mintiʼ tkamiẍ». ¿Ojtzqiʼn tuʼna tiquʼn in xi tqʼamaʼntoq jlu kye? Tajtoq Juan tuʼn t-xi tyekʼin kye t-xnaqʼtzbʼen qa iltoq tiʼj tuʼn tok kykʼujlaʼn xjal tuʼn ttzalaj Dios kyiʼj.

Ax ikx xi tqʼamaʼn jlu kye qeju peyil pwaq: «Miʼn tzʼel kypeyine mastl tiʼj ju qʼamaʼmaj kyeye tuʼn ley». Ex xi tqʼamaʼn jlu kye soldad: «Miʼn che sbʼune ex miʼn che siʼmine yol kyiʼj xjal».

 Ax ikx qe pal ex qe aj Leví i eʼx keʼyilte Juan ex xi kyqʼamaʼn jlu te: «Kykyaqil xjal kyaj tuʼn tel kynikʼ tiʼja». Xi tqʼamaʼn Juan kye: «Aʼyine jun tqʼajqʼajel wibʼaj toj tzqij txʼotxʼ tuʼn t-xi nyekʼine kye xjal tuʼn kypon ttxlaj Jehová, ik tzeʼn kyaj tqʼamaʼn aj sanjel Isaías».

Kygantoq xjal aju in xitoq t-xnaqʼtzaʼn Juan kye, ex nim xjal kyajtoq tuʼn tel kynikʼ tiʼj qa atoq Juan Mesías. Tuʼntzunju xi tqʼamaʼn Juan jlu kye: «At jun mas nim toklen tzeʼn weye chʼix tul. Mintiʼ woklene tuʼn tel npujune qe t-xjabʼ. In jaw aʼ kywiʼ xjal wuʼne toj aʼ, atzun te o kjawil aʼ kywiʼ xjal tuʼn tukʼil xewbʼaj xjan».