Atz in nanqʼintoq txin María toj tnam Nazaret, toj Galilea, ex attoq t-xilen tukʼil Elisabet. Oktoq kbʼel mojeʼ María tukʼil jun karpinter, aju José tbʼi. Tej qʼiʼntoq qaq xjaw toklen ten tal Elisabet, kubʼ tyekʼin tibʼ anjel Gabriel twitz María ex xi tqʼamaʼn te: «In chin qʼolbʼene teya María, ma tzaj tyekʼin Jehová nimxix t-xtalbʼil tiʼja». Mintiʼ el tnikʼ tiʼjju tzaj tqʼamaʼn Gabriel te, tuʼntzunju xi tchikʼbʼaʼn anjel te: «Kʼokel ten jun tala ex qʼa aj tul itzʼj. Jesús tbʼi kʼokel tqʼoʼna. Kʼokel te aj kawil ex aju Tkawbʼil ktel te jun majx.

Xi tqʼamaʼn María te: «¿Tzeʼn tten tzul jun wale? Tuʼnju naʼmx in kubʼ tene tukʼil jun xinaq». Xi ttzaqʼweʼn Gabriel te: «Tkyaqil jaku bʼant tuʼn Jehová. Tzul xewbʼaj xjan tibʼaja ex tzul itzʼj jun tala. Ax ikx te Elisabet, aju at t-xilena tukʼil o tzʼok ten tal». Xitzun ttzaqʼweʼn María: «Aʼyine tmajen Jehová. Bʼaʼn tuʼn tbʼant wiʼje ik tzeʼn ma tzaj tqʼamaʼna».

 Xiʼ María visitarilte Elisabet toj jun tnam tjax kywi witz. Tej tpon, xi tqʼolbʼeʼn, ex tnaʼ Elisabet qa jaw yukch tal toj tkʼuʼj. Noj toj tanmi tuʼn xewbʼaj xjan ex tqʼama: «Ma tzaj kʼiwlaʼna tuʼn Jehová María. Jun tbʼanel woklene tuʼnju ma tzul aju tnan Qajaw wukʼile». Xi ttzaqʼweʼn María: «In jaw nnimsaʼne Jehová tukʼil tkyaqil wanmiye». Kyaj ten María oxe xjaw tukʼil Elisabet ex yajxitl meltzʼaj tja atz toj Nazaret.

Tej tok tbʼiʼn José qa otoq tzʼok ten tal María, ya nya tajtoq tuʼn tkubʼ mojeʼ tukʼil. Noqtzun tuʼnj, kubʼ tyekʼin tibʼ jun anjel toj twitzikʼ ex xi tqʼamaʼn te: «Miʼn tzaj xobʼa tuʼn tkubʼ mojeʼya tukʼil María. Mintiʼ ma kubʼ tbʼinchaʼn jun nya bʼaʼn». Kyjuʼtzun kubʼ mojeʼ José tukʼil María ex xi tiʼn tja.