Tej qʼiʼntoq junlo abʼqʼi tukʼil mij, moqa nikʼjan, in pakbʼan Jesús, kubʼ t-ximen tuʼn tbʼant jun tiʼ nim toklen tuʼn. ¿Alkyetoq tuʼn kyjaw tjyoʼn tuʼn kyaqʼunan junx tukʼil ex tuʼn kykubʼ nej kywitz kʼloj okslal? Naʼmxtoq tbʼant jlu tuʼn, jyon onbʼil tukʼil Jehová. Tuʼntzunju xiʼ twiʼ jun witz tjunalx ex naʼn Dios enter qonikʼen. Te prim toj juntl qʼij, e ok tchmoʼn Jesús junjun t-xnaqʼtzbʼen ex jaw tjyoʼn 12 t-apóstol. ¿Bʼiʼn tuʼna tiʼ kybʼi? Atzun kybʼi jlu: Pedro, Andrés, Santiago, Juan, Felipe, Bartolomé, Tomás, Mateo, Santiago tkʼwaʼl Alfeo, Tadeo, Simón ex Judas Iscariote.

In cheʼxtoq 12 apóstol tukʼil Jesús. I eʼx t-xnaqʼtzaʼn tzeʼn tuʼn kypakbʼan, yajxitl i eʼx tsamaʼn pakbʼal kyjunalx. Ax ikx, xi tqʼoʼn Jehová kyipumal tuʼn kyetz juʼẍ kyuʼn toj kyxmilal xjal ex tuʼn kykubʼ kyqʼanin qe yabʼ.

E ok tqʼoʼn Jesús qeju 12 apóstol te tamiw ex qʼuqlitoq tkʼuʼj kyiʼj. Kubʼ kyximen qe fariseo qa mintiʼtoq kyoklen apóstol ex mintiʼtoq jun tiʼ ojtzqiʼn kyuʼn. Noqtzun tuʼnj, nya iktoq te Jesús t-ximbʼetz  kyiʼj. Otoq che bʼaj t-xnaqʼtzaʼnxix tuʼn tbʼant aqʼuntl kyuʼn. Che teltoq tukʼil Jesús toj ambʼil nim toklen toj tanqʼibʼil. Jun techel, che teltoq tukʼil tej naʼmxtoq tkyim ex aj tjaw anqʼin. Chʼixme kykyaqil tzajni qeʼ te Galilea, ik tzeʼn te Jesús. Ex ateʼ junjun attoq kyxuʼjil.

Nyatoq tzʼaqli qe apóstol, tuʼntzunju i el tzpet. At maj in xi kyqʼamaʼn kyyol nya toj tumel ex junjuntl maj nyatoq bʼaʼn aju in jaw kyjyoʼn. Mintiʼxixtoq kypasens. Axpe ikx in che qʼojin tiʼj alkye at mas nim toklen kyxol. Noqtzun tuʼnj, tbʼanel xjal qe ex kʼujlaʼn Jehová kyuʼn. Aʼyetoq tuʼn kyok te tsimyentil kʼloj okslal aj tmeltzʼaj Jesús toj kyaʼj.