Jakutoq che qʼanit yabʼ tuʼn Jesús ex jakutoq che jaw anqʼin kyimni tuʼn. Ax ikx, jakutoq weʼ kyqʼiqʼ ex jbʼal tuʼn. Tej tbʼaj naʼn Jesús Dios twi witz, kutz tkeʼyin Jesús toj mar te Galilea ex ok tkeʼyin qa otoq tzaj nim kyqʼiqʼ. In che yukintoq t-apóstol jun bark tukʼil tkyaqil kyipumal tuʼn miʼn kyxi qʼiʼn tuʼn nim kyqʼiqʼ. Tuʼntzunju kuʼtz Jesús ex xi bʼet tibʼaj aʼ tuʼn tpon toj bark. Tej t-xi kykeʼyin qe apóstol in bʼet jun xjal tibʼaj aʼ, e tzaj xobʼxix. Noqtzun tuʼnj, xi tqʼamaʼn Jesús kye: «Aʼyine. Miʼn che xobʼe».

Xi tqʼamaʼn Pedro te: «Tat, qa aya, qʼamantza weye tuʼn nxiʼye tukʼila». Xi tqʼamaʼn Jesús te: «¡Tzaja!». Tuʼntzunju kuʼtz Pedro toj bark ex xi bʼet tibʼaj aʼ tuʼn tpon tukʼil Jesús toj kyqʼiqʼ jbʼal otoq tzaj. Noqtzun tuʼnj, tej chʼixtoq tpon Pedro tukʼil Jesús, tzaj xobʼ tuʼnju xi tkeʼyin in mulqʼaj aʼ tuʼn kyqʼiqʼ. Tnaʼ qa in xi mulqʼajtoq toj aʼ ex jaw ẍchʼin: «¡Tat, chin tkloma!». Tzyet tqʼabʼ tuʼn Jesús ex xi tqʼamaʼn te: «¿Tiquʼn xjawjeʼ tkʼuʼja? ¿Mintiʼpe qʼuqbʼil tkʼuʼja?».

Jax Jesús ex Pedro toj bark, ex weʼ aju nim kyqʼiqʼ otoq tzaj. ¿In bʼant t-ximet tuʼna tiʼ kynaʼ qe apóstol? Kyqʼama jlu: «Ax tok, aya Tkʼwaʼl Dios».

Nya oʼkx maj jlu weʼ aju xitbʼil in tzaj tuʼnx twitz txʼotxʼ tuʼn Jesús. Toj juntl maj, tej in bʼettoq Jesús kyukʼil t-apóstol toj bark tjlajxi mar, ikʼ jtan Jesús ttxaʼn bark. Tej in jtantoq, tzaj nimxix kyqʼiqʼ jbʼal. Aju aʼ in jaw mulqʼaj in pon tzʼaqtoq tiʼj bark, ex noj bark tuʼn aʼ. E jaw ẍchʼin qe apóstol tuʼn tjaw kykʼasen Jesús tej kyqʼama: «¡Xnaqʼtzal, qo kyimele! ¡Qo tonintza!». Jawtzun weʼ Jesús ex xi tqʼamaʼn te mar: «¡Miʼn qʼajta! ¡Takekuya!». Toj ambʼil aju, weʼ kyqʼiqʼ ex mar. Xitzun tqanin Jesús kye t-apóstol: «¿Mintiʼpe qʼuqbʼil kykʼuʼje at?». Ex xi tqʼamaʼn jun te juntl: «¡Axpe ikx kyqʼiqʼ ex mar in xi kybʼiʼn tyol!». El kynikʼ qe apóstol tiʼj qa ma tzʼok qeʼxix kykʼuʼj tiʼj Jesús, mintiʼtoq tuʼn kytzaj xobʼ tuʼn alkyexku tiʼ.