Attoq oxe tbʼanel tamiw Jesús aʼyeju in che anqʼintoq toj tnam Betania. Atoq Lázaro, María ex Marta, kyitzʼintoq kyibʼ. Jun qʼij, attoq Jesús tjlajxi nim aʼ Jordán, ex xi kysamaʼn María ex Marta jun tqanil nim toklen te: «Ma tzajxix tyabʼ Lázaro. Najsama, tzaj naja». Noqtzun tuʼnj, mintiʼ xiʼ Jesús toj ambʼil aju. Yon kabʼe qʼij ex yajxitl xi tqʼamaʼn kye t-xnaqʼtzbʼen: «Qoʼqe toj Betania. Ma tzikʼ jtan Lázaro, ex ma chinxe kʼaselte». Xi kyqʼamaʼn qe t-xnaqʼtzbʼen te: «Qa in jtan Lázaro, ¿okpe kbʼanix?». Tuʼntzunju xi tqʼamaʼntl Jesús kye: «Ma kyim Lázaro».

Tej tpon Jesús toj Betania, otoq tzikʼ kyaje qʼij tkuxlen maquʼn Lázaro. Nim xjal otoq che pon qʼuqbʼal tkʼuʼj Marta ex María. Ok tbʼiʼn Marta qa otoq pon Jesús ex jun rat naj xiʼ yolil tukʼil. Xi tqʼamaʼn te: «Tat, noqwit attoqa tzalu, mitiʼwtlo xkyim nxibʼene». Xi ttzaqʼweʼn Jesús te: «Ok kjawil anqʼin t-xibʼena. ¿Qʼuqli tkʼuʼja tiʼjju in xi nqʼamaʼne teya Marta?». Xi ttzaqʼweʼn te: «Qʼuqli nkʼuʼje tiʼj qa kjawil anqʼin aj kyjaw anqʼin kyimni». Xitzun tqʼamaʼntl Jesús te: «Wuʼne che jawil anqʼin kyimni ex aʼyine qʼol chwinqlal».

Ax ikx, xiʼ Marta qʼamalte te María: «Ma tzul Jesús tzalu». Jun rat xiʼ María jatumel taʼ Jesús, ex i ex lepeʼ nim xjal tiʼj. Tej tpon tukʼil, kubʼ tzʼaq María t-xe tqan ex mintiʼ weʼ tuʼn toqʼ. Xi tqʼamaʼn te: «Tat, noqwit attoqa tzalu, mintiʼwtlo ma kyim qxibʼene». El tnikʼ Jesús tiʼj qa nimtoq kʼixkʼoj in kubʼ tnaʼn, ax ikx te jaw oqʼ. Ok kyqʼoʼn xjal kywitz tiʼj Jesús in noqʼ ex kyqʼama jlu: «At-xixtoq tkʼuʼj Jesús tiʼj Lázaro». Noqtzun tuʼnj, at junjun kubʼ kyxjelen: «¿Tiquʼn mintiʼ sonin tuʼn miʼn tkyim tamiw?». ¿Tiʼtoq kbʼantel tuʼn Jesús jaʼlo?

Xiʼ Jesús jatumel otoq tzʼokx maquʼn toj jun jul, ex toktoq jun abʼj ttziʼ tuʼn tjpet. Xi tqʼamaʼn kye: «Kyqʼimele abʼj». Xi tqʼamaʼn Marta te: «Malo tzuwix tuʼnju ma tzikʼ kyaje qʼij tkyimlen». Noqtzun tuʼnj, el kyiʼn abʼj ttziʼ jul, ex ok ten Jesús naʼl Dios: «Tat, in xi nqʼoʼne chjonte teya tuʼnju in chin tzaj tbʼiʼna. Ojtzqiʼn wuʼne qa kukx in chin tzaj tbʼiʼna, noqtzun tuʼnj, in jaw tqʼajqʼajel nwiʼye tuʼntzun tok kybʼiʼn xjal qa tuʼna  ma chin tzaj tsamaʼna». Jawtzun ẍchʼin tukʼil nim tipumal: «¡Lázaro, ku tetza!». Noq minabʼen, bʼaj jun tiʼ tbʼanelxix: Etz Lázaro toj muqbʼil, bʼalqʼiʼn xbʼalun tiʼj. Xi tqʼamaʼn Jesús jlu kye: «Kyqʼimele xbʼalen tiʼj ex kytzaqpiʼnxe».

Nim kyxol xjal ok kyqʼoʼn kywitz tiʼj jlu ok qeʼ kykʼuʼj tiʼj Jesús, noqtzun tuʼnj, at junjun i eʼx qʼamalte kye fariseo. Atxix toj qʼij lu, bʼaj kyximen fariseo tuʼn tkubʼ kybʼyoʼn Lázaro ex Jesús. Jun kyxol qeju kabʼlaj apóstol, Judas Iscariote, xiʼ toj ewaj qanil kye fariseo: «¿Jteʼ jaku chin tzaj kychjoʼne qa ma chin onine kyiʼje tuʼn tkanet Jesús?». Xi kyqʼamaʼn te qa jakutoq txi kyqʼoʼn 30 saq pwaq te, ex tzaj tkʼamoʼn Judas jlu ex jyon tumel tuʼn t-xi tqʼoʼn Jesús kye.