Yajxi chʼintl tej tjaw aʼ twiʼ Jesús, xi ttzyet tuʼn tpakbʼan: «Aju Tkawbʼil Dios ma tzul laqʼeʼ». In che bʼettoq t-xnaqʼtzbʼen tukʼil toj tkyaqil tnam te Galilea ex Judea. Tej tmeltzʼaj Jesús toj ttnam aju Nazaret tbʼi, xiʼ toj ja te kʼulbʼil, jaw tjaqoʼn aju uʼj kubʼ ttzʼibʼin Isaías ex jaw tuʼjin tukʼil tqʼajqʼajel twiʼ: «T-xew Jehová at wukʼile, porke ma tzaj tqʼoʼn woklene tuʼn t-xi nqʼamaʼne aʼyeju tbʼanel tqanil at tuʼn». ¿Tiʼ t-xilen jlu? A t-xilen qa kyajtoq xjal tuʼn tok kyqʼoʼn kywitz kyiʼj qe milagr che kbʼantel tuʼn Jesús. Pero nya oʼkx tuʼn jlu tzaj tkʼamoʼn Jesús xewbʼaj xjan. Aju mas nim toklen, aju tuʼn tpakbʼan tiʼj tbʼanel tqanil tiʼj Tkawbʼil Dios. Yajxitl, xi tqʼamaʼn jlu kye qeju in che bʼin tiʼj: «Jaʼlo ma japun ju yol lu».

Yajxitl, xiʼ Jesús toj mar te Galilea. Atz ok tkeʼyin kyaje t-xnaqʼtzbʼen aʼyeju tzyul pescad qe ex xi tqʼamaʼn kye: «Che lepetze wiʼje, ex che okel nqʼoʼne tzyul xjal». Aju kybʼi xjal lu Pedro, Andrés, Santiago ex Juan. Jun rat kyaj kytzaqpiʼn kyaqʼun te tzyul pescad ex e ok lepeʼ tiʼj. E bʼet toj tkyaqil Galilea in che pakbʼan tiʼj Tkawbʼil Jehová. E pakbʼan kyoj ja te kʼulbʼil, kyoj kʼaybʼil ex kyoj bʼe. Nim xjal in che ok lepeʼtoq kyiʼj noq jaxku tumel in cheʼx. Ok kybʼin kykyaqil xjal tqanil tiʼj Jesús, axpe ikx aʼyeju xjal najli qeʼ toj tnam Siria aju najchaq taʼ.

Tej tbʼet ambʼil, xi tqʼoʼn Jesús kyipumal junjun t-xnaqʼtzbʼen tuʼn kyqʼanit yabʼ kyuʼn ex tuʼn kyetz juʼẍ toj kyanmi xjal. Junjuntl, i eʼx tukʼil pakbʼal kyojele tnam ex kojbʼil. Ax ikx i eʼx jun kʼloj xuʼj tukʼil, aʼyeju kukx e ajbʼen te. Kyxol qe jlu attoq María Magdalena, Juana, Susana ex junjuntl, aʼyeju in xi kyqʼoʼntoq aju at tajbʼen te Jesús ex kye t-xnaqʼtzbʼen.

Tej otoqxi che bʼaj t-xnaqʼtzaʼn Jesús qeju e ok lepeʼ tiʼj, i eʼx tsamaʼn pakbʼal. Tej in che bʼettoq toj tnam Galilea, nim qe xjal e ok te t-xnaqʼtzbʼen Jesús ex jaw aʼ kywiʼ. Attoq nim xjal kyajtoq tuʼn kyok lepeʼ tiʼj Jesús, tuʼntzunju e ok tmojbʼaʼn ik tzeʼn awal ma bʼant tten tuʼn tjaw. Tqʼama jlu: «Che kubʼsane twitz Jehová tuʼn ttzaj tsamaʼn qe aqʼunal chmol twitz awal». Yajxitl, e jaw tjyoʼn 70 t-xnaqʼtzbʼen ex i eʼx  tsamaʼn kabʼele kybʼet pakbʼal toj tkyaqil tnam Galilea. In che yolintoq tiʼj Tkawbʼil Dios kye kykyaqil xjal. Tej kymeltzʼaj, kyajxixtoq tuʼn t-xi kyqʼamaʼn te Jesús aju otoq bʼant kyuʼn. Mlayxtoq bʼant jun tiʼ tuʼn Tajaw il tuʼn miʼn kypakbʼan.

Bʼiʼx kyaj bʼant tkyaqil tuʼn Jesús tuʼntzun kukx tbʼant aqʼuntl nim toklen kyuʼn t-xnaqʼtzbʼen aj tmeltzʼaj toj kyaʼj. Xi tqʼamaʼn jlu kye: «Kypakbʼanxe tbʼanel tqanil tiʼj Tkawbʼil Dios twitz tkyaqil Txʼotxʼ. Kyxnaqʼtzanxe Tyol Dios kye xjal ex tuʼn tjaw aʼ kywiʼ kyuʼne».