In neltoq ikʼen Jesús kyuʼn fariseo ex in che jyontoq tumel tuʼn ttzyet kyuʼn. In kyqʼamaʼntoq qa nya bʼaʼn tuʼn kykubʼ tqʼanen Jesús yabʼ toj qʼij sábado, tuʼnju atzun qʼij te ojlabʼil. Toj jun sábado, ok tkeʼyin Jesús jun xinaq, moqa ichan, moẍ in qanin tpwaq toj bʼe. Xitzun tqʼamaʼn kye t-xnaqʼtzbʼen: «Ok kʼokel kyqʼoʼn kywitze tiʼj alkye tten kʼonil tipumal Dios tiʼj xjal lu». Kubʼtzun ttzubʼen Jesús taʼl ttziʼ toj chʼin txʼotxʼ tuʼn tok te xoqʼel. Oktzun tsuʼn kyiʼj twitz xjal ex xi tqʼamaʼn te: «Ku txiʼya ex txʼajomel qe twitza toj tkubʼel aʼ te Siloam». Bʼant jlu tuʼn xjal ex bʼant tuʼn tkeʼyin tnejel maj toj tanqʼibʼil.

Etz kywitz xjal tiʼj jlu ex kyqʼama: «¿Atzun xjal jlu in qanin tpwaq? ¿Moqa junxitl xjal jlu aju chʼixme ax keʼyin ik tzeʼn te juntl?». Xi ttzaqʼweʼn kye: «Aʼyine in ul itzʼj moẍ». Xi kyqanin xjal te: «¿Ex tiquʼn nya moẍtl taʼya jaʼlo?». Xi ttxʼolbʼaʼn kye aju otoq bʼaj. Xitzun kyiʼn tuʼn tyolin kyukʼil fariseo.

Xi ttxʼolbʼaʼn xjal lu kye fariseo: «Ma tzʼok tsuʼn Jesús xoqʼel kyiʼj nwitze ex ma tzaj tqʼamaʼn weye tuʼn kyel ntxʼajoʼne. Ma bʼant jlu wuʼne ex jaʼlo jaku bʼant nkeʼyine». Kyqʼama qe fariseo kyxolx: «Qa in qʼanen Jesús toj sábado, nya atz tzajne tipumal tukʼil Dios». Noqtzun tuʼnj, in kyqʼamaʼntoq junjuntl: «Qa nya atz tzajni tipumal tukʼil Dios, ¿tzeʼn tten jaku che qʼanet yabʼ tuʼn?».

Tzaj kytxkoʼn qe fariseo qe ttat xjal lu ex xi kyqanin kye: «¿Alkye tten in bʼant tkeʼyin kykʼwaʼle jaʼlo?». In che tzaj xobʼtoq ttat  tuʼnju otoq kyqʼama qe fariseo qa oktoq kʼelex kylajoʼn alkyexku xjal toj ja te kʼulbʼil qa ma tzʼok qeʼ tkʼuʼj tiʼj Jesús. Kyjuʼtzun xi kytzaqʼweʼn: «Mintiʼ ojtzqiʼn quʼne. Kyqaninxe te». Xi kyqanin fariseo junjuntl xjelbʼitz te xjal lu, ex xi ttzaqʼweʼn: «Ma txi nqʼamaʼne tkyaqilju ojtzqiʼn wuʼne. ¿Tiquʼn kukx in tzaj kyqanine weye?». Tzaj kyqʼoj qe fariseo tuʼn jlu ex etz kylajoʼn atztzun.

Tej tbʼaj jlu, xiʼ Jesús keʼyil xjal lu ex xi tqanin te: «¿Atpe qʼuqbʼil tkʼuʼja tiʼj Mesías?». Xi ttzaqʼweʼn xjal te: «Naqwit ojtzqiʼn twitz wuʼne, jakulo tzʼok qeʼ nkʼuʼje tiʼj». Xi tqʼamaʼn Jesús te: «Aʼyine Mesías». ¿Nyapetzulo kubʼ tyekʼin Jesús tbʼanel tmod tukʼil xjal moẍ? Qʼanet tuʼn ex onin tiʼj tuʼn tten qʼuqbʼil tkʼuʼj.