Tej chʼixtoq tul kanin Xjan Qʼij toj abʼqʼi 32, e ul meltzʼaj apóstol pakbʼal. Otoq che sikt, kyjuʼtzun i ex tiʼn Jesús toj jun bark tuʼn kypon toj Betsaida tuʼntzun kyajlan chʼin. Noqtzun tuʼnj, tej chʼixtoq kypon ttzi aʼ, xi tkeʼyin Jesús nim xjal otoq che ex lepeʼ kyiʼj. Tajtoq tuʼn tten tjunalx kyukʼil t-apóstol, noqtzun tuʼnj, tzaj qʼaqʼen tkʼuʼj kyiʼj xjal. E kubʼ tqʼanin qe yabʼ ex xi t-xnaqʼtzaʼn nimku tiʼchaq kye. Xi t-xnaqʼtzaʼn Tkawbʼil Dios kye toj junjun qʼij. Te qale, xi kyqʼamaʼn apóstol te: «Bʼalo ma tzaj waʼyij kyiʼj xjal. Qʼamanxa kye tuʼn kyxiʼ jyol chʼin kywa».

Noqtzun tuʼnj, xi ttzaqʼweʼn Jesús kye: «Nya il tiʼj tuʼn kyxiʼ. Kyqʼonxe chʼin kywa tzalu». Xi kyqanin qe apóstol te: «¿Taja tuʼn qxiʼye loqʼel kywa?». Tqʼama Felipe, jun kyxol apóstol, jlu: «Maske at nim qpwaqe, mlayx laqʼet kywa nimku xjal quʼne».

Xi tqanin Jesús jlu kye: «¿Jniʼ qwa at?». Xi ttzaqʼweʼn Andrés te: «At jweʼ wabʼj ex kabʼe tal pescad. Noqtzun tuʼnj, noq chʼin jlu kye nimku xjal». Xi tqʼamaʼn Jesús te: «Bʼaʼn tuʼn kytzaj kyiʼne wabʼj ex pescad». Yajxitl, xi tqʼamaʼn kye xjal tuʼn kykubʼ qeʼ toj kʼul toj kʼlojin kyten te 50 ex te 100 kybʼet. E tzajtzun tiʼn qe wabʼj ex qe pescad, jax tkeʼyin twitz kyaʼj ex ok ten naʼl Dios. Ex xitzun tqʼoʼn wabʼj kye t-apóstol tuʼn t-xi kysipen kye kykyaqil xjal. Aʼyeju 5,000 xinaq ateʼtoq atztzun, ax ikx qe xuʼj ex qe kʼwaʼl, e waʼn tzmaxi tej kynoj. Tej kybʼaj waʼn, jaw kychmoʼn apóstol aju wabʼj mintiʼ bʼaj tuʼntzun miʼn tbʼaj yajet nix chʼin. ¡E noj 12 chiʼl wabʼj  kyuʼn! ¿Nyapetzulo jun milagr jlu jaku qo jaw labʼin tiʼj?

E jaw labʼin kykyaqil xjal tiʼj jlu ex tuʼntzunju kyajtoq tuʼn tok Jesús te aj kawil kyibʼaj. Noqtzun tuʼnj, nya tajtoq Jehová tuʼn tok te aj kawil tuʼnju naʼmxtoq tpon ambʼil ex ojtzqiʼntoq jlu tuʼn Jesús. Kyjuʼtzun xi tqʼamaʼn kye xjal tuʼn kyaj kyja ex xi tqʼamaʼn kye t-apóstol tuʼn kyxiʼ toj juntl plaj te mar te Galilea. I eʼx toj bark, ex jax Jesús twiʼ jun witz tjunalx. ¿Tiquʼn? Tuʼnju tajtoq tuʼn tnaʼn Dios te Ttat. Kukxtoq in jyon Jesús ambʼil tuʼn tnaʼn Dios maske attoq nim taqʼun.