Tej tikʼ chʼin ambʼil tej otoq bʼaj Xjan Qʼij, e meltzʼaj Jesús ex qe t-xnaqʼtzbʼen toj Galilea. Toj kybʼe e ikʼ aj toj Samaria ex e kubʼ weʼ nqayin tiʼj tnam Sicar, jatumel taʼtoq xoch kyaj tbʼinchaʼn Jacob. Atz kyaj ten Jesús atztzun tuʼn tojlan, atzun kye t-xnaqʼtzbʼen i eʼx loqʼel wabʼj toj tnam.

Pon jun xuʼj, moqa qya, ttzi xoch tuʼn tjatz tiʼn aʼ ex xi tqʼamaʼn Jesús te: «Qʼontza chʼin nkʼaye aʼ». Xi tqanin xuʼj te: «¿Tiquʼn in yolina wukʼile, tuʼnju te Samaria qine? Mintiʼ in che yolin xjal judiy kyukʼil aj Samaria». Xi tqʼamaʼn Jesús te: «Noqwit ojtzqiʼn nwitze tuʼna, mawtlo tzaj tqanina tkʼaya weye ex mawtlo txi nqʼoʼne aʼ itzʼ teya». Xitzun tqanin xuʼj te: «¿Tiʼ taja tuʼn ttzaj tqʼamaʼna? Mintiʼ pulbʼil qʼiʼn tuʼna tuʼn tjatz tiʼna aʼ». Xi ttzaqʼweʼn Jesús: «Alkyeju ma txi kʼante aʼ kxel nqʼoʼne te, mlay tzaj juntl maj kʼaj tiʼj». Tqʼama xuʼj: «Tat, qʼontza aʼ lu weye».

Yajxitl xi tqʼamaʼn Jesús te: «Txiʼya, ex txkontza tchmila». Xi ttzaqʼweʼn xuʼj te: «Mintiʼ we nchmil». Xi tqʼamaʼn Jesús te: «Ax tok, tuʼnju jweʼxi tchmila o ten, ex jaʼlo in nanqʼina tukʼil jun xjal naʼmx tmojeʼya tukʼil». Xi ttzaqʼweʼn xuʼj te: «In kubʼ nximane qa aya tsanjel Dios. In kubʼ kyximen nxjalile qa jaku qo kʼulune te Dios twi witz lu, atzun kyeye, in kymaʼne qa oʼkx toj Jerusalén tuʼn qkʼulun te Dios. Bʼalo aj tul Mesías, ate ktzajel xnaqʼtzante qeye tzeʼn tuʼn qkʼulune te Dios». Xitzun tqʼamaʼn Jesús jun tiʼ te aju naʼmxtoq t-xi tqʼamaʼn te jun xjal: «Aʼyine Mesías».

Xi ojqelan xuʼj toj ttnam ex xi tqʼamaʼn kye xjal te Samaria:  «Bʼalo ma kanet Mesías wuʼne. Ma tzaj tqʼamaʼn weye tkyaqilju o nbʼinchaye. Kytzaje ex qoʼqe». I extzun xjal ttzi xoch tukʼil xuʼj tuʼn tok kybʼin aʼyeju t-xnaqʼtzbʼil Jesús.

Yajxitl, xi kyqanin xjal te Samaria te Jesús tuʼn tkyaj ten kyukʼil. Ten kabʼe qʼij toj tnam aju ex xi t-xnaqʼtzaʼn nim tiʼchaq kye xjal, ex nimku ok qeʼ kykʼuʼj tiʼj. Xitzun kyqʼamaʼn xjal te xuʼj te Samaria: «Tej sok qbʼiʼne xjal lu, qʼuqli qkʼuʼje qa axix tok ate Klol kye xjal».