Otoqxi pakbʼan Juan tiʼj tqanil lu: «At jun mas nim toklen tzeʼn weye chʼix tul». Bʼalo qʼiʼntoq 30 abʼqʼi tuʼn Jesús, xiʼ toj tnam Galilea tuʼn tpon tzmax toj nim aʼ Jordán. Tzalu in jawtoq aʼ kywiʼ xjal tuʼn Juan. Ax ikx te Jesús tajtoq tuʼn jaw aʼ twiʼ tuʼn Juan, noqtzun tuʼnj, xi tqʼamaʼn Juan jlu te: «Nya aya tuʼn tjaw aʼ twiʼya wuʼne. Aʼyine il tiʼj tuʼn nbʼyane tuʼna». Xi ttzaqʼweʼn Jesús jlu te: «Taj Jehová tuʼn tjaw aʼ nwiʼye tuʼna». Iktzun tten e kuʼx toj nim aʼ Jordán ex bʼiʼx kuʼx bʼaj t-xmilal Jesús toj aʼ tuʼn Juan.

Tej otoqxi jatz Jesús toj aʼ, naʼn Dios te Jehová. Tojtzun ambʼil aju, jaqet kyaʼj ex kuʼtz t-xew Dios tibʼaj ik tzeʼn jun paloma. Tzajtzun yolin Jehová tzmax toj kyaʼj ex tqʼama jlu: «Atzun Nkʼwaʼle jlu kʼujlaʼnxix wuʼne, in chin tzalaje tiʼj».

Iktzun tten tzaj tkʼamoʼn Jesús t-xew Jehová, ex axtzun ambʼil jlu ok te Cristo moqa Mesías. Jaʼlo jakutoq txi tzyet taqʼun otoq tzaj tqʼoʼn Jehová tuʼn tbʼant tuʼn tzalu twitz Txʼotxʼ.

Tej tzmatoq tjawlen aʼ twiʼ Jesús, xiʼ toj tzqij txʼotxʼ ex ten 40 qʼij atz. Tej tmeltzʼaj, xiʼ keʼyilte Juan. Tej tok tkeʼyin Juan kyjaʼtoq tpon Jesús ttxlaj tqʼama jlu: «Lu tzul ju Tal T-ẍneʼl Dios aju nneʼl qʼiʼn kyil xjal tuʼn». Tqʼama jlu tuʼn tonin kyiʼj xjal tuʼntzun tel kynikʼ tiʼj qa a Jesús Mesías. ¿Bʼiʼn tuʼna tiʼ tzaj tiʼj Jesús tej attoq toj tzqij txʼotxʼ? Qo xnaqʼtzan tiʼj.