Xiʼ Jesús ex qe t-apóstol twi witz Olivos ex e ikʼx toj chqʼajlaj te Cedrón. Tej otoq tzikʼ tmij aqʼbʼil, ex otoq tijen xjaw. Tej kypon toj tqan bʼech te Getsemaní, xi tqʼamaʼn Jesús kye: «Ax che tenkje tzalu ex che xqʼuqine». El laqʼeʼ chʼin Jesús kyiʼj ex kubʼ mejeʼ. Otoq tzaj nimxix tbʼis ex ok ten naʼl Dios te Jehová: «Bʼaʼn tuʼn tbʼant aju tajbʼila». Tzajtzun tsamaʼn Jehová jun t-anjel tuʼn tok tqʼuqbʼaʼn tkʼuʼj Jesús. Yajxitl, meltzʼaj Jesús jatumel ateʼ oxe t-apóstol ex e kanet tuʼn in che jtantoq. Tuʼntzunju xi tqʼamaʼn kye: «¡Che weʼktze! Nya a ambʼil jlu tuʼn kyjtane. Ma pon ambʼil tuʼn nxi qʼoʼne toj kyqʼabʼ aj qʼoj wiʼje».

Toj ambʼil aju, pon Judas kyukʼil nimku xjal qʼiʼntoq spad kyuʼn ex tzeʼ. Ojtzqiʼntoq tuʼn jatumel jakutoq kanet Jesús tuʼn, tuʼnju otoq ten nim maj tukʼil ex qe t-apóstol toj Getsemaní. Otoq txi tqʼamaʼn Judas kye soldad tuʼn t-xi tyekʼin kye alkyetoq Jesús. Xiʼ jatumel taʼ Jesús ex xi tqʼamaʼn te: «Jeʼk, Xnaqʼtzal», ex el ttzʼubʼin twitz. Xi tqʼamaʼn Jesús te: «Judas, ¿ma chinx tqʼoʼna toj kyqʼabʼ xjal tukʼil jun tzʼubʼaj?».

Xi laqʼeʼ chʼintl Jesús ex xi tqanin kye xjal: «¿Alkye in che jyone tiʼj?». Xi kyqʼamaʼn te: «In qo jyone tiʼj Jesús aju aj Nazaret». Xi ttzaqʼweʼn kye: «Aʼyine». E ajtz laqʼeʼ chʼintl ex e kubʼ tzʼaq twitz txʼotxʼ. Xi tqanin Jesús juntl maj kye: «¿Alkye in che jyone tiʼj?». Ex xi kytzaqʼweʼn juntl maj te: «In qo jyone tiʼj Jesús aju aj Nazaret». Xi ttzaqʼweʼn Jesús kye: «Ma txi nqʼamaʼne kyeye qa aʼyine. Tuʼntzunju kyqʼonxe ambʼil kye xjal lu tuʼn kyel bʼet».

Tej tok tqʼoʼn Pedro twitz tiʼjju in bʼaj, jatz tiʼn jun spad ex el ttxʼemen tẍkyin Malco, aju tmajen nejenel kye pal. Noqtzun tuʼnj, ok tmakoʼn Jesús tẍkyin ex kubʼ tqʼanin. Xitzun tqʼamaʼn te Pedro: «Kʼuʼnxa spad. Tuʼnju qa ma qʼojina tukʼil spad, kkyimela tuʼn spad». Tzyet Jesús kyuʼn soldad ex ok kykʼalon  qe tqʼabʼ, ex e el oq qe t-apóstol. Xitzun kyiʼn xjal Jesús twitz pal aju Anás tbʼi. Xi tqanin nim xjelbʼitz te Jesús ex xi tsamaʼn tja nejenel kye pal aju Caifás tbʼi. Noqtzun tuʼnj, ¿tiʼ bʼaj kyiʼj apóstol?