Xi kybʼiʼn apóstol kawbʼil xi tqʼoʼn Jesús, aju tuʼn t-xi kyiʼn tbʼanel tqanil twitz tkyaqil Txʼotxʼ. Toj abʼqʼi 47, xi kyqʼamaʼn erman te Antioquía te Pablo ex Bernabé tuʼn kyxiʼ pakbʼal kyoj junjuntl tnam. Kykabʼil e pakbʼan tuʼn tkyaqil kykʼuʼj tej kybʼet toj tkyaqil Asia Menor, kyoj tnam ik tzeʼn Derbe, Listra ex Iconio.

E pakbʼan Pablo ex Bernabé kye kykyaqil xjal: kye qʼinun, kye mebʼa, moqa prow, kye kuʼxun ex kye tij xjal. Nim xjal xi kykʼamoʼn aju axix tok tiʼj Jesucristo. E pakbʼan Pablo ex Bernabé te jun aj kawil te tnam Chipre, aju Sergio Paulo tbʼi, pero ok tilil tuʼn jun chman, moqa aj yoʼẍ, tuʼn kymaqet. Xi tqʼamaʼn Pablo jlu te: «In qʼojin Jehová tiʼja». Tojx ambʼil aju, bʼiʼx kyaj moẍ chman. Tej tok tqʼoʼn aj kawil Sergio Paulo twitz tiʼj jlu, ok te okslal.

E pakbʼan Pablo ex Bernabé jaxku tumel: kyojele ja, kyoj plas, kyoj bʼe ex kyoj ja te kʼulbʼil. Jun maj, kubʼ kyqʼanin jun kox toj tnam Listra. Aqeju xjal ok kyqʼoʼn kywitz tiʼj jlu, kubʼ kyximen qa dios Pablo tukʼil Bernabé ex ok tilil kyuʼn tuʼn kykʼulin kywitz. Mintiʼ xi kyqʼoʼn Pablo ex Bernabé ambʼil tuʼn tbʼant jlu kyuʼn, sino xi kyqʼamaʼn jlu kye: «¡Oʼkx tuʼn qkʼulin twitz Dios! Atzun qeye xjal qoʼye». Ex kanintzun junjun xjal judiy, aʼyeju kubʼ kykʼuʼj xjal kyuʼn tuʼn kyok te aj qʼoj tiʼj Pablo. Ok kyxoʼn xjal abʼj tiʼj Pablo ex etz kyjukʼuʼn tiʼjxi tnam ex kubʼ kyximen qa otoq kyim Pablo. ¡Pero itzʼxtoq Pablo! Jurat naj e ul junjun erman onilte ex xi kyiʼn juntl maj toj tnam. Yajxitl meltzʼaj Pablo toj Antioquía.

Toj abʼqʼi 49, xiʼ Pablo juntl maj pakbʼal kyoj txqantl tnam. Xiʼ visitaril kye erman toj Asia Menor ex yajxitl xi tiʼn tbʼanel tqanil kyoj tnam mas najchaq atz Europa. Xiʼ toj tnam Atenas, Éfeso, Filipos, Tesalónica ex junjuntl lugar. Toj ambʼil lu, xiʼ Silas, Lucas ex jun kuʼxun tukʼil, aju Timoteo  tbʼi. E aqʼunan junx tuʼn ttzaj tzyet tuʼn kyten junjun kʼloj okslal ex tuʼn kykyuwset. Ax ikx ten Pablo toj tnam Corinto ex kyaj ten jun abʼqʼi tukʼil qaq xjaw atztzun tuʼn tchʼiy qʼuqbʼil kykʼuʼj erman. In pakbʼantoq, in qʼoʼntoq xnaqʼtzbʼil ex in kubʼ ttzʼibʼintoq qe tal uʼj tuʼn kyxi samet kye nim kʼloj okslal. Ax ikx aqʼunan tiʼj aqʼuntl aju tuʼn kybʼant ja xbʼalun tuʼn. Tej tikʼ ambʼil, meltzʼaj Pablo toj tnam Antioquía.

Tej tbʼet ambʼil, toj abʼqʼi 52, xiʼ Pablo toxin maj tqan pakbʼal, aju xi tzyet toj plaj txʼotxʼ te Asia Menor. Bʼaj tbʼetin tkyaqil plaj te jawni ex japun toj tnam Filipos ex kuʼtz tuʼn tkuʼpin toj tnam Corinto. Ax ikx kyaj ten Pablo nim ambʼil toj tnam Éfeso tuʼn t-xi tqʼoʼn xnaqʼtzbʼil, tuʼn kyqʼanit yabʼ tuʼn ex tuʼn tonin kyiʼj kʼloj okslal. Ax ikx etz tqʼoʼn chikʼbʼabʼil tkyaqil qʼij toj jun qʼobʼil chikʼbʼabʼil toj jun tja xnaqʼtzbʼil. Nim xjal xi kybʼiʼn jlu ex kubʼ kychʼixpuʼn kyanqʼibʼil. Tej otoqxi txi tpakbʼan Pablo tbʼanel tqanil tiʼj Dios kyoj nimku tnam, xiʼ toj tnam Jerusalén.