Jun kuʼxun Timoteo kyxol kʼloj okslal te tnam Listra. Nya aj Judiy ttat, oʼkx te tnan aj Judiy. Eunice tbʼi tnan ex Loida tbʼi tyaʼ. Kykabʼil xi kyqʼoʼn xnaqʼtzbʼil tiʼj Jehová te Timoteo tej tzmatoq tal kʼwaʼl.

Tej t-xiʼ Pablo visitaril tnam Listra toj tkabʼ maj tqan xi pakbʼal, ok tqʼoʼn twitz tiʼj qa kʼujlaʼnxix qe erman tuʼn Timoteo ex qa tajbʼiltoq tuʼn tonin kyiʼj. Tuʼntzunju xi ttxkoʼn Pablo Timoteo tuʼn t-xiʼ tukʼil kyoj tbʼe. Tej tbʼet ambʼil, xi tqʼoʼn Pablo xnaqʼtzbʼil te Timoteo tuʼn tok te jun tbʼanel aj xnaqʼtzal ex te jun tbʼanel pakbʼal tiʼj tbʼanel tqanil in tzaj tukʼil Dios.

Onin xewbʼaj xjan tiʼj Pablo ex Timoteo jaxku tumel in cheʼxtoq. Ok twitzikʼ Pablo toj jun qonikʼan. Ok tqʼoʼn twitz tiʼj jun xjal ex xi tqʼamaʼn te tuʼn t-xiʼ toj tnam Macedonia tuʼn tonin kyiʼj. Iktzun tten xiʼ Pablo, Timoteo, Silas ex Lucas toj tnam lu tuʼn kypakbʼan ex tuʼn ttzaj tzyet tuʼn kyten junjuntl kʼloj okslal atztzun.

Nim xinaq ex xuʼj e ok te okslal toj tnam te Tesalónica. Pero at junjun aj Judiy tzaj kyqʼoj tiʼj Pablo ex kyiʼj qe tukʼil. Aqe aj qʼoj lu e ok kychmoʼn nim xjal nya bʼaʼn ex i ex jukʼuʼn erman kyuʼn kywitz aj kawil te tnam. In che ẍchʼintoq aj Judiy: «¡Aqeju xinaq lu aj qʼoj qe tiʼj tkawbʼil Roma!». Jakutoq che kubʼ bʼyoʼn Pablo tukʼil Timoteo, tuʼntzunju i ex oq toj tnam Berea toj qonikʼan aju.

Aʼyeju xjal te tnam Berea kyajtoq tuʼn tok kybʼiʼn tbʼanel tqanil tiʼj Dios, ex nim xjal te Grecia ex aj Judiy e ok te okslal. Pero at junjun aj Judiy e tzaj toj tnam Tesalónica ex e pon qʼol nya bʼaʼn toj tnam Berea. Tuʼntzunju xiʼ Pablo toj tnam Atenas. Atzun kye Timoteo ex Silas e kyaj ten toj tnam Berea tuʼn tchʼiy qʼuqbʼil kykʼuʼj qe erman. Tej tbʼet ambʼil, xi tqʼamaʼn Pablo te Timoteo tuʼn t-xiʼ juntl maj toj  tnam Tesalónica tuʼn tonin kyiʼj erman tuʼn tikʼx ikʼbʼil kyuʼn. Yajxitl, xi tqʼamaʼn Pablo te Timoteo tuʼn t-xiʼ visitaril nimku kʼloj okslal.

Xi tqʼamaʼn Pablo jlu te Timoteo: «Aʼyeju kyajbʼil tuʼn kyajbʼen te Jehová che elel ikʼen». Tzaj nya bʼaʼn tiʼj Timoteo, ax ikx okx qʼoʼn toj cárcel tuʼn tokslabʼil. Noqtzun tuʼnj, kukx tzalaj tuʼnju kubʼ tyekʼin qa kukx in najbʼentoq te Jehová.

Xi tqʼamaʼn Pablo jlu kye aj Filipos: «Kxel nsamaʼne Timoteo kyukʼile. A kxel xnaqʼtzante kyeye alkye tten tuʼn kukx kybʼete toj axix tok ex alkye tten tuʼn kypakbʼane». Ok qeʼ tkʼuʼj Pablo tiʼj Timoteo. Toj nim ambʼil e ajbʼen junx te Dios ex okxix kyamiwen kyibʼ.