Tzaj ttziyen Jehová jlu: «Miʼn tentl oqʼel, kʼixkʼoj, yabʼil nix kyimen. Kʼelel nsuʼne taʼl kywitze. Ya mlay tzaj kynaʼne aju nya bʼaʼn te ojtxe».

Kubʼ tqʼoʼn Jehová Adán ex Eva toj tbʼanel najbʼil te Edén tuʼn kyanqʼin toj tzalajbʼil ex toj mujbʼabʼil. Iltoq tiʼj tuʼn kykʼulin te Kytat toj kyaʼj ex tuʼn tten nim kykʼwaʼl tuʼntzun tnoj twitz Txʼotxʼ kyuʼn. Mintiʼ e bʼin Adán tukʼil Eva, pero aju tajbʼiltoq tuʼn tbʼant mintiʼ o chʼexpaj. Ma tzʼel qnikʼ tiʼj toj uʼj lu qa kukx in japun tuʼn Dios aju in tzaj ttziyen. Tzul tiʼn Tkawbʼil qeju tbʼanel kʼiwlabʼil twitz Txʼotxʼ, ex iktzun tten kjapunel tuʼn aju tzaj ttziyen te Abrahán.

Toj chʼintl ambʼil miʼn tentl Satanás nix qe taqʼunal nix qe xjal nya bʼaʼn. Kykyaqil xjal che kʼulil te Jehová. Mlay qo yabʼti, mlay qo kyim, sino tkyaqil qʼij ok qo jawil weʼ tukʼil nim qipun ex tukʼil nim tzalajbʼil  tuʼnju itzʼ qoʼ. Kʼokel Txʼotxʼ te jun tbʼanel najbʼil. Qkyaqil ktel tbʼanel qwa ex tbʼanel tiʼchaq qe. Miʼn che tentl xjal nya bʼaʼn nix qeju in che bʼiyen, kykyaqil che okel te tbʼanel. Aʼyeju txkup te tjaqʼ kʼul mlay che tzaj xobʼtl qe ex mlay qo tzaj xobʼtl kywitz.

Tbʼanelxix kʼokel ambʼil aj tok ten Jehová qʼol juntl maj kychwinqlal kyimni. Kxel qqʼoʼn bʼaʼn tulena kye xjal e ten ojtxe, ik tzeʼn Abel, Noé, Abrahán, Sara, Moisés, Rut, Ester ex David. Aʼye qe jlu che onil qiʼj tuʼn tok Txʼotxʼ te jun tbʼanel najbʼil. Kukx kbʼel qbʼinchaʼn qe tbʼanel tiʼchaq.

Tajbʼil Jehová tuʼn tanqʼina toj Tbʼanel Najbʼil. Toj lugar lu kʼelel qnikʼ tiʼj nim tiʼchaq tiʼj Dios aju bʼajx tzul toj qwiʼ. Tuʼntzunju, ¡qo laqʼex tkyaqil qʼij ttxlaj Jehová, jaʼlo ex te jumajx!