Tej tokx qʼoʼn Juan pres toj isla te Patmos tbʼi, xi tyekʼin Jesús 16 witzikʼ te moqa tilbʼilal tiʼjju tiʼ kbʼajel toj ambʼil tzul. Kyoj qeju witzikʼ aju, ok tqʼoʼn Juan twitz tiʼj alkye tten kʼokel tbʼi Jehová te xjan, alkye tten tzul Tkawbʼil Jehová ex alkye tten kbʼantel tajbʼil tzalu twitz Txʼotxʼ ik tzeʼn toj kyaʼj.

Toj jun witzikʼ, ok tqʼoʼn Juan twitz tiʼj Jehová at toj tbʼanelxix tqʼuqbʼil toj kyaʼj. At 24 tij xjal tiʼjele tqʼuqbʼil. Tok kyxbʼalun saq ex tjax jun coron toj kywiʼ aju qʼan pwaq ttxʼotxʼil. Toj qʼuqbʼil, in qoptzʼaj spikʼun ik tzeʼn qʼankyoq ex in qʼajt. In che kubʼ ẍmejeʼ qeju 24 tij xjal twitz Jehová ex in che kʼulin te. Toj juntl witzikʼ, ok tqʼoʼn Juan twitz tiʼj nimxix kyajlal xjal, moqa jun kʼloj xjal te tkyaqil tnam ex te junxichaq yol, in che ajbʼen te Jehová. Aju tal Ẍneʼl, a Jesús, in xqʼuqin kyiʼj ex in xi tyekʼin aʼ te chwinqlal kye. Yajxitl, toj juntl witzikʼ, xi tzyet tuʼn tkawin Jesús ik tzeʼn aj kawil toj kyaʼj junx kyukʼil 24 tij xjal. Toj juntl witzikʼ, ok tqʼoʼn Juan twitz tiʼj Jesús in qʼojin tiʼj Dragón, aju Satanás, ex qe taqʼunal. I etz lajoʼn tuʼn Jesús toj kyaʼj ex e kutz t-xoʼn twitz Txʼotxʼ.

Yajxitl, toj jun tbʼanel witzikʼ, ok tqʼoʼn Juan twitz tiʼj tal Ẍneʼl ex  qeju 144,000 waʼl qe twi witz Sion. Ax ikx ok tqʼoʼn twitz tiʼj jun anjel in lipen twitz tkyaqil Txʼotxʼ ex in tqʼamaʼn: «Kyqʼoʼnxe nimbʼil te Dios ex kynimsaʼnktze».

Toj juntl witzikʼ, ok tqʼoʼn twitz tiʼj qʼoj Armagedón. Toj qʼoj aju, kubʼ tiʼj nya bʼaʼn tokx tjaqʼ tkawbʼil Satanás tuʼn Jesús kyukʼil tsoldad. Toj mankbʼil witzikʼ, ok tqʼoʼn Juan twitz tiʼj mujbʼabʼil toj kyaʼj ex twitz Txʼotxʼ, kykyaqilx in che anqʼin junx ex in che tzalaj. Ax ikx ok tqʼoʼn twitz tiʼj tej tkubʼ xiten Satanás ex aju tyajil, toj juntl yol, kykyaqil qeju in che ok lepeʼ tiʼj. Kykyaqil qeju ateʼ toj kyaʼj ex twitz Txʼotxʼ in nok kyqʼoʼn tbʼi Jehová te xjan ex oʼkx te in che kʼulin.