Toj tnam Cesarea, attoq jun soldad nim toklen te Roma aju Cornelio tbʼi. Nya aj Judiy te, noqtzun tuʼnj, nimen kyuʼn xjal aj Judiy. Jun xjal bʼaʼntoq bʼinchan xtalbʼil, tuʼnju in bʼanttoq nim tiʼchaq tbʼanel tuʼn kyiʼj xjal prow, moqa mebʼa. Qʼuqlitoq tkʼuʼj Cornelio tiʼj Jehová ex kukx in naʼntoq Dios te. Jun qʼij, kubʼ tyekʼin jun anjel tibʼ twitz ex xi tqʼamaʼn te: «Ma tbʼi Dios qe tnaʼj Diosa. Samanxa qe t-xjalila toj tnam Jope, jatumel taʼ Pedro tuʼntzun tul qʼol twitz tiʼja». Jun rat naj xi tsamaʼn Cornelio oxe xjal toj tnam Jope, aju attoq toj junlo 50 kilómetros kubʼni.

Atzun toj tnam Jope, ok jun twitzikʼ Pedro. Ok tqʼoʼn twitz kyiʼj qe txkup aʼyeju nya qʼoʼntoq ambʼil kye aj Judiy tuʼn t-xi kywaʼn. Yajxitl ok tbʼiʼn jun tqʼajqʼajel wibʼaj aju xi tqʼamaʼn te tuʼn t-xi twaʼn. Mintiʼ xi twaʼn Pedro ex tqʼama: «Bʼajx txi nchyoʼne jun txkup qa tzʼil». Xi ttzaqʼweʼn tqʼajqʼajel wibʼaj te: «Miʼn tqʼamaya qa tzʼil qeju txkup lu, jaʼlo ma tzaj tqʼamaʼn Dios qa saq qe». Ax ikx xi tqʼamaʼn te: «At oxe xjal ttzi tjaya, txiʼya kyukʼil». Xiʼtzun Pedro ttzi ja ex xi tqanin kye xjal tiquʼn otoq che pon. Xi kytzaqʼweʼn te: «Ma qo tzaj samaʼne tuʼn Cornelio aju capitán te soldad te Roma. Taj tuʼn t-xiʼya qukʼile toj tja toj tnam Cesarea». Xi  tqʼamaʼn Pedro kye xjal tuʼn kykyaj jtal atztzun toj qonikʼen aju. Toj juntl qʼij, xiʼ kyukʼil toj tnam Cesarea. Ax ikx ateʼ junjun erman te Jope e xiʼ tukʼil.

Tej tok tkeʼyin Cornelio tej tpon Pedro, kubʼ ẍmejeʼ twitz. Xi tqʼamaʼn Pedro te: «Weʼktza. Ax ikx xjal qine tzeʼn teya. Ma tzaj tqʼamaʼn Dios weye tuʼn wule tjaya, maske mintiʼ in qo okxe toj kyja xjal nya aj Judiy qe. Atzun jaʼlo, najsama qʼamantza tiquʼn ma chin tzaj ttxkoʼna».

Xi tqʼamaʼn Cornelio te Pedro: «Ma bʼant-xi kyaje qʼij in chin naʼntoqe Dios, ex tzaj tqʼamaʼn jun anjel weye tuʼn ttzaj ntxkoʼna. Najsama, xnaqʼtzantza qeye aʼyeju tiʼchaq in tzaj tqʼamaʼn Jehová». Xi ttzaqʼweʼn Pedro: «Jaʼlo ax tok in nel nnikʼe tiʼj qa mintiʼ in nok tkeʼyin Dios kyxilen xjal, in chex tkʼamoʼn kykyaqil qeju kyaj tuʼn kykʼulun te». Xi t-xnaqʼtzaʼn Pedro nim tiʼchaq kye tiʼj Jesús. Xi tkʼamoʼn Cornelio ex kykyaqil qeju ateʼtoq tja xewbʼaj xjan ex jaw aʼ kywiʼ.