Toj tnam Filipos, ten jun txin majen aju in neltoq tnikʼ tiʼjju kbʼajel toj ambʼil tzul, tuʼnju attoq jun juʼẍ toj tanmi. Nimtoq pwaq in tkambʼan txin kye tpatrón tuʼn jlu. Tej kykanin Pablo tukʼil Silas toj tnam Filipos, ok lepeʼ txin lu kyiʼj kyoj nimku qʼij jaxku tumel in cheʼxtoq. Tuʼn jun juʼẍ in jawtoq ẍchʼin ex in tqʼamaʼntoq txin jlu: «Aqeju xjal lu tmajen Dios qe aju Dios nimxix toklen». Yajxitl, xi tqʼamaʼn Pablo te juʼẍ: «¡Kxel nqʼamaʼne teya toj tbʼi Jesús tuʼn tetza toj tanmi txin!». Etztzun juʼẍ toj tanmi txin.

Tej tel kynikʼ tpatrón txin tiʼj qa ya mlaytoq che kambʼan mas pwaq tibʼaj txin, tzaj nimxix kyqʼoj. Tuʼn jlu xi kyjukʼuʼn Pablo ex Silas kywitz aj kawil, ex xi kyqʼamaʼn jlu kye: «¡Aʼyeju xjal lu mintiʼ in japun ley kyuʼn, ex ma che jaw tilj kykyaqil xjal toj tnam kyuʼn!». Xitzun kyqʼamaʼn aj kawil tuʼn kyok jubʼin Pablo ex Silas ex tuʼn kyokx qʼoʼn toj cárcel. Aju xqʼuqil tiʼj cárcel e okx tqʼoʼn tzmax toj qlolj. Ax ikx e okx tqʼoʼn xqʼuqil kyqan toj junjun tzʼlom.

E oktzun ten Pablo tukʼil Silas bʼitzil tuʼn tjaw kynimsaʼn Jehová ex in che bʼintoq txqantl pres kyiʼj. Noq minabʼen, toj tnikʼjan aqʼbʼil tzaj jun kyaqnajnabʼ nimxix wen aju bʼiʼx yukch cárcel tuʼn. E jaqet kykyaqil pwert tuʼn ex i el tzʼaq kaden ex qeju tzʼlom tok kyiʼj xjal pres. Xi ojqelan xqʼuqil cárcel keʼyilte tzmax tojxi ex ok tqʼoʼn twitz kyiʼj pwert jaqoʼn qe. Kubʼ t-ximen qa otoq che etz oq qe xjal, tuʼntzunju, jaw tiʼn jun spad tuʼn tkubʼ tbʼyon tibʼ.

Tojxix ambʼil aju, jaw ẍchʼiʼn Pablo ex xi tqʼamaʼn jlu: «¡Miʼn tzʼok tbʼinchaʼna nya bʼaʼn tiʼja! ¡Qkyaqile atoʼye tzalu!». Jun rat xiʼ xqʼuqil cárcel jatumel taʼ Pablo tukʼil Silas ex kubʼ ẍmejeʼ kywitz. Xi tqʼamaʼn jlu kye: «¿Tiʼ kbʼantel wuʼne tuʼn nklete?». Xi kytzaqʼweʼn te: «Aya ex qeju toj tjaya il tiʼj tuʼn tok qeʼ kykʼuʼje tiʼj Jesús». E oktzun ten Pablo tukʼil Silas yekʼilte tyol Jehová te xqʼuqil cárcel, ex aju xqʼuqil cárcel kyukʼil kykyaqil toj tja jaw aʼ kywiʼ.