Jun qʼij, tej tjunalxtoq Eva at, tzaj yolin jun kan, moqa jun lobʼaj tukʼil. Xi tqanin te: «¿Axpe tok qa mintiʼ in xi tqʼoʼn Dios ambʼil kyeye tuʼn miʼn t-xi kyloʼne twitz ni jun tzeʼ?». Xi ttzaqʼweʼn Eva: «Jaku txi qloʼne alkyexku twitz tzeʼ, oʼkx junx mlay. Qa ma txi qloʼne, ok qo kyimele». Xi tqʼamaʼn kan te: «Mlay che kyime. Qa ma txi kyloʼne, che okele ik tzeʼn Dios». ¿Axpe tok jlu? Miʼn. Jun nya ax tok yol jlu, noqtzun tuʼnj, xi tbʼiʼn Eva jlu. Tej ok tqʼoʼnxix twitz tiʼj twitz tzeʼ, mastoq taj tuʼn t-xi tloʼn. Tuʼntzunju xi tloʼn chʼin, ax ikx xi tqʼoʼn te Adán. Ojtzqiʼntoq tuʼn Adán qa oktoq che kyimel qa mintiʼ xi kybʼiʼn Dios, noqtzun tuʼnj, xi tloʼn.

Yajxitl, tojx qʼij aju, tzaj yolin Jehová tukʼil Adán ex Eva. Tzaj tqanin kye tiquʼn mintiʼ okx kybʼiʼn. Ok tqʼoʼn Eva tpaj kan, ex atzunte Adán ok tqʼoʼn tpaj Eva. Tuʼnju mintiʼ xi kynimen Adán ex Eva Jehová, i etz tlajoʼn toj tbʼanel najbʼil. Ax ikx, e kubʼ tqʼoʼn qe anjel ttziʼ tbʼanel najbʼil tukʼix jun spad in kʼant tuʼn miʼn kymeltzʼaj juntl maj toj.

Tzaj tqʼamaʼn Jehová qa ax ikx kbʼeltoq tqʼoʼn tkastiw aju nikʼal yol aju yolin tukʼil Eva. Noqtzun tuʼnj, nya jun kan yolin tukʼil Eva. Mintiʼ e kubʼ tbʼinchaʼn Jehová qe kan tuʼn kyyolen. Tuʼn jun anjel nya bʼaʼn bʼant tyolin kan lu. Tajtoq tuʼn tsbʼuʼn tiʼj Eva. Satanás tbʼi anjel lu, aju Tajaw il. Toj ambʼil tzul, kbʼel tnajsaʼn Jehová Satanás. Iktzun tten ya miʼn sbʼuntl kyiʼj xjal tuʼn tbʼant nya bʼaʼn kyuʼn.