Xi t-xnaqʼtzaʼn Abrahán Isaac, aju tkʼwaʼl, tuʼn tok tkʼujlaʼn Jehová ex tuʼn tok qeʼ tkʼuʼj tiʼj tkyaqilju otoq tzaj ttziyen. Noqtzun tuʼnj, tej qʼiʼnlo 25 abʼqʼi tuʼn Isaac, tzaj tqanin Jehová te Abrahán jun tiʼ kwest. ¿Bʼiʼn tuʼna tiʼ tzaj tqanin?

Xi tqʼamaʼn Dios jlu te Abrahán: «Najsama, bʼaʼn tuʼn t-xi tiʼna aju oʼkxku jun tkʼwaʼla ex qʼonxa te chojbʼil twiʼ jun witz toj txʼotxʼ te Moria». Mintiʼtoq ojtzqiʼn tuʼn Abrahán tiquʼn otoq tzaj tqanin Jehová jlu te, noqtzun tuʼnj, bʼant tuʼn.

Toj juntl qʼij, te prim, moqa te qlax wen, xi tiʼn Abrahán Isaac ex kabʼe tmajen toj txʼotxʼ Moria. Tej tikʼ oxe qʼij, xi kykeʼyin qe witz najchaq ateʼqe. Xi tqʼamaʼn Abrahán kye tmajen tuʼn kykyaj ten yol akux in xi kyqʼoʼn chojbʼil tukʼil Isaac. Xi tiʼn Abrahán kuchiy ex xi tqʼoʼn siʼ te Isaac tuʼn tkʼant qʼaqʼ. Xi tqanin Isaac te ttat: «¿Jatumel taʼ txkup kxel qʼet te chojbʼil?». Xi ttzaqʼweʼn Abrahán: «Nkʼwaʼl, ok tzul tqʼoʼn Jehová».

Tej kyjapun twi witz, bʼaj kybʼinchaʼn jun patbʼil oyaj. Ex e kubʼ tkʼaloʼn Abrahán qe tqan ex qe tqʼabʼ Isaac, ex jax tqʼoʼn twiʼ patbʼil oyaj.

Jaw tiʼn Abrahán kuchiy. Tojx ambʼil aju, tzaj yolin jun t-anjel Jehová toj kyaʼj ex tzaj tqʼamaʼn jlu te: «¡Abrahán! ¡Miʼn tzʼok tbʼinchaʼna nya bʼaʼn tiʼj qʼa! Ma tzʼel nnikʼe tiʼj qa at qʼuqbʼil tkʼuʼja tiʼj Dios, tuʼnju tajtoqa tuʼn t-xi tqʼoʼna tkʼwaʼla te chojbʼil». Oktzun tkeʼyin Abrahán jun rit, moqa jun  ẍneʼl, otoq che kyaj qʼeʼtj qe tkach kyxol tal tzeʼ. Kyjuʼtzun el ttzaqpiʼn naj Abrahán Isaac ex kubʼ tbʼyoʼn rit lu te t-xel tkʼwaʼl.

Atxix toj ambʼil aju, ok tqʼoʼn Jehová Abrahán te tamiw. ¿Ojtzqiʼn tuʼna tiquʼn? Tuʼnju kubʼ tbʼinchaʼn Abrahán tkyaqilju tzaj tqanin Jehová te, maske mintiʼtoq in nel tnikʼ tiʼj tiquʼn otoq tzaj tqanin Jehová jlu te.

Tzaj tqʼamaʼn Jehová juntl maj aju otoq tzaj ttziyen te Abrahán: «Ok kbʼel nkʼiwlaʼna ex che xel nqʼoʼne nim tkʼwaʼla, nimku tyajila». A jlu in tzaj tyekʼin qa oktoq ktzajel tqʼoʼn Jehová tbʼanel tiʼchaq kye kykyaqil xjal in kubʼ kybʼinchaʼn aju bʼaʼn noq tuʼnju tyajil Abrahán.