Tzaj ttziyen Jehová te Jacob qa oktoq kʼokel t-xqʼuqen, ik tzeʼn otoq xqʼuqin tiʼj Abrahán ex Isaac. Kyaj ten Jacob anqʼil toj jun tembʼil aju Harán tbʼi. Atz mojeʼ toj tembʼil aju, tzaj nim tkʼwaʼl ex ok te qʼinun.

Tej tbʼet ambʼil, xi tqʼamaʼn Jehová jlu te Jacob: «Taja max tuj txʼotxʼ jatum najl tmana». Tuʼntzen jlu, xiʼ Jacob kyukʼex toj tja tzmax toj tembʼil aju. Toj bʼe, e ul junjun tmajen tuʼn t-xi kyqʼamaʼn jlu te: «Ok tzul ttzika Esaú qiʼj ex ukʼin 400 xinaq tuʼn». Tzaj xobʼ Jacob tuʼnju kubʼ t-ximen qa jakutoq tzʼok tbʼinchaʼn Esaú nya bʼaʼn tiʼj ex kyiʼj qe toj tja. Tuʼntzunju ok ten naʼl Dios te Jehová: «Bʼinchama xtalbʼil, chin tkloma tuj tqʼabʼ ntzike». Toj juntl qʼij, xi tsamaʼn Jacob jun oyaj te Esaú: nimku rit, moqa ẍneʼl, chip, ttxuʼ wakẍ, kamey ex chej.

Toj qonikʼen aju, tej tkyaj ten Jacob tjunalx, ok tkeʼyin jun anjel. Kubʼ ttzyuʼn Jacob anjel ex ok tilel tuʼn anjel tuʼn ttzaqpaj toj tqʼabʼ. Bʼant jlu kyuʼn tzmaxi tej qsqix toj juntl qʼij. Ax tok kʼixbʼi Jacob, noqtzun tuʼnj, mintiʼ kubʼ numj. Xi tqʼamaʼn anjel jlu te: «Chin ttzoqpintza». Noqtzun tuʼnj, xi ttzaqʼweʼn Jacob jlu te: «Qa miʼn ma chin kubʼ tkʼiwlaʼna, mlay txi ntzoqpiʼne».

Kubʼx kʼiwlaʼn Jacob tuʼn anjel. Tuʼn jlu el tnikʼ Jacob tiʼj qa melaytoq txi tqʼoʼn Jehová ambʼil te Esaú tuʼn tok tbʼinchaʼn nya bʼaʼn tiʼj.

Te prim, moqa te qlax aju, xi tkeʼyin Jacob kyjaʼtoq ttzaj Esaú najchaq kyukʼex 400 xinaq. Nej kywitz qe toj tja tuʼn tok tmojbʼan tibʼ  tukʼil Esaú, ex tej tpon kubʼ mejeʼ wuq maj twitz ttzik. Xi lipen naj Esaú ttxlaj Jacob ex tzaj tchleʼn. Kykabʼil e jaw oqʼ ex kyaj bʼant tiʼj nya bʼaʼn kyuʼn. ¿Tiʼ teya t-xim? ¿Bʼaʼnpetzulo ela toj twitz Jehová aju bʼant tuʼn Jacob?

Tej tbʼaj jlu, aj meltzʼaj Esaú tja, atzunte Jacob kukx e bʼet tuʼn kypon. Attoq 12 tkʼwaʼl Jacob: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ex Benjamín. Aj tbʼet ambʼil, oktoq kajbʼel José tuʼn Jehová tuʼn tklet ttnam, a jlu jun kyxol qe tkʼwaʼl Jacob. ¿Taj teya tzʼok tbʼiʼn alkye tten bʼant jlu? Qo xnaqʼtzal tiʼj.