Xiʼ Moisés ex Aarón twitz faraón tuʼn t-xi kyqʼoʼn tqanil lu aju tzaj tqʼoʼn Dios kye: «Qa mintiʼ saj tqʼoʼna ambʼil tuʼn kyex nmajene, ktzajel nqʼoʼne nimaq us, moqa aʼjin, toj tnam». Bʼaʼntoq che txʼaʼn qe nimaq us lu. Nimxix kybʼet qe txkup lu e okx toj kyja aj Egipto, toj kyja qʼinun ex toj kyja prow xjal. Nojnitoq taʼ tnam kyuʼn qe nimaq us. Pero toj txʼotxʼ te Gosén, atz jatumel in che anqʼintoq aj Israel, mintiʼtoq ni jun. Aju tkyajin kʼixbʼisabʼil lu ex aʼyeju e tzaj yajxitl oʼkx tzaj nya bʼaʼn kyiʼj xjal te Egipto tuʼn ex mintiʼ tzaj nya bʼaʼn kyiʼj aj Israel tuʼn. Xi tqʼamaʼn faraón te Moisés: «Qaninxa te Jehová tuʼn kyel tiʼn qe nimaq us, ex jakutzun che ex tmajen». Pero tej kyel tiʼn Jehová, chʼexpaj t-xim faraón. ¿Tzeʼn teya toj twitz? ¿Okpe kʼelel tnikʼ faraón jun qʼij tiʼjju xnaqʼtzbʼil?

Tej tbʼaj jlu tqʼamatl Jehová: «Qa mintiʼ saj tqʼoʼn faraón ambʼil tuʼn kyetz nmajene, ktzajel yabʼil ex che kyimel qe kyalun aj Egipto». Toj juntl qʼij ik bʼajju ik tzeʼn tqʼama Jehová, atzun kye aj Israel kyalun mintiʼx jun nya bʼaʼn tzaj kyiʼj. Maske tzaj tkyaqil lu, mintiʼ xi tqʼoʼn faraón ambʼil tuʼn kyetz aj Israel, tuʼnju nya tajtoq tuʼn tbʼin.

Xitzun tqʼamaʼn Jehová te Moisés tuʼn tmeltzʼaj juntl maj tukʼil faraón ex tuʼn tjaw t-ẍtoʼn tzaʼj toj kyqʼiqʼ. Ok tzaʼj te jun quq aju kubʼ noj kyqʼiqʼ tuʼn ex kubʼ tzʼaq kyibʼaj kykyaqil aj Egipto. Tuʼn quq lu etz junjun yabʼil kyiʼj aj Egipto ex kyiʼj kyalun aju tzaj nim kʼixkʼoj kyiʼj tuʼn. Pero mintiʼ xi tqʼoʼn faraón juntl maj ambʼil kye aj Israel tuʼn kyetz.

 Xi tqʼamaʼn Jehová juntl maj te Moisés tuʼn t-xiʼ twitz faraón ex tuʼn t-xi tqʼamaʼn tqanil lu: «¿Kukxpe nya taja tuʼn tetz ttzaqpiʼna ntname? Tuʼn jlu, nchiʼj ktzajel nqʼoʼne saqbʼaqin». Toj juntl qʼij, tzaj tqʼoʼn Jehová saqbʼaqin, qʼankyoq ex qʼaqʼ. Atzun kyqʼiqʼ jbʼal mas nya bʼaʼn otoq tzaj kyibʼaj aj Egipto. Kubʼ tnajsaʼn tkyaqilju tzeʼ ex aju kojbʼil, pero mintiʼ bʼaj jlu toj txʼotxʼ te Gosén. Tzaj tqʼamaʼn faraón jlu: «Qaninxa te Jehová tuʼn tkubʼ bʼaj jlu, ex jakutzun che exe». Pero tej tweʼ saqbʼaqin ex jbʼal, chʼexpaj t-xim faraón juntl maj.

Tuʼntzunju tqʼama Moisés jlu: «Atzun jaʼlo aʼyeju ẍplon kxel kywaʼn qe tzeʼ ma che kyaj ten tej saj saqbʼaqin, qʼankyoq, ex qʼaqʼ». Aʼyeju ẍplon, jun kʼloj txkup nimaq qe, aʼyeju tzajni qe kyiʼj saltamontes. Nimxix kybʼaj ẍplon xi kywaʼn aju otoq kyaj ten kyiʼj tzeʼ ex toj kojbʼil. Kubʼsan faraón twitz Moisés: «Qaninxa te Jehová tuʼn kyel tiʼn qe ẍplon tzalu». Pero tej kyel tiʼn Jehová qe ẍplon, kukx nya tajtoq faraón tuʼn tbʼin.

Xi tqʼamaʼn Jehová jlu te Moisés: «Qʼinktz tqʼabʼa twitz kyaʼj». Tej tbʼant jlu tuʼn, tzaj nimxix qlolj. Mintiʼ qʼanchaʼlix ni jun tiʼxti toj kywitz aj Egipto toj oxe qʼij. Oʼkx kyxol aj Israel attoq spikʼun toj kyja.

Xi tqʼamaʼn faraón jlu te Moisés: «Jaku tzʼex teya kyukʼil t-xjalila, pero kyqʼonke qe kyalune tzalu». Xi ttzaqʼweʼn Moisés jlu: «Il tiʼj tuʼn kyxi qiʼne qe qalune tuʼntzun t-xi qqʼoʼne te jun chojbʼil twitz Qdiose». Tzaj nim tqʼoj faraón ex tqʼama: «¡Texa nwitze tzalu! Qa ma tzula nwitze juntl maj, kbʼel nbʼiyoʼna».