A José mas chʼin kyxol tkʼwaʼl Jacob. Aʼyeju ttzik José ok kyqʼoʼn kywitz qa kʼujlaʼnxixtoq José tuʼn ttat. ¿Tiʼtzulo kynaʼ tuʼn jlu? El kyikʼun ex tzaj nim kyqʼoj tiʼj. Jun maj, ok junjun twitzikʼ aju jaku qo jaw labʼin kyiʼj ex xi tqʼamaʼn kye ttzik. Kubʼ kyximen qa a t-xilen qe witzikʼ lu qa kpol jun qʼij jatumel che kbʼel ẍmejeʼ twitz José. Tuʼntzunju tzaj mas kyqʼoj tiʼj.

Jun qʼij in che xqʼuqintoq ttzik José kyiʼj ẍneʼl, moqa rit, nqa tiʼj tnam Siquem. Xi samaʼn José tuʼn Jacob tuʼn tok tqʼoʼn twitz kyiʼj ttzik tzeʼn ateʼ. Tej tok kyqʼoʼn kywitz tiʼj José qa lu tzultoq, kyqʼama: «Lu qʼamal witzikʼ tzul. ¡Qbʼiyonku!». Tuʼntzunju tzaj kytzyuʼn ex kux kyqʼoʼn toj jun jul nimku t-xe. Noqtzun tuʼnj, jun kyxol qe ttzik aju Judá tbʼi, tqʼama: «Miʼn kubʼ kybʼyoʼne. Mas bʼaʼn qkʼayinx tuʼn tok te jun majen». Ex atzun jlu bʼant kyuʼn. Xi kykʼayin tuʼn 20 saq pwaq kye junjun kʼayil te Madián aʼyeju kyjaʼ kyxiʼ toj tbʼeyil Egipto.

Yajxitl, kux kyqʼoʼn ttzik aju t-xbʼalun José toj tchkʼel jun chip, moqa chiv, ex xi kyiʼn tuʼn t-xi kyqʼoʼn te kytat ex xi kyqanin jlu: «¿Nyapetzun te tkʼwaʼla jlu?». Kubʼ t-ximen Jacob qa otoq kubʼ bʼyoʼn José tuʼn jun txkup toj kʼul ex tzaj nimxix tbʼis. Mix aʼl jun jakutoq tzʼok qʼuqbʼante tkʼuʼj.

Tej kypon toj Egipto, xi laqʼoʼn José tuʼn jun xjal nim toklen aju Potifar tbʼi tuʼntzun tok te tmajen. Pero attoq Jehová tukʼil José. Ok tqʼoʼn Potifar twitz tiʼj José qa jun tbʼanel aqʼunal ex qa jakutoq tzʼok qeʼ tkʼuʼj tiʼj. Tej tikʼ chʼin ambʼil, ok qʼoʼn toklen José tibʼaj tkyaqilju attoq te Potifar.

 Ok tqʼoʼn twitz t-xuʼjil Potifar tiʼj José qa tbʼaneltoq keʼyin ex qa at nim tipun, tuʼntzunju nim maj xi tqʼamaʼn te tuʼn tkubʼ kuẍeʼ tukʼil. ¿Tiʼ bʼant tuʼn José? El tikʼun ex xi tqʼamaʼn: «Mlay, tuʼnju nya bʼaʼn lu. In nok qeʼ tkʼuʼj npatrone wiʼje, ex atzun teya t-xuʼjil. Qa ma chin kubʼ kuẍeye tukʼila, jun il kbʼel nbʼinchaʼne twitz Dios».

Jun maj, ok obligarin José tuʼn t-xuʼjil Potifar tuʼn tkubʼ kuẍeʼ tukʼil. Tzyet t-xbʼalun José tuʼn, pero etz oq José. Tej tpon Potifar tja, xi tqʼamaʼn t-xuʼjil nya ax tok yol te, xi tqʼamaʼn qa ok lipen José tiʼj. Tzaj nim tqʼoj Potifar tuʼn jlu ex okx tqʼoʼn toj cárcel. Pero mintiʼ ikʼ tnaʼl José tuʼn Jehová.