Tej in che anqʼintoq xjal tzajniqe tiʼj toj tja Jacob toj tnam Egipto, ok qʼoʼn kybʼi te aj Israel. Tejtzun tkyim Jacob ex José, ok juntl akʼaj faraón te aj kawil. Tzaj xobʼ faraón lu tuʼnju mas in chmettoq kybʼet aj Israel kywitz aj Egipto. Tuʼntzunju e ok tqʼoʼn te majen. E ok t-obligarin tuʼn kybʼant ladriy ex tuʼn kyaqʼunan nim wen tuʼn taqʼunet txʼotxʼ. Ok kybʼinchaʼn aj Egipto nim nya bʼaʼn kyiʼj aj Israel pero kukx chmet kybʼet. Tuʼnju nya bʼaʼn ela jlu toj twitz faraón, tqʼama tuʼn kykubʼ bʼyoʼn qe kʼwaʼl aj Israel aʼyeju tzma in che ul itzʼj, pero mintiʼ xi tqʼamaʼn tuʼn kykubʼ bʼyoʼn qe tal txin. Nimxixlo e tzaj xobʼ aj Israel.

At jun xuʼj aj Israel Jokébed tbʼi ul itzʼj jun tal tbʼanelxix keʼyin. Tuʼn tok xqʼuqit, kux tqʼoʼn toj jun chiʼl ex okx tewin kyxol ajlaj toj nim aʼ Nilo tbʼi. Kyaj ten Míriam, aju tanabʼ tal neʼ, nqa tuʼn tok tqʼoʼn twitz tiʼtoq kbʼajel tiʼj.

Xiʼ tmeʼl faraón toj aʼ Nilo tuʼn tbʼaj ttxʼjoʼn t-xmilal ex ok tqʼoʼn twitz tiʼj chiʼl. In noqʼtoq jun  tal neʼ toj chiʼl lu ex tzaj tbʼis tiʼj. Xi tqanin Míriam te: «¿Taja tuʼn nxiʼye jyol jun xuʼj tuʼn t-xiʼ tqʼoʼn tchʼuʼ kʼwaʼl te t-xela?». Bʼaʼn chi tmeʼl faraón, ex xiʼ Míriam txkol ttxuʼ. Xi tqʼamaʼn tmeʼl faraón te Jokébed: «Qʼinxa tal neʼ lu, xqʼuqinka te nxele ex ok kxel nchjoʼne teya».

Tej tchʼiy tal neʼ, xi tiʼn Jokébed kʼwaʼl tuʼn t-xi tqʼoʼn te tmeʼl faraón. Ok tqʼoʼn tmeʼl faraón tbʼi kʼwaʼl te Moisés ex ok t-xqʼuqin ik tzeʼn tal. Chʼiy Moisés ik tzeʼn jun tkʼwaʼl aj kawil ex jakutoq ten tkyaqilju taj. Pero mintiʼ ik tnaʼl Jehová tuʼn. Ojtzqiʼntoq tuʼn Moisés qa aj Israel te ex nya jun aj Egipto, ex jaw tjyoʼn tuʼn tajbʼen te Jehová.

Tej tjapun Moisés twi 40 abʼqʼi, kubʼ t-ximen tuʼn tonin kyiʼj qeju xjal te ttnam. Jun qʼij ok tqʼoʼn Moisés twitz tiʼj jun aj Egipto in noktoq tbʼyoʼn jun aj Israel aju majentoq. Tej tlonte Moisés jlu ok tbʼyoʼn tukʼil tkyaqil tipumal ex bʼiʼx kyim, ex kux tewin t-xmilal xjal toj aren. Tej tok tbʼiʼn faraón jlu, kubʼ t-ximen tuʼn tkubʼ tbʼyoʼn Moisés, pero etz oq Moisés ex xiʼ toj tnam Madián. Ok xqʼuqin tuʼn Jehová toj tnam aju.