Akux attoq José toj cárcel, ok junjun twitzikʼ faraón, aju aj kawil te Egipto, ex mintiʼ jun in neltoq tnikʼ kyiʼj. Xitzun tqʼamaʼn jun tmajen faraón te qa jakutoq txi tqʼamaʼn José tiʼ t-xilen twitzikʼ. Tuʼntzunju, xi tqʼamaʼn faraón tuʼn ttzaj qʼiʼn naj José twitz.

Xi tqanin faraón jlu te José: «¿Jaku tzaj tqʼamaʼna weye tiʼ in tzaj kyyekʼin nwitzikʼe?». Xi ttzaqʼweʼn José te: «Wuq abʼqʼi ktel nim wabʼj toj tnam Egipto, pero yajxitl tzul wuq abʼqʼi weʼyaj. Jyoʼnktza jun xjal at tnabʼil tuʼn t-xi tkʼuʼn wabʼj tuʼntzun miʼn kykyim xjal tuʼn weʼyaj». Xi tqʼamaʼn faraón te: «¡Aya kjawil njyoʼne! Aya kʼokel te tkabʼ xjal mas nim toklen toj Egipto». Pero, ¿alkyetzun xi qʼamante te José tiʼ in tzaj kyyekʼin twitzikʼ faraón? A Jehová.

Xi tkʼuʼn José wabʼj toj wuq abʼqʼi. Yajxitl, tzaj weʼyaj twitz tkyaqil txʼotxʼ ik tzeʼn otoq tqʼama José ex e pon xjal te jaxku tumel loqʼel wabʼj tukʼil José. Ok tbʼiʼn Jacob, aju ttat José, qa attoq wabʼj toj tnam Egipto ex tuʼntzunju xi tqʼamaʼn kye lajaj tkʼwaʼl tuʼn kyxiʼ loqʼel wabʼj toj tnam lu.

I eʼx tkʼwaʼl Jacob jatumel taʼ José ex jun rat naj el tnikʼ kyiʼj. Atzun kye ttzik José mintiʼ el kynikʼ tiʼj. E kubʼ ẍmejeʼ twitz José, ik tzeʼn otoq kubʼ twitzkʼaʼn José tej tzmatoq kuʼxun. Tajbʼiltoq José tuʼn tok tbʼiʼn qa kukxtoq ikʼun twitz kyuʼn ttzik, tuʼntzunju xi tqʼamaʼn jlu kye: «Noq ẍe ule qʼol kywitze tiʼj qtname tuʼn tok kybʼiʼne qa at jatumel mintiʼ tipumal». Xi kytzaqʼweʼn ttzik José jlu: «Miʼn, nya kaʼyil kytname ma qo  ule. Te tnam Canaán qoʼye. Nej 12 qbʼete ex qitzʼin qibʼe. Pero o kyim jun ex atzun qitzʼine at tukʼil qtate». Xi tqʼamaʼn José kye: «Kyxiʼye qʼil kyitzʼine tuʼntzun kyxi nbʼine». E meltzʼaj qe ttzik José tukʼil kyman.

Pon ambʼil jatumel kubʼ bʼaj juntl maj kywa Jacob kyukʼil toj tja ex xi tqʼamaʼn juntl maj kye tkʼwaʼl tuʼn kyxiʼ toj tnam Egipto. Pero toj ambʼil lu xi kyiʼn Benjamín, aju kyitzʼin. Tuʼn tel tnikʼ José alkyetl kymod ttzik, kux tqʼoʼn tcopa saq pwaq ttxʼotxʼil toj costal jatumel qʼiʼn wabʼj tuʼn Benjamín ex tqʼama qa otoq txi kyelqʼaʼn tcopa. Tej tkanet copa kyuʼn tmajen José toj tcostal Benjamín, noq etz kywitz ttzik tiʼj. E kubʼsan twitz José tuʼn tkubʼ tqʼoʼn kykastiw ex tuʼn miʼn tkubʼ tqʼoʼn tkastiw Benjamín.

Tuʼn jlu el tnikʼ José qa otoq chʼexpaj kymod ttzik. Ya mintiʼ ikʼxtl tuʼn José, ok ten oqʼel ex tqʼama: «Ayine José, aju kyitzʼine. ¿Kukxpe itzʼx nmaʼne?». Noq etz kywitz ttzik José tiʼj. Xi tqʼamaʼn José kye: «Miʼn tzaj kybʼise tuʼnju ok kybʼinchaʼne wiʼje. A Dios saj qʼin weye tzalu tuʼn wonine kyiʼje tuʼn miʼn kykyime. ¡Pero jun rat kyuʼne!, kyiʼntze nmane».

I eʼx ttzik José qʼamal tbʼanel tqanil te kytat atz tja ex tzaj kyiʼn toj tnam Egipto. Nim abʼqʼi ikʼ tuʼn tten juntl maj José junx tukʼil ttat.