Anqʼin Moisés 40 abʼqʼi toj Madián. Toj ambʼil aju kubʼ mojeʼ ex e ul itzʼji tkʼwaʼl. Toj jun qʼij, tej in xqʼuqintoq kyiʼj t-ẍneʼl, moqa t-rit, nqa tiʼj witz Sinaí ok tqʼoʼn twitz tiʼj jun tiʼ naʼmxtoq tlonte. Attoq jun tzeʼ in kʼanttoq qʼaqʼ tiʼj, ¡pero mintiʼtoq in tzʼeʼy tuʼn qʼaqʼ! Tej tpon laqʼeʼ Moisés tuʼn tok tqʼoʼn twitz tiʼj, xi tbʼiʼn jun tqʼajqʼajel wibʼaj in netztoq jatumel taʼ tzeʼ ex tqʼama: «¡Moisés! Miʼn tzaj laqʼeʼya mastl. Qʼimel qe t-xjabʼa, tuʼnju waʼla twitz txʼotxʼ xjan». In najbʼentoq jun anjel tuʼn Jehová tuʼn tyolin tukʼil Moisés.

Tzaj xobʼ Moisés, tuʼntzunju kubʼ tjupuʼn twitz. Tzaj tqʼamaʼn aju in yolintoq: «O tzʼok nqʼoʼne nwitze kyiʼj aj Israel, nim yajbʼil in tzaj kyiʼj. Ok che eletz wiʼne kyxol aj Egipto ex che xel wiʼne toj jun tbʼanel txʼotxʼ. Ex waje tuʼn kyetz tiʼna toj tnam Egipto». ¿Tiʼtzulo tnaʼ Moisés?

Xi tqanin Moisés jlu: «¿Tiʼ kxel nqʼamaʼne qa at jun saj qanin alkye saj samante weye?». Xi tqʼamaʼn Dios te: «Qʼamanxa kye qa a Jehová, aju Tdios Abrahán, Tdios Isaac ex aju Tdios Jacob saj samante teya». Xi tqʼamaʼn Moisés jlu: «¿Yajtzun qa mlay chinx kybʼiʼne xjal?». Xi tqʼoʼn Jehová jun yekʼbʼil te qa kʼonil tiʼj. Xi tqʼamaʼn te tuʼn tkubʼ t-xoʼn ttzeʼ twitz txʼotxʼ, ex tej tbʼant jlu tuʼn, ¡ok ttzeʼ te jun kan, moqa lobʼaj! Jawtzun ttzyuʼn Moisés tje kan, ex ok juntl maj te jun tzeʼ. Xitzun tqʼamaʼn Jehová te: «Aj tbʼant milagr lu tuʼna, kbʼel tyekʼina qa aʼyine ẍinx samante teya».

Pero xi tqʼamaʼn Moisés jlu: «Nyaxix tbʼanel chin yoline kywitz xjal». Xi tqʼamaʼn Jehová te: «Kxel nqʼamaʼne teya aju kxel tqʼamaʼna, ax ikx kxel nsamaʼne ttzika Aarón tukʼila tuʼn tonin tiʼja». Tej tok tbʼiʼn Moisés qa kʼonil Jehová tiʼj, aj meltzʼaj toj Egipto ex xi tiʼn t-xuʼjil ex qe tkʼwaʼl tukʼil.