Tej attoq Moisés twi witz Sinaí, tzaj tqʼamaʼn Jehová te tuʼn tjaw tbʼinchaʼn jun ja xbʼalun. A jlu jun ja tbʼanelxix jatumel jakutoq jaw kynimsaʼn aj Israel Dios. Nya oʼkxju, ax ikx jakutoq txi kyiʼn ja xbʼalun jaxku tumel in cheʼx.

Tzaj tqʼamaʼn Jehová jlu: «Qʼamanxa kye xjal tuʼn ttzaj kyqʼoʼn aju jaku bʼant kyuʼn tuʼn kyonin tuʼn tjaw bʼinchet ja xbʼalun». Xi kyiʼn aj Israel qʼan pwaq, saq pwaq, qʼan kʼuxbʼil, tbʼanel abʼj ex junjuntl tiʼchaq. Ax ikx xi kyqʼoʼn ttzmal ẍneʼl, moqa rit, lino, ttzʼumil txkup ex txqantl. Xi kyqʼoʼn nim tiʼchaq, tuʼntzunju, xi tqʼamaʼn Moisés jlu kye: «At nim tiʼchaq. Ya miʼn tzaj kyintle mas».

Nim xinaq, moqa ichan, ex qe xuʼj tbʼanel che aqʼunan e onin tuʼn tjaw bʼinchet ja xbʼalun. Tzaj tqʼoʼn Jehová kynabʼil tuʼn tel bʼaʼn aqʼuntl kyuʼn. At junjun e chmon ex e slapin, moqa e slepin. Junjuntl e aqʼunan tiʼj qʼan pwaq, kubʼ kypaʼn abʼj ex kubʼ kyaqʼunan, ex ateʼ junjuntl bʼant junjun tiʼ kyuʼn tiʼj tzeʼ.

Jaw kybʼinchaʼn xjal ja xbʼalun ik tzeʼn tzaj tqʼamaʼn Jehová. Kubʼ kybʼinchaʼn jun tbʼanel cortina tuʼn tkubʼ paʼn ja xbʼalun te kabʼe kwart: aju Xjan ex aju Xjanxix. Toj kwart Xjanxix, attoq kajon kʼubʼil Ley bʼinchaʼn maj tukʼil tzeʼ acacia ex tukʼil qʼan pwaq. Toj kwart Xjan, attoq jun kandil qʼan pwaq ttxʼotxʼil, jun mes ex jun altar tuʼn tkubʼ patin incienso. Twi peʼn attoq jun tkubʼel aʼ moqa jun palangan qʼan kʼuxbʼil ttxʼotxʼil, ex jun matij altar. Aj tok kyqʼoʼntoq aj Israel kywitz tiʼj kajon kʼubʼil Ley,  in tzaj kynaʼntoq kyyol otoq txi kytziyen qa ok che bʼil te Jehová. ¿Ojtzqiʼn tuʼna tiʼ t-xilen jun yol in kyaj bʼant tiʼj? In yolin tiʼj jun qyol in xi qtziyen ex nim toklen.

Jaw tjyoʼn Jehová Aarón kyukʼil tkʼwaʼl tuʼn kyok te pal ex tuʼn kyaqʼunan toj ja xbʼalun. Iltoq tiʼj tuʼn tok kyxqʼuqin ex tuʼn t-xi kyqʼoʼn oyaj atztzu. Oʼkx Aarón, aju tnejel pal, attoq ambʼil te tuʼn tokx toj lugar Xjanxix. Jun maj toj jun abʼqʼi in nokxtoq tuʼn t-xi tqʼoʼn jun oyaj tiʼj til, tiʼj kyil toj tja, ex tiʼj kyil kykyaqil aj Israel.

Kubʼ bʼaj tuʼn tbʼinchet ja xbʼalun kyuʼn aj Israel tej otoqxi tzikʼ jun abʼqʼi kyetzlen toj Egipto. Toj ambʼil aju, ten jun ja jatumel tuʼn kykʼulin te Jehová.

Kubʼ tqʼoʼn Jehová jun muj tibʼaj ja xbʼalun ex kubʼ noj tuʼn tuʼn tajwalil. Iktzun tten kubʼ tyekʼin qa in tzalajtoq tiʼj. Qa ma kubʼ ten muj tibʼaj ja xbʼalun, ax in che kyaj ten aj Israel atz jatumel ateʼ. Pero qa ma jaw muj, in neltoq kynikʼ qa iltoq tiʼj tuʼn kyxiʼ toj juntl lugar. In bʼajtoq kyxiten ja xbʼalun ex in chextoq lepeʼ tiʼj muj.