Tzaj tqʼamaʼn Jehová jlu te Moisés: «Tjatza tzalu wukʼile twi witz. Kbʼel ntzʼibʼine qe nleye kywitz tzʼlom abʼj ex che xel nqʼoʼne teya». Jax Moisés twi witz ex ax kyaj ten 40 qʼij ex 40 qonikʼen. Tej atztoq taʼ twi witz, kubʼ ttzʼibʼin Jehová aʼyeju Lajaj Mandamyent twitz kabʼe tzʼlom abʼj plan ex i ex tqʼoʼn te Moisés.

Tej tikʼ chʼin ambʼil, kubʼ kyximen aj Israel qa otoq che kyaj tzaqpiʼn tuʼn Moisés. Tuʼntzunju, xi kyqʼamaʼn jlu te Aarón: «¡Qajbʼile jun nejenel tuʼn tkubʼ nej qwitze. Bʼinchankuya jun qdiose!». Xi tqʼamaʼn Aarón jlu kye: «Kyiʼntze qʼan pwaq at kyukʼile». Okxtzun tqʼoʼn Aarón jlu toj qʼaqʼ tuʼntzun tkubʼ bʼinchet tilbʼilal jun tal wakẍ tiʼj. Tzajtzun kyqʼamaʼn xjal jlu: «¡Aju tilbʼilal tal wakẍ lu atzun qdiosju aju etz qʼinte qe toj Egipto!». Ok kyqʼoʼn jun ninqʼij ex e ok ten naʼl dios twitz tal wakẍ qʼan pwaq ttxʼotxʼil. ¿Bʼaʼnpe jlu? Nya bʼaʼn, tuʼnju otoq txi kytziyen tnam xjal qa oʼkxtoq che ajbʼel te Jehová. Pero mintiʼ japun twi kyyol kyuʼn.

 Ok tqʼoʼn Jehová twitz tiʼjju in bʼajtoq ex xi tqʼamaʼn jlu te Moisés: «Tkuʼxa kyukʼil xjal, tuʼnju mintiʼ in xi kybʼiʼn aju xi nqʼamaʼne kye. Lu qe in che naʼn dios twitz juntl dios nya ax tok». Kuʼtz Moisés twi witz kyukʼil kabʼe tzʼlam abʼj toj tqʼabʼ.

Tej chʼixtoq tkuʼpin Moisés jatumel ateʼ xjal, xi tbʼiʼn tqʼajqʼajel kywiʼ xjal in che bʼitzin. Tej tkuʼpin, ok tqʼoʼn twitz kyiʼj xjal in che bʼixin ex in che naʼn dios twitz tilbʼilal tal wakẍ. Tzaj nimxix tqʼoj Moisés, e kubʼ t-xoʼn qeju kabʼe tzʼlom abʼj twitz txʼotxʼ ex e kubʼ pax. Jurat kubʼ t-xitin tilbʼilal ex xi tqanin jlu te Aarón: «¿Tzeʼn tten xkubʼ tkʼuʼja kyuʼn xjal tuʼn tkubʼ tbʼinchaʼna nya bʼaʼn tilbʼilal lu?». Xi ttzaqʼweʼn Aarón jlu: «Miʼn tzaj tqʼoja, tuʼnju ojtzqiʼn tuʼna alkye kymod xjal lu. Kyajbʼiltoq jun kydios, ex ma tzʼokx nqʼoʼne qʼan pwaq toj qʼaqʼ ex ma tzʼetz tilbʼilal tal wakẍ lu». Mintiʼtoq tuʼn tbʼant jlu tuʼn Aarón. Jax Moisés juntl maj twi witz ex kubʼsan twitz Jehová tuʼn tkubʼ tnajsaʼn kyil xjal.

Kubʼ tnajsaʼn Jehová kyil aj Israel aʼyeju kyajbʼiltoq tuʼn kynimen te. ¿Nyapetzun nim toklen tuʼn t-xi kybʼiʼn aj Israel Jehová ex Moisés?