Tej tikʼ junlo kabʼe xjaw kyetzlen aj Israel toj tnam Egipto, e kanin t-xe witz Sinaí tbʼi ex atz e kubʼ ten toj lugar aju. Xitzun tqʼamaʼn Jehová te Moisés tuʼn tjax twi witz lu ex xi tqʼamaʼn jlu te: «Wuʼne ma che klet aj Israel. Qa ma txi kybʼiʼn nyole ex qa ma che japun nleye kyuʼn, che okel te ntname nim toklen». Tej tkuʼtz Moisés twi witz, xi tqʼamaʼn kye aj Israel aju otoq tzaj tqʼamaʼn Jehová te. ¿Tiʼ xi kytzaqʼweʼn aj Israel? Xi kytzaqʼweʼn jlu: «Tkyaqilju ma tma Jehová kbʼantel quʼne».

Yajxitl, jax juntl maj Moisés twi witz. Atz twi witz tzaj tqʼamaʼn Jehová jlu te: «Toj oxetl qʼij, chin yolile kyukʼil xjal. Qʼamanxa kye xjal tuʼn miʼn kyjatz twi witz Sinaí». Kuʼtz Moisés ex xi tqʼamaʼn kye aj Israel tuʼn tkubʼ kybʼinchan kyibʼ tuʼn t-xi kybʼiʼn tyol Jehová.

Toj toxin qʼij, ok kykeʼyin aj Israel twitz kyaʼj in tilkʼaj ex nojni twi witz tuʼn qʼeq muj. Ex xi kybʼiʼn jun tqʼajqʼajel qʼankyoq nimxix wen ex jun tqʼajqʼajel twi chun. Kuʼtztzun Jehová twi witz toj tqan qʼaqʼ. Nimxix e tzaj xobʼ aj Israel. Kubʼ noj tkyaqil twi witz tuʼn sibʼ ex jaw yukch txʼotxʼ nimxix. Aju tqʼajqʼajel twi chun mas jaw qʼajt tej tikʼ ambʼil. Tzaj tqʼamaʼn Jehová jlu: «Aqine Jehová. Mintiʼ tuʼn kyajbʼene te juntl dios».

Jax juntl maj Moisés twi witz, ex tzaj tqʼoʼn Jehová qe tley tuʼn t-xi tqʼoʼn kye aj Israel. Tzaj tqʼamaʼn Jehová toj ley lu alkye tten tuʼn kyajbʼen aj Israel te ex alkye kymod tuʼn tten. Kubʼ ttzʼibʼin Moisés qe ley lu ex yajxitl xi tuʼjin kye aj Israel. Atzun kye xi kytziyen jlu: «Tkyaqilju ma tma Jehová kbʼantel quʼne». Iktzun tten xi kytziyen jun kyyol te Dios, pero ¿japun kyuʼn?